Skip to content

Skip to table of contents

Olombangi Via Yehova

Select language Umbundu

Oku Kapako Alungulo ci Pondola Oku Popela Omuenyo Wove!

Oku Kapako Alungulo ci Pondola Oku Popela Omuenyo Wove!

KETEKE 26 kosãi ya Cembanima kunyamo wo 2004, vimbo lio Simeulue, konano yocifuka co Sumatra, kofeka yo Indonesia, kua pita ocilemawe cimue. Noke ovava vokalunga a tepuluka lonjanga lonjila yimue yi komõhisa. Kuenje vocipikipiki omanu va fetika oku tilila kolomunda loku kaluka vati, “Smong! Smong!” okuti ci lomboloka andunde ovava. Eci pa pita 30 kakukutu akimba anene a veta kohulo yokalunga, kuenje a nyõla onepa yalua yolonjo vio vimbo liaco.

Ocitumãlo catete ca nyõliwa landunde ovava ocifuka co Simeulue. Pokati keci ci soka 78.000 kolonungi vio vimbo liaco, kua fa lika 7 komanu. Momo lie kua fila lika omanu vatito? * Olonungi viocifuka caco via siata oku popia vati: ‘Nda osi ya luluma, kuenje ovava okalunga a tepuluka, tilila kolomunda, momo ku iya ocilunga cimue.’ Omo liocilunga ca pita kocifuka co Simeulue, olonungi viaco via lilongisa oku limbuka okuti, nda vokalunga mu pita apongoloko amue, ku laika oku iya andunde ovava. Oku kapako alungulo, ca popela omuenyo wavo.

Embimbiliya li popia hati, ku laika oku iya “ohali ya piãla okuti ka ya la pita tunde kefetikilo lioluali toke cilo kuenda ka yi ka pitako vali.” (Mateo 24:21) Pole, ohali yaco ka yi lomboloka esulilo Liongongo li pondola oku kokiwa lovopange ka a sungulukile omanu, ale omo liocilunga cimue. Momo ocipango ca Suku ceci okuti, ongongo yi kala otembo ka yi pui. (Ukundi 1:4) Pole, ohali yi laika oku iya, onjila ya Suku yoku “kundula vana va vĩhisa ilu lieve.” Handi vali, ci ka kala esulilo liovina viosi vĩvi kuenda ohali. (Esituluilo 11:18; Olosapo 2:22) Kuenje ci ka kala esumũlũho linene!

Esulilo ka li ka kundula omanu vana ka va kuete eko, ndeci andunde ovava, ovilemawe kuenda ovilunga vikuavo via siata oku linga. Embimbiliya li popia hati, “Suku eye ocisola,” kuenda onduko yaye Yehova. Eye wa likuminya okuti, “olondingesunga vi piñala ofeka, vi tungamo oloneke ka vi pui.” (1 Yoano 4:8; Osamo 37:29) O pondola oku puluka ndati kohali ya piãla loku sanjukila asumũlũho a likuminyiwa? Etosi lia velapo lieli: Kapako alungulo!

LAVULULA APONGOLOKO A SIATA OKU PITA VOLUALI

Ka tu pondola oku tukula eteke liesulilo liovina viosi vĩvi kuenda ohali, momo Yesu wa popia hati: “Catiamẽla keteke lowola yaco, lomue wa yi kũlĩha, ndaño ovangelo kilu, ndaño Omõla, te lika Isia. Pole, Yesu o tu vetiya hati, “lavululi.” (Mateo 24:36; 25:13) Momo lie? Embimbiliya li tu sapuila ekalo lia laikele oku kala voluali osimbu Suku ka nenele esulilo. Ndeci oku tepuluka  kuovava vokalunga kua kuatisa olonungi vio vimbo lio Simeulue oku limbuka okuti ku iya andunde ovava, cimuamue haico okuti, apongoloko a komohĩsa a siata oku pita voluali a tu ĩha ondimbukiso yokuti esulilo li kasi ocipepi. Okakasia ka sangiwa vocipama cilo, ka lombolola apongoloko amue a komõhisa a tukuiwa Vembimbiliya.

Ovolandu amue, a pita kosimbu vokuenda kuotembo yimue, a tukuiwavo pokakasia. Pole, Yesu wa popia okuti eci vu mola “ovina evi viosi” limbuki okuti esulilo li kasi ocipepi. (Mateo 24:33) Li pula ndoco: Otembo yipi ovina viosi via tukuiwa ndeti (1) via fetika oku pita voluali luosi? (2) Anga hẽ via pita vonjanja yimuamue? (3) Via li vokiya hẽ vokuenda kuotembo? Ocili okuti, tu kasi koloneke viaco.

OCINDEKAISE COCISOLA CA SUKU

Ombiali yimue yo ko Estados Unidos ya popia hati: “Omakina yoku lungula ya popela omuenyo womanu.” Noke liandunde a pita kunyamo wo 2004, kua kapiwa omakina yoku lungula omanu kovitumãlo kua pita ocilunga caco, oco va liangiliyile ovilunga vikuavo vi laika oku pita. Cimuamue haico okuti, Suku wa linga eliangiliyo lioku eca elungulo osimbu esulilo ka lieyile. Embimbiliya li popia okuti: “Olondaka evi viwa Viusoma vi kundilua koluali luosi ha vi lingi uvangi kolofeka viosi, oco esulilo liya noke.”Mateo 24:14.

Kunyamo wa pita, Olombangi Via Yehova via talavaya eci ci pitahãla 1,9 kolohuluwa violowola kupange woku kunda olondaka viwa, kueci ci soka 240 kolofeka kuenda eci ci pitahãla 700 kalimi. Oku livokiya kuloño ku tu ĩha uvangi wokuti esulilo li kasi ocipepi. Omo liocisola Olombangi Via Yehova vi kuetele omanu, via siata oku likolisilako oku eca elungulo liokuti eteke liesombiso lia Suku li kasi ocipepi. (Mateo 22:39) Oku limbuka okuti ove o pondola oku kuatisiwa lalungulo aco, ceca uvangi wokuti Yehova o ku kuetele ocisola. Ivaluka  olondaka viokuti, “[Suku] ka yongola okuti umue o nyõliwa, puãi o yongola okuti vosi va likekembela.” (2 Petulu 3:9) Anga hẽ o ka tambuluiya kocisola ca Suku loku pokola kalungulo?

TILILA KOCITUMÃLO CA KOKA!

Ivaluka okuti olonungi vio vimbo lio Simeulue, eci via mola oku tepuluka kuovava vokalunga, via tilila kocitumãlo cimue ca yeluka haico ca koka. Ovio ka via kevelele toke eci ovava a livokiya. Onjila va nõlapo ya popela omuenyo wavo. Cimuamue haico okuti, oco o popeliwe kohali ya piãla yi laika oku iya, o sukila oku tilila kocitumãlo cimue ca koka osimbu kuli otembo yoku ci linga. Ndamupi? Uprofeto Isaya wa vetiyiwa oku soneha ovina viatiamẽla kelaleko limue li kasi oku eciwa “koloneke viesulilo,” tu kasi cilo. Olio liti: “Enjui, tu lamani komunda ya Yehova . . . okuti o tu longisa ovituwa viaye ha tu endaela volonjila viaye.”—Isaya 2:2, 3.

Oku kala konumbuko yomunda ci ku kuatisa oku kala pocitumãlo cimue ca yeluka haico ca koka. Cimuamue haico okuti, oku kũlĩha olonumbi via Suku vi sangiwa Vembimbiliya ca siata oku kuatisa omanu valua voluali luosi koloneke vilo oku linga apongoloko komuenyo wavo. (2 Timoteo 3:16, 17) Poku ci linga va lekisa okuti va kasi oku ‘endela volonjila via Suku,’ loku sanjukila ocali caye kuenda eteyuilo liaye.

O pondola hẽ oku tava kelaleko liaco kuenda oku kuatisiwa locisola ca Suku koloneke vilo viohali? Tu ku vetiya oku konomuisa lutate Ovisonehua vi eca uvangi wokuti tu kasi “koloneke via sulako,” vi sangiwa pokakasia vocipama cilo. Olombangi Via Yehova posongo yove, vi ka sanjukila oku ku kuatisa oku kuata elomboloko liovisonehua kuenda oku vi kapako. Ale o pondola oku sanga atambululo kapulilo ove poku iñila vonumbi yetu yo Internet, www.jw.org. Tala vonepa ALONGISO EMBIMBILIYA > APULILO EMBIMBILIYA A TAMBULUIWA..

^ tini. 3 Ocilunga candunde ovava ca pita kunyamo wo 2004, ca ponda eci ci pitahãla 220.000 komanu okuti, oco ca ponda vali omanu valua.