Skip to content

Skip to table of contents

Olombangi Via Yehova

Select language Umbundu

Anga hẽ Ohali—Ekangiso li Tunda ku Suku?

Anga hẽ Ohali—Ekangiso li Tunda ku Suku?

LUZIA OCILEMA KOKULU KUAYE KUEPĨLI. Eci a kala omõla wa kuatiwa luveyi wociteyateya okuti, uveyi umue u sambuka hawo u honguisa etimba. Eci a kuata 16 kanyamo, ukãi umue Luzia a talavayele laye wo sapuila hati: “Suku o kasi oku ku kangisa lulema omo kua pokuile kuenda kua sanjuisile ina yove.” Noke lianyamo amue, Luzia wa ivaluka esumuo a yeva vepuluvi liaco.

ECI DAMARIS A LIMBUKA OKUTI O KUETE UVEYI WO KANSER, isiaye wo pula hati: “Nye wa linga oco o kuatiwe luveyi waco? Citava okuti wa linga ocina cimue ka ca sungulukile. Eli olio esunga lieci Suku a kasilili oku ku kangisa.” Damaris wa yeva esumuo lialua omo liolondaka viaco.

Ocisimĩlo cokuti oku vela ekangiso li tunda ku Suku, ulandu umue wosimbu. Elivulu limue losapi hati, Hábitos e Costumes das Terras Bíblicas, li popia okuti omanu valua va enda oku tava okuti “uveyi wa kokiwa omo liekandu omunu o kasi oku vela a linga ale ekandu liakamba vaye kuenda uveyi waco wa tumiwa ndekangiso komunu waco.” Elivulu losapi hati: Medicina Medieval e Praga, kesulilo liocita cakuãla toke kocita cekũi latãlo lia lombolola okuti, “omanu vamue va tavele okuti Suku o nena afengi oco a va kangise omo liakandu avo.” Anga hẽ ci lomboloka okuti olohũlukãi viomanu va fa ko Europa omo liefengi lia pita kocita 14, Suku eye wa kala oku sombisa olondingaĩvi? Ale efengi lia kokiwa lapuka amue ndomo ca lekisiwa vakonomuiso a lingiwa? Omanu vamue pamue va lipula ndoco: Anga hẽ Suku o talavaya lovoveyi oco a kangise omanu omo liakandu avo? *

KŨLĨHĨSA: Nda ovoveyi kuenda ohali via kala ekangiso li tunda ku Suku, momo lie Omõlaye Yesu a sakuila omanu va kala oku vela? Anga hẽ eci nda ka ca lekisile okuti Suku o kuete ekambo liesunga? (Mateo 4:23, 24) Yesu lalimue eteke a patãlele ovilinga via Suku. Eye wa popia hati: “Ndingainga ovina viu sanjuisa” kuenda “ndi linga ovina Isia a ndi tuma oku linga.”—Yoano 8:29; 14:31.

Embimbiliya li popia hati: Yehova Suku, “ukuesunga.” (Esinumuĩlo 32:4) Ndeci, Suku lalimue eteke nda a koka ocilunga cimue okuti ombalão yi kupuka loku ponda olohuluwa viomanu omo a yonguile oku kangisa omunu umue o kasimo! Catiamẽla kesunga lia Suku, Avirahama ufendeli umue wa Suku ukuekolelo wa popia okuti Suku lalimue eteke a “nyõlela olondingesunga kumue lolondingaĩvi.” Eye wa popia hati, “ci kole kokuove.” (Efetikilo 18:23, 25) Embimbiliya li popiavo okuti, “Ci kale kupãla la Suku oku linga evĩho”; eye ka lingi cimue “ca vĩha.”—Yovi 34:10-12.

CECI EMBIMBILIYA LI TU LONGISA CATIAMẼLA KOHALI

Eci tu tala ohali ka ci lomboloka okuti tu kasi oku kangisiwa la Suku omo liekandu limue tua linga. Yesu wa lekisa ocili caco eci eye kumue lolondonge viaye va mola ulume umue wa citiwa omeke. “Olondonge viaye vio pula viti: ‘A Rambei, helie wa linga ekandu, ulume u, ale olonjali viaye omo a citiwa omeke?’ Yesu wa tambulula hati: ‘Lomue wa linga ekandu, ci kale ulume u, ci kale olonjali viaye, pole, ca lingiwila oco ovilinga via Suku vi situluiwe vokuaye’”—Yoano 9:1-3.

Omo liocisimĩlo caco ca siatele calua, olondonge via Yesu via komõha eci eye a popia okuti lomue wa linga ekandu, ci kale ulume u, ci kale olonjali viaye okuti ca va kokela ohali. Yesu ka sakuile lika ulume omeke pole poku ci linga wa imula ocisimĩlo ka ca sungulukila cokuti ohali ekangiso li tunda ku Suku.  (Yoano 9:6, 7) Omanu vana va tala ohali koloneke vilo omo lioku vela, va pondola oku sanga elembeleko poku kũlĩha okuti Suku hayeko o kasi oku va kokela ohali yaco.

Momo lie Yesu a sakuila omanu va vela nda Suku wa kala oku va kangisa omo liovina vĩvi va linga?

Ovisonehua vi tu likuminya

  • “Suku ka setekiwa leci cĩvi kuenda eye ka seteka umue.” (TIAGO 1:13) Ocili okuti “ovina vĩvĩ” vi sakalaisa omanu vokuenda kuanyamo alua oku kongelamo ovoveyi, evalo kuenda olofa, ndopo vi ka kunduiwa.

  • Yesu Kristu “wa sakula vosi va kala oku tala ohali.” (MATEO 8:16) Omõla a Suku poku sakula omanu vosi veya kokuaye, wa lekisa okuti Usoma wa Suku u ka ci linga voluali luosi.

  • “Eye [Suku] o puenya asuelẽla osi vovaso avo, oku fa ka ku kalako vali, ndaño oku lila loku liyula lupongo ka vi ka kalako vali. Ovina viatete via pita.”—ESITULUILO 21:3-5.

HELIE O KUETE EKO OMO LIOHALI YOSI TU TALA?

Momo lie omanu va siatela oku yeva evalo loku tala ohali? Omanu va siata oku sokolola epulilo liaco vokuenda kuanyamo alua. Nda Suku ka kuete eko, helie wa siata oku koka ovitangi viaco? Atambululo apulilo a lingiwa ndeti, a ka kũlĩhĩsiwa vocipama ci kuãimo.

^ tini. 4 Ndaño okuti kosimbu Suku wa enda oku kangisa omanu luveyi umue, Embimbiliya ka li lekisa okuti cilo Yehova o kasi oku talavaya lovina viaco ndeci ovoveyi ale ovilunga oco a kangise omanu omo liakandu avo.