Skip to content

Skip to table of contents

Olombangi Via Yehova

Select language Umbundu

Onduko ya Suku Helie?

Onduko ya Suku Helie?

Eci o yongola oku kũlĩha omunu umue, ocina catete o linga oku u pula ndoco: “Onduko yove helie?” Nda wa lingile epulilo eli ku Suku, eye nda wa tambulula ndati?

“Ame Yehova, oyo onduko yange”Isaya 42:8.

Anga hẽ yilo onjanja yatete wa yeva onduko eyi? Citava okuti onjanja yatete momo, valua vakuakupongolola Embimbiliya ka va tukula onduko ya Suku olonjanja vialua, ale ka va yi tukula Vambimbiliya amue. Olonjanja vimue onduko ya Suku va yi piñainya londuko yokuti, “ÑALA”. Pole, onduko ya Suku yi molẽha Vembimbiliya ci soka 7.000 kolonjanja. Kelimi lio Heveru onduko ya Suku yi sonehiwa lololetala vikuãla okuti, YHWH ale JHVH. Kelimi liumbundu onduko yaco yi sonehiwa okuti, “Yehova”.

Onduko ya Suku yi molẽha vovisonehua viosi vio Heveru kuenda yi sangiwa Vambimbiliya alua

Ociña Celivulu Liosamo ca Sangiwa ko Mar Morto Kocita Catete K.K., kelimi lio HEVERU

Embimbiliya Lia Pongoluiwa la Tyndale Kunyamo 1530, kelimi LIONGELESI

Embimbiliya Versão Reina-Valera yunyamo 1602, kelimi lio ESPANHOL

Union Version 1919, CHINESE

ESUNGA LIECI ONDUKO YA SUKU YI KUETELE ESILIVILO

Onduko ya Suku yi kuete esilivilo kokuaye. Lomue wa eca onduko yimue ku Suku, pole, eye muẽle wa nõla onduko yaye. Yehova hati: “Onduko yaco oyo yi linga onduko yange otembo ka yi pui, haiyo ovitumbulukila viosi vi njivalukila.” (Etundilo 3:15) Vembimbiliya onduko ya Suku yi molẽha olonjanja vialua okuti olonduko vikuavo ndeci, Ukuonene Wosi, Isia, Ñala kuenda Suku ci sule. Oyo yi molẽhavo olonjanja vialua okuti onduko yikuavo ndeci Avirahama, Mose, Daviti kuenda Yesu ci sule.[7] Handi vali, Yehova o yongola okuti onduko yaye yi kũlĩhĩwa. Embimbiliya li popia hati: “Oco va limbuka okuti ove, onduko yove Yehova, ove, lika wove, Tõlo koluali luosi.”—Osamo 83:18.

Onduko ya Suku yi kuete esilivilo ku Yesu. Vohutililo Yesu a longisa kolondonge viaye, wa tukula olondaka viokuti: “onduko yove yi sumbiwe.” (Mateo 6:9) Yesu wa likutililavo ndoco: “A Tate, muisa ulamba onduko yove.” (Yoano 12:28) Yesu wa velisilepo oku sivaya onduko ya Suku komuenyo waye. Eli olio esunga lieci a likutilila poku popia hati: “Nda va longisa onduko yove kuenda ndi yi longisa vali.”—Yoano 17:26.

Onduko ya Suku yi kuete esilivilo komanu vana vo kũlĩha. Afendeli va Suku kosimbu va kũlĩhĩle okuti, va sukilile oku kũlĩha onduko ya Suku oco va teyuiwe kuenda oku popeliwa. Embimbiliya li popia hati: “Onduko ya Yehova ocikolo ca pama, ukuesunga o tililamo  ha koki.” (Olosapo 18:10) “Kuenje vosi va tukula onduko ya Yehova va popeliwa.” (Yoeli 2:32) Embimbiliya li lekisavo okuti onduko ya Suku ya laikele oku kuatisa oku limbuka omanu vo vumba. Olio liti: “Omo olofeka viosi viendela, ofeka vonduko ya suku yayo, ofeka vonduko ya suku yayo, etu puãi tu endela ño-o hũ, oloneke ka vi pui, vonduko ya Yehova Suku yetu.”—Mika 4:5; Ovilinga 15:14.

OVINA TU LILONGISA LONDUKO YA SUKU

Onduko ya Suku yi situlula ovituwa viaye kuenda ovina eye a pondola oku linga. Olonoño vialua via limbuka okuti onduko Yehova yi lomboloka okuti, “Eye o Tẽlisa Ocipango Caye.” Yehova wa tu kuatisa oku kuata elomboloko lionduko yaye eci a vangula la Mose olondaka viokuti: “Ame Muẽle Ame.” (Etundilo 3:14) Omo liaco, onduko ya Suku yi lomboloka okuti eye o linga ovina vialua okuti, oku kala lika ululiki wovina viosi ci sule. Onduko Yehova yi lekisa unene a kuete woku koka okuti oviluvo viaye vi pondola oku kala ndomo eye a yongola oco a tẽlise ocipango caye. Olonduko vikuavo Suku a kuete, vi eca uvangi wokuti eye omunu umue ukuonene kuenda ka kuli omunu wa velapo okuti eye o sule. Pole, onduko Yehova oyo lika yi situlula ovituwa viaye kuenda oku linga ovina a yongola.

Onduko ya Suku yi lekisa okuti eye wa tu kapako. Onduko ya Suku yi lomboloka okuti eye o kuetele ocisola cocili oviluvo viaye, oku kongelamo omunu lomunu pokati ketu. Handi vali, Suku poku situlula onduko yaye, ci lekisa okuti o yongola oco tu u kũlĩhe. Eye wa situlula onduko yaye osimbu omunu umue ka sokoluile oku u pulisa onduko yaye. Eci ci lekisa okuti, Suku ka yongola oku tendiwa ndomunu umue o kasi ocipãla letu okuti ka citava oku u kũlĩha, pole o yongola oku tendiwa ndomunu umue o yongola oku kala ekamba lietu.—Osamo 73:28.

Eci tu tukula onduko ya Suku, tu lekisa okuti tu yongola oku kala akamba vaye. Sokolola ndu okuti o yongola oku linga ukamba lomunu umue kuenje o pinga oco a tukule onduko yove. Nda wa liyeva ndati nda eye o likala oku ci linga? Citava okuti vokuenda kuotembo ove o pula kokuaye nda o yongola muẽle oku kala ekamba liove. Cimuamue haico ci li pita la Suku. Eye wa sapuila onduko yaye komanu kuenda o tu vetiya oku yi tukula. Eci tu tukula onduko yaco, tu kasi oku lekisa ku Yehova okuti tu yongola oku kala ekamba liaye. Eye o limbuka eci omunu umue a “sokolola onduko yaye.”—Malakiya 3:16.

Oco tu kũlĩhe Suku, ci kuete esilivilo oku lilongisa catiamẽla konduko yaye. Pole, hacoko lika tu sukila oku linga. Tu sukila oku kũlĩha ovina vikuavo okuti onduko yaye ci sule. Tu sukilavo oku kũlĩha ovituwa viaye.

ONDUKO YA SUKU HELIE? Onduko ya Suku Yehova. Onduko yaco yi lomboloka okuti eye o pondola oku linga cosi a yongola oco a tẽlise ocipango caye