Skip to content

Skip to table of contents

Olombangi Via Yehova

Select language Umbundu

Ove o Nõla Ovina o ka Linga Kovaso Yoloneke!

Ove o Nõla Ovina o ka Linga Kovaso Yoloneke!

ANGA HẼ WA NÕLA ALE ECI CI KA PITA LOVE KOVASO YOLONEKE? Omanu vamue va tava okuti ovina vi keya kovaso yoloneke ovio vi songuila omuenyo wavo okuti, ovina ovo muẽle va nõla havioko. Nda ovo ka va tẽlisa ovimãho viavo, va liwekako oku sandiliya onjila yoku vi tẽlisa. Momo va popia vati, “Ka kuli esokiyo lalimue li lekisa okuti, nda laikele oku tẽlisa ocimãho cange!”

Vakuavo va sumua eci va limbuka okuti ka kuli onjila yoku yovuiwa kohali kuenda koluali lulo lueyuka evĩho. Ovo va likolisilako oku mioñolola ekalo liomuenyo wavo, pole, uyaki, ungangala, lovilemawe kuenda ovovei via siata oku nyõla asokiyo osi va linga. Ovo va lipula ndoco, ‘Momo lie tu kapelako ovina viaco’?

Ocili okuti, ovitangi viomuenyo vi pondola oku nyõla asokiyo omunu a linga. (Ukundi 9:11) Pole, catiamẽla kovina vi ka pita letu kovaso yoloneke, tu sukila oku nõla eci tu ka linga. Embimbiliya li lekisa okuti, ovina vi ka pita love kovaso yoloneke via tamba konjila o nõla cilo. Kũlĩhĩsa eci Embimbiliya li popia.

Mose una wa kala usongui wa va Isareli, wa sapuilile omanu ndomo va ponduile oku iñila Vofeka Yohuminyo: ‘Nda ku kapela omuenyo lokufa kuenda esumũlũho lesiñalo. Oco, nõla omuenyo, okuti ove lombuto yove vu kala lomuenyo, kuenje vu sola Yehova, Suku yove, loku yevelela ondaka yaye loku kakatela kokuaye.’Esinumuĩlo 30:15, 19, 20.

“Nda ku kapela omuenyo lokufa kuenda esumũlũho lesiñalo. Oco, nõla omuenyo.”​—Esinumuĩlo 30:19

Ocili! Suku wa yovola va Isareli kupika wo Kegito loku eca kokuavo elavoko lioku kuata elianjo kuenda omuenyo wesanju Vofeka Yohuminyo. Pole, ovina viaco nda ka vieyile kokuavo vocipikipiki. Oco va tambule asumũlũho aco va sukilile oku “nõla omuenyo.” Ndamupi? Poku ‘sola Suku, loku yevelela ondaka yaye kuenda oku kakatela kokuaye.’

Koloneke vilo, ove o sukilavo oku nõla onjila yimue, pole, onjila o nõla oyo yi ka lekisa eci ci ka pita love kovaso yoloneke. Poku nõla oku sola Suku, loku yevelela ondaka yaye kuenda oku kakatela kokuaye, ci ka ku kuatisa oku nõla omuenyo, okuti omuenyo ko pui voluali luokaliye palo posi. Pole, nye ca kongeliwa voku linga ovina viaco evi?

NÕLA OKU SOLA SUKU

Ocisola oco ocituwa ca velapo ca Suku. Upostolo Yoano wa soneha hati, “Suku eye ocisola.” (1 Yoano 4:8) Omo liaco, eci Yesu vo pula hati, cipi ocihandeleko ca velapo pokati kovihandeleko viosi, eye wa tambulula hati: “Sola Yehova Suku yove lutima wove wosi, lomuenyo wove wosi kuenda lolondunge viove viosi.” (Mateo 22:37) Ukamba wocili la Yehova Suku u sevetiwa kocisola, ka u sevetiwa kusumba ale kepokolo ka lia sungulukile. Momo lie tu nõlelapo oku sola Suku?

Ocisola Yehova a kuetele omanu, ci sokisiwa locisola olonjali vi kuetele omãla vavo. Ndaño okuti olonjali ka via lipuile, ovio vi longisa, vi pamisa, vi kuatisa kuenda vi pindisa omãla vavo momo, vi yongola okuti, omãla va kuata esanju kuenda ekalo liwa. Nye olonjali vi lavoka oku tambula komãla vavo? Olonjali vi yongola okuti vi soliwa lomãla vavo kuenda va kapako ovina va va longisa oco vi va kuatise. Ka ca sungulukile hẽ okuti Isietu wokilu o lavokavo okuti tu lekisa ocisola kokuaye omo liovina viosi eye a siata oku tu lingila?

 YEVELELA ONDAKA YAYE

Vembimbiliya ondaka yokuti, “yevelela” yi lombolokavo oku “pokola.” Siti eci oco tua siata oku popia poku sapuila omõla umue hati, “Yevelela olonjali viove”? Ocili okuti, voku yevelela ondaka ya Suku mua kongela oku lilongisa kuenda oku pokola kovina eye a popia. Omo okuti ka tu pondola oku yeva ondaka ya Suku omo a kasi kilu, tu u yevelela poku tanga loku kapako ovina vi sangiwa Vondaka yaye Embimbiliya.—1 Yoano 5:3.

Vepuluvi limue Yesu wa lekisa esilivilo lioku yevelela ondaka ya Suku poku popia hati: “Omunu ka muila lika omuenyo kombolo, te kolondaka viosi vi tunda vomẽla wa Yehova.” (Mateo 4:4) Ndeci okulia kuetimba ku kuete esilivilo kokuetu, oku kuata ukũlĩhĩso wa Suku, oco ca velapo okuti okulia ci sule. Momo lie? Soma Salomone wa popia hati: “Momo ombindikiyo yolondunge ya soka lombindikiyo yolombongo. Okuvelapo kuolondunge kuoku: vi popela omuenyo wu o kasi lavio.” (Ukundi 7:12) Ukũlĩhĩso kuenda olondunge via Suku vi pondola oku tu teyuila koloneke vilo loku tu kuatisa oku nõla ciwa onjila yi tuala komuenyo ko pui kovaso yoloneke.

KAKATELA KOKUAYE

Ivaluka olusapo lua Yesu tua konomuisa vocipama ca pita muna eye a popia hati: “Ombundi ya sukatela haiyo ya likupika oyo onjila yi tuala komuenyo kuenje vañami ñami va yi sanga.” (Mateo 7:13, 14) Nda tu endela vonjila yaco ci tu kuatisa oku songuiwa ciwa loku tambula onima yetu, okuti omuenyo ko pui. Tu kuete esunga liwa lioku kuata ukamba la Suku. (Osamo 16:8) Tu ci linga ndati?

Eteke leteke, kuli ovina vialua tu sukila oku linga kuenda ovina vialua nda tu linga. Ovina viaco pamue vi tu tateka okuti ka tu kuata vali otembo yoku sokolola kovina Suku a yongola okuti, ovio tu linga. Eli olio esunga lieci Embimbiliya li tu sapuilila hati: “Endaendi lutate nda vakualondunge. Ko ka endaendi ndava va kamba olondunge. Kolisiko oku yukisa oloneke viene leci cesunga lika, momo oloneke vilo via viha.” (Va Efeso 5:15, 16) Tuamẽla ku Suku poku ecelela okuti, ukamba tu kuete laye owo u kala ocina ca velapo komuenyo wetu.—Mateo 6:33.

OVE O NÕLA OVINA O KA LINGA

Ndaño okuti ka kuli lacimue o pondola oku linga oco o pongolole ovina vi ka pita love kovaso yoloneke, pole, kuli ovina vimue ove kumue lepata liove vu sukila oku linga oco vu kuati ekalo liwa kovaso yoloneke. Embimbiliya li situlula okuti Isietu wo kilu Yehova Suku, o tu sole calua kuenda ecelela okuti tu kũlĩha eci eye a yongola okuti oco tu linga. Kũlĩhĩsa olondaka viuprofeto Mika viokuti:

“Amunu, Suku wa ku lekisa eci ciwa, Yehova o yongola nye kokuove, hateko oku linga esunga, loku sola ohenda kuenda oku endaenda la Suku yove lesuluviko?”Mika 6:8.

Anga hẽ o ka tava kelaleko lia Yehova lioku endaenda laye loku kuata asumũlũho ka a pui ana eye a ka eca ku vana va ci linga? Ove o nõla eci o linga!