Skip to content

Skip to table of contents

Olombangi Via Yehova

Select language Umbundu

Nye Suku a ka Linga Kovaso Yoloneke?

Nye Suku a ka Linga Kovaso Yoloneke?

Nda o kasi oku liyaka locitangi cimue, ku kuata etatahãi liokuti ekamba limue liwa li ka linga cimue oco a ku kuatise. Locisimĩlo eci, omanu vamue va popia okuti Suku hekambako, momo ka lingile lacimue oco a va kuatise. Suku ka lingile lika ovina vialua oco a tu kuatise, pole, o ka lingavo ovina vikuavo oco a maleko ovitangi viosi kuenda ohali tua siata oku liyaka lavio koloneke vilo. Nye Suku a ka linga kovaso yoloneke?

O KA MALAKO EVĨHO LIOSI

Yehova Suku o ka malako evĩho liosi poku nyõla ono yalio. Embimbiliya li situlula ono yaco poku popia hati: “Tu cĩ okuti tua tiamẽla ku Suku, puãi oluali luosi lu kasi povaka ondingaĩvi.” (1 Yoano 5:19) “Ondingaĩvi” yaco, eye una Yesu a tukula okuti, “ombiali yoluali lulo,” Satana Eliapu. (Yoano 12:31) Satana una wa siata oku yapuisa omanu, eye ono yovitangi viosi vi kasi voluali. Nye Suku a ka linga kovaso yoloneke?

Suku lekuatiso Liomõlaye Yesu Kristu, ndopo “o nyõla ovilinga vieliapu.” (Va Heveru 2:14; 1 Yoano 3:8) Embimbiliya li lekisa okuti Eliapu, “lia kũlĩha okuti li kuete otembo yitito.” (Esituluilo 12:12) Suku o ka malako evĩho liosi kuenda omanu vana va siata oku li koka.—Osamo 37:9; Olosapo 2:22.

O KA PONGOLOLA ONGONGO OCO YI LINGE OCUMBO CELAU

Noke yoku malako evĩho liosi, Ululiki wetu o ka tẽlisa ocipango caye coku eca omuenyo ko pui komanu voluali luokaliye palo posi. Nye tu lavoka?

Ombembua kuenda oku kolapo. “Ambombe puãi va piñala ofeka, kuenje va sanjukila okusalala kualua.”—Osamo 37:11.

Okulia kualua. “Vofeka mu kale olomema via lua. Vi hunge hunge kilu liolomunda.”—Osamo 72:16.

Olonjo via kolapo kuenda upange u sanjuisa. “Va tunga olonjo kuenje va kalamo; va kũla oviumbo viayuva kuenje va lia epako liavio. . . . va lialia ño-o kupange wovaka avo.”—Isaya 65:21, 22.

O yongola hẽ oku kala vekalo limue ndeli? Ovina viaco ndopo vi ka tẽlisiwa komanu vosi.

O KA MALAKO UVEYI KUENDA OLOFA

Omanu vosi koloneke vilo va vela kuenda va fa, pole, ovina viaco ka vi ka amamako. Suku lekuatiso liocisembi ca Yesu, o ka koka okuti, “wosi o kolela kokuaye ka nyõliwa, o kuata omuenyo ko pui.” (Yoano 3:16) Onima yipi yi keyililako?

Ovoveyi ka a ka kalako vali. “Layimue onungi yi popia yiti, Ndi vela. Kuenje omanu va tungamo va ecelua olohole viavo.”—Isaya 33:24.

Ka ku ka kala vali olofa. “O takisa olumue okufa, kuenje Ñala Yehova o puenya asuẽlẽla kovipala viosi.”—Isaya 25:8.

Omanu va ka kala otembo ka yi pui. “Ongavelo ya eciwa la Suku omuenyo ko pui vu Kristu Yesu Ñala yetu.”—Va Roma 6:23.

Ava va fa va ka pinduiwa. “Ku laika oku kala epinduko lia vakuesunga lava havakuesungako.” (Ovilinga 24:15) Ovo va ka kuatisiwavo leliangiliyo lia Suku liocisembi.

Suku o ka tẽlisa ndati ovina viaco?

 O KA TUMBIKA USOMA UMUE WA LIPUA

Suku o ka tẽlisa ocipango caye catiamẽla komanu kuenda kongongo lekuatiso liusoma wokilu okuti Soma yaco, Yesu Kristu. (Osamo 110:1, 2) Usoma waco, una Yesu a longisa kolondonge viaye oku likutilila ndoco: “A Isietu o kasi kilu . . . Usoma wove wiye.”—Mateo 6:9, 10.

Usoma wa Suku u ka lekisa unene poku malako ovitangi viosi kuenda ohali yi kasi voluali. Ocili okuti Usoma waco owo uviali wa velapo omanu va sukila oku kuata! Eli olio esunga lieci Yesu a kundila ‘olondaka viwa Viusoma,’ vokuenda kupange waye woku kunda palo posi kuenda wa sapuila olondonge viaye oku linga cimuamue.—Mateo 4:23; 24:14.

Yehova Suku omo liocisola a kuetele omanu, wa likuminya oku linga ovina viaco viosi vi komõhisa. Eci ka ci ku vetiya hẽ oku u kũlĩha kuenda oku kuata ukamba laye? Nda wa nõlapo oku ci linga, ci ka ku kuatisa ndati? Ocipama ci kuãimo ci ka lombolola ovina viaco.

NYE SUKU A KA LINGA KOVASO YOLONEKE? Suku o ka malako uveyi kuenda olofa, omanu vosi va ka kala vemehi Liusoma waye kuenda ongongo yi ka pongoluiwa ocumbo celau