Skip to content

Skip to table of contents

Olombangi Via Yehova

Select language Umbundu

 OSAPI YO KOÑOÑO | CECI KUFA OMUNU UMUE TU SOLE

Omanu va fa va ka Kuata Vali Omuenyo!

Omanu va fa va ka Kuata Vali Omuenyo!

Citava okuti ove ivaluka ulandu wa Gail, wa tukuiwa ale vovipama viatete Viutala ulo Wondavululi, wa kuatele ovisimĩlo viokuti lalimue eteke a ka yula esumuo lioku fisa ulume waye Rob. Pole, o lavoka oku lisanga vali lulume waye voluali luokaliye Suku a likuminya. Omo liaco, eye wa popia hati, “ndi sole calua ocinimbu Cembimbiliya ci sangiwa kelivulu Liesituluilo 21:3, 4,” ci lekisa okuti: “Suku o kala lavo. Eye o puenya asuelẽla osi vovaso avo, oku fa ka ku kalako vali, ndaño oku lila loku liyula lupongo ka vi ka kalako vali. Ovina viatete via pita.”

Gail wa popiavo hati: “Ohuminyo eyi, yiwa. Pole, ndi kuetele ohenda omanu vana va fisa vakuepata liavo, okuti ka va kũlĩhĩle elavoko lioku ka li sanga vali lavo.” Gail, omo lioku kapako ovina a siata oku lilongisa, wa litumbika kupange wotembo yosi poku kundila omanu ohuminyo ya Suku yatiamẽla kovaso yoloneke, eci “oku fa ka ku kalako vali.”

Yovi wa kolelele okuti o ka kuata vali omuenyo

Pamue o popia hati: ‘Si tava kolondaka viaco!’ Pole, kũlĩhĩsa ulandu wulume umue o tukuiwa hati Yovi. Eye wa vela calua. (Yovi 2:7) Ndaño okuti Yovi wa livela oku fa, pole wa kolelele kunene wa Suku woku u pindula oco a kuate vali omuenyo palo posi. Omo liaco, lekolelo wa popia hati: “Nda wa tavele oku mbundisa vonjembo! ... Kuenje nda wa mbilikiya, lame nda nda ku kumbulula. Nda oco, ove nda wa kuatela upange wovaka ove ongeva.” (Yovi 14:13, 15) Yovi wa kolelele okuti Suku wa laikele oku u kuatela ongeva kuenda oku tumbulula omuenyo waye.

Suku, ndopo o ka tẽlisa ovina Yovi kumue lomanu vakuavo va lavoka, eci oluali lulo lu ka pongoluiwa ocumbo celau. (Luka 23:42, 43) Embimbiliya kelivulu Liovilinga 24:15 li popia hati: “Ku laika oku kala epinduko.” Yesu wa tu likuminya ndoco: “Ko ka komõhi, momo owola yiya okuti vosi va kasi vayambo va yeva ondaka yaye, kuenje va tundamo.” (Yoano 5:28, 29) Yovi o ka mola oku tẽlisiwa kuohuminyo eyi. Eye o lavokavo oku kuata “olohõlo a kaile lavio eci a kala umalẽhe,” kuenda etimba liaye li amamako oku kala ndeli ‘liovutila.’ (Yovi 33:24, 25) Cimuamue haico ci ka pita lomanu vosi va tava lesanju keliangiliyo lia Suku lioku pindula omanu va fa palo posi.

Nda o kasi oku liyaka lesumuo omo lioku fisa omunu umue o sole calua, citava okuti ovina tua konomuisa, ka via maleleko esumuo liove. Pole, nda wa sokolola lutate kolohuminyo via Suku vi sangiwa Vembimbiliya, o pondola oku kuata elavoko liocili kuenda ongusu yoku pandikisa lovitangi viaco.—1 Va Tesalonike 4:13.

Anga hẽ o yongola oku lilongisa ovina vikuavo vi ku kuatisa poku liyaka lesumuo? Ale wa siata oku li pula “Esunga lieci Suku a kasilili oku ecelela evĩho lohali?” Sandiliya vonumbi yetu yo Internet, jw.org, oco o limbuke ndomo Embimbiliya li eca elembeleko, kuenda atambululo a suapo.