Skip to content

Skip to table of contents

Olombangi Via Yehova

Select language Umbundu

 OSAPI YO KOÑOÑO | CECI KUFA OMUNU UMUE TU SOLE

Poku Liyaka Lesumuo

Poku Liyaka Lesumuo

Ndaño okuti ku sangiwa olonumbi vialua viatiamẽla koku liyaka lesumuo, pole, kuli lika vimue vi tu kuatisa. Pamue, o limbuka okuti omanu vamue va ku sapuila hati ku ka lile, ale ku ka sumue. Vakuavo va ku vetiya oku lila loku lekisa esumuo. Pole, ovisimĩlo Viembimbiliya viatiamẽla kondaka yaco, vi likuata ciwa lakonomuiso a siata oku lingiwa koloneke vilo.

Kapata amue ovituwa viavo vi lekisa okuti, nda ulume o lila, ci lomboloka oku hongua. Kuli hẽ esunga lioku kuata osõi yoku lilila powiñi? Olondotolo vina via siata oku kũlĩhĩsa ekalo liolondunge viomanu, via lombolola okuti oku lila onjila yimue yoku lekisa esumuo. Handi vali, ku kuatisavo vana va sumua oco vamameko oku pandikisa ndaño lovitangi viaco. Oku tutuiya esumuo ci koka ovitangi. Vembimbiliya ka mu sangiwa onumbi yi lekisa okuti ka ca sungulukile oku sumua. Sokolola ulandu wa Yesu. Ndaño okuti Yesu wa kuatele unene woku pindula omanu va fa, pole eci ekamba liaye Lasaru a fa wa lila!—Yoano 11:33-35.

Omanu vana va fisa vakuepata liavo, olonjanja vialua va siata oku kuata onyeño, ca piãla enene nda olofa viaco vieya ocipikipiki. Kuli asunga alua a vetiya omunu wa fisa oku kuata onyeño, ca piãla enene nda okuti omunu a sumbila u sapuila olondaka viu sumuisa. Ulume umue o tukuiwa hati Mike wo kofeka yo Afrika do Sul, wa lombolola ndoco: “Isiange wa fa eci nda kuata lika 14 kanyamo.” Eci isiange a kala oku kendiwa, usongui wetavo lio Anglikana wa popia hati, Suku o sukila lonjanga omanu vawa. * Olondaka viaco via ndi kokela onyeño yalua, momo tua sukilile isietu. Ndaño okuti pa pita ale 63 kanyamo, toke cilo nda siata oku yeva esumuo.

Nye ci popiwa catiamẽla koku livetela evelo? Omunu una okuti ukuepata liaye wa fa ocipikipiki, olonjanja vialua pamue o livetela evelo poku popia hati, ‘nda nda ci kũlĩhĩle nda nda linga eci, loco.’ Ale pamue osimbu omunu waco ka file, onjanja ya sulako wa lisanga laye wa lihoyisi. Kuenje, ovisimĩlo viove vioku livetela evelo vi livokiya.

Nda o kasi oku liyaka locitangi coku livetela evelo kuenda onyeño, yuvula oku seleka ovisimĩlo viaco. Sapela lekamba limue li pondola oku ku yevelela loku ku sapuila okuti ovisimĩlo viaco via siatavo oku pita lomanu vakuavo va liyaka locitangi caco. Embimbiliya li tu ivaluisa okuti: “Ekamba li sola olonjanja viosi, kuenje li linga manjove koloneke viohali.”—Olosapo 17:17.

Ululiki wetu Yehova Suku eye ekamba lia velapo liomunu una wa fisa ukuepata liaye. Nda wo situluila ovisimĩlo vi kasi vutima wove poku likutilila, ‘eye o ku tata.’ (1 Petulu 5:7) Momo eye wa likuminya okuti omanu vosi va ci linga, va kuata ovisimĩlo viwa, lekavuluko, omo ‘liombembua ya Suku, yina ya piãla olondunge viosi.’ (Va Filipoi 4:6, 7) Suku o pondolavo oku ku lembeleka lekuatiso Liondaka yaye Embimbiliya. Omo liaco, soneha ulala wovinimbu Viembimbiliya vi lembeleka. (Tala  pokakasia kocipama cilo.) Citava okuti, o yongola oku patekela vimue pokati kovinimbu viaco. Nda wa ci linga o kuata ovisimĩlo viwa vi ku kuatisa eci  o kala likaliove ale ceci o pumba otulo luteke.—Isaya 57:15.

Ulume umue o tukuiwa hati Jack o kuete 40 kanyamo, ukãi waye wa fa luvei wo kanser. Jack wa popia hati, nda siata oku kala ulika olonjanja vialua. Pole, wa siata oku kuatisiwa lohutililo. Eye wa lombolola ndoco: “Eci ndi likutilila ku Yehova, ndi limbuka okuti si kasi ulika. Pamue vokuenda kuteke ndi pumba otulo. Kuenje, ndi tanga Ovisonehua vi ndi lembeleka loku vi sokolola. Noke ndi situlula ovisimĩlo vi kasi vutima wange poku likutilila, kuenje ndi kuata ekavuluko, lombembua yovutima yi ndi kuatisa oku kuata otulo.”

Ufeko umue o tukuiwa hati Vanessa, inaye wa fa loku vela. Eye wa kuatisiwavo lunene wolohutililo. Ufeko waco wa popia hati: “Eci nda liyaka locitangi caco, nda enda oku tukula onduko ya Suku loku lila. Kuenje, Yehova Suku wa yeva olohutililo viange kuenda olonjanja viosi wa nyĩha ongusu nda sukilile.”

Vakuakulembeleka omanu vana va fisa, va siata oku eca evetiyo liokuti omanu vaco, va sukila oku litumbika kovopange oku kuatisa vakuavo ale oku lieca olumue oco va linge upange umue. Oku ci linga ci kuatisa omanu va sumua oku kuata esanju kuenda oku tepulula esumuo liavo. (Ovilinga 20:35.) Akristão valua va liyaka lesumuo, va limbuka okuti oku likolisilako oku kuatisa vakuavo ca siata oku va nenela elembeleko.—2 Va Korindo 1:3, 4.

^ tini. 5 Pole, hacoko Embimbiliya lilongisa. Embimbiliya li situlula ovina vitatu via koka olofa.—Ukundi 9:11; Yoano 8:44; Va Roma 5:12.