Skip to content

Skip to table of contents

Olombangi Via Yehova

Select language Umbundu

O Pondola Oku Kala Otembo ka yi Pui Palo Posi

O Pondola Oku Kala Otembo ka yi Pui Palo Posi

ELAVOKO LIMUE LI KOMOHĨSA! Ululiki wetu wa likuminya oku tu ĩha omuenyo ko pui palo posi. Omanu valua ka va tava kondaka yaco. Ovo va popia vati, ‘omanu vosi voluali va laika oku fa eteke limue’ kuenda ‘olofa vi panga onepa komuenyo.’ Vakuavo va tava okuti tu pondola oku kala otembo ka yi pui, pole, hapaloko posi. Ovo va sima okuti omunu o pondola lika oku kala otembo ka yi pui noke yoku fa, kuenje wenda kilu. Cipi ocisimĩlo cove?

Osimbu ka tua tambuluile, tu kũlĩhĩsi etambululo Liembimbiliya kapulilo atatu: Onjila ndomo omunu a lulikiwa, yi situlula ndati otembo eye nda a kala komuenyo? Cipi ca kala ocipango ca Suku eci a lulika ongongo kuenda omanu? Momo lie tu fila?

OMUNU WA LULIKIWA LONJILA YIMUE YILIKASI

Pokati kovina viosi Suku a lulika palo posi, omanu ovo lika va lulikiwa lonjila yilikasi. Momo lie? Embimbiliya li lekisa okuti omanu ovo lika va lulikiwa “lesetahãlo” lia Suku. (Efet. 1:26, 27) Eci ci lomboloka nye? Ci lomboloka okuti omanu va lulikiwa lovituwa ndevi via Suku, ndeci ocisola kuenda esunga.

Omanu va lulikiwavo lepondolo lioku sokolola. Ovo va tẽla oku tepisa eci ciwa leci cĩvi kuenda va kuetevo onjongole yoku kũlĩha Suku loku kala akamba vaye. Omo liaco, tu pondola oku komõha unene Woluali, ovina via lulikiwa, oviluvialuvia, ovisikilo kuenda ovihaso. Pole, omanu ovo lika va kuete epondolo lioku fendela Suku. Ovina viaco vi lekisa oku litepa ku kasi pokati komanu kuenda oviluvo vikuavo via Suku vi kasi vongongo.

Kũlĩhĩsa kuenda sokolola ndoco: Nda ca sunguluka hẽ ku Suku oku eca ovituwa vi komohĩsa komanu kuenda epondolo lioku vi kuata loku vi mioñolola, nda eye wa tu lulika oco tu kale lika anyamo amue? Ocili okuti Suku wa tu lulika lovituwa viaco kuenda lovoloño alikasi oco tu kuate esanju lioku kala otembo ka yi pui palo posi.

OCIPANGO CA SUKU TUNDE KEFETIKILO

Vamue va popia vati, Suku lalimue eteke a yonguile okuti omanu va kala otembo ka yi pui palo posi. Ovo va tava kocisimĩlo cokuti tu pita ombamba mulo vongongo, loku setekiwa oco ku limbukiwe  u o sesamẽla oku kuata omuenyo ko pui kumue la Suku kilu. Pole, nda eci ca kaile ocili, ku simi hẽ okuti Suku eye o kuete eko omo liohali kuenda ũvi u kasi voluali koloneke vilo? Eci ka ci likuata lovituwa via Suku. Catiamẽla kokuaye Embimbiliya li popia ndoco: “Olonjila viaye viosi viesunguluko. Haeye Suku yocili, ka kuete etime. Ukuesunga, wa suñama cimue.”—Esinumuĩlo 32:4.

Embimbiliya li situlula ocipango ca Suku catiamẽla kongongo volondaka viokuti: “Ilu lia Yehova, ongongo puãi wa yeca komãla vomanu.” (Osamo 115:16) Omo liaco, Suku wa lulika ongongo oco tu kalemo otembo ka yi pui. Palo posi tu kuete ovina viosi tu sukila oco tu kale lesanju otembo yendaño hũ.—Efetikilo 2:8, 9.

“Ilu lia Yehova, ongongo puãi wa yeca komãla vomanu.”—Osamo 115:16

Embimbiliya li sitululavo ocipango ca Suku catiamẽla komanu. Eye wa handeleka ohueli yatete hati: “Yukisi oluali, . . . viali . . . ovinyama viosi vi ñuala ñuala kilu lieve.” (Efetikilo 1:28) Sokolola esanju nda va kuata poku tata ongongo loku tandisa Ocumbo Celau! Omo liaco, Adama la Heva kuenda omãla vavo, va laikele oku kuata omuenyo ko pui palo posi okuti, kilu hakoko.

MOMO LIE TU FILA?

Momo lie tu fila? Embimbiliya li popia okuti, ungelo umue ukuesino weya oku tukuiwa okuti Satana Eliapu, wa seteka oku nyõla eliangiliyo lia Suku vocumbo Cedene. Ndamupi?

Satana wa yapuisa olonjali vietu viatete, Adama la Heva, oco vi sinĩle Suku. Satana wa popia okuti Suku wa kala oku limbika cimue ciwa ku Adama la Heva okuti, elianjo lioku li nõlela eci ciwa leci cĩvi, kuenje ovo va nõlapo oku tiamẽla ku Satana, loku liwekapo oku pokola Suku. Onima yipi va kuata? Vokuenda kuotembo, veya oku fa ndomo Suku a ci popele. Ovo va pumba esumũlũho lioku kala otembo ka yi pui palo posi.—Efetikilo 2:17; 3:1-6; 5:5.

Esino Adama la Heva va lekisa, li kasi oku nenela ovitangi komanu vosi toke cilo. Ondaka ya Suku yiti: ‘Ndeci ekandu lia iñila voluali lomunu umuamue [Adama], kuenda okufa kueya lekandu, haico okufa kua sambukila omanu vosi.’ (Va Roma 5:12) Ekandu kuenda olofa ka via pangele onepa ‘kesokiyo’ lia Suku poku tu lulika. Ovio vi kasi ndocipiñalo olonjali vietu viatete via tu sila.

O PONDOLA OKU KALA OTEMBO KA YI PUI PALO POSI

Esino lia Adama la Heva ka lia pongoluile ocipango ca Suku catiamẽla kongongo kuenda komanu. Ocisola lesunga lia Suku vio vetiya oku sanga onjila yoku tu yovola kekandu kuenda kolofa. Upostolo Paulu wa lombolola ndoco: “Onima yekandu oku fa, pole, ongavelo ya eciwa la Suku omuenyo ko pui vu Kristu Yesu Ñala yetu.” (Va Roma 6:23) Omo liocisola, Suku “wa eca Omõlaye wongunga [Yesu Kristu] okuti, wosi o kolela kokuaye ka nyõliwa, o kuata omuenyo ko pui.” (Yoano 3:16) Yesu wa lieca olumue ndocisembi oco omanu va kuate vali cosi Adama a pumba. *

Ndopo, ohuminyo ya Suku yoku pongolola ongongo yosi oco yi linge ocumbo celau, yi ka tẽlisiwa. O pondola oku kuata esumũlũho liaco nda wa kapako elungulo lia Yesu liokuti: “Iñila vombundi ya sukatela, momo ombundi ya sanjavala haiyo ya tanda yi tuala kenyõleho kuenje valua va endelamo; osimbu okuti ombundi ya sukatela haiyo ya likupika oyo onjila yi tuala komuenyo kuenje vañami ñami va yi sanga.” (Mateo 7:13, 14) Elavoko liove lio kovaso yoloneke lia tamba lika kokuove. Nye o ka linga?

^ tini. 17 Oco o kũlĩhe ovina vikuavo vi lekisa ndomo ocisembi ca Yesu ci pondola oku ku kuatisa, tanga ocipama 5 celivulu losapi hati: Embimbiliya li Pondola Oku tu Longisa Nye? lia sandekiwa Lolombangi Via Yehova. Li sangiwavo vo www.jw.org.