Skip to content

Skip to table of contents

Olombangi Via Yehova

Select language Umbundu

Embimbiliya Kuenda Elavoko Liove

Embimbiliya Kuenda Elavoko Liove

SOKOLOLA okuti o kasi oku linga ungende vonjila yimue mua tekãva kuteke. Ndaño okuti kua tekãva ale osimbu, ku litendi okuti wa nyelela, momo o kuete peka o lanterna yimue yi mihila ciwa. Eci o mihila posi, o mola cosi ci kasi ocipepi love. Kuenje nda wa yi suñamisa kovaso, ocinyi caco ci mihila kupãla vonjila o kasi oku endela.

Embimbiliya li sokisiwavo lo lanterna yaco. Ndomo tua konomuisa kovipama via pita, Embimbiliya li pondola oku tu kuatisa oku liyaka lovina vi kasi ocipepi letu okuti, ovitangi viosi vieteke leteke voluali lulo lua vĩha. Pole, Embimbiliya li tu kuatisavo kolonepa vikuavo. Olio li tu ĩha elavoko lio kovaso yoloneke, poku tu lekisa onjila tu sukila oku kuama oco tu kuate esanju liocili. (Osamo 119:105) Ndamupi?

Tu konomuisi olonjila vivali ndomo Embimbiliya li tu ĩha elavoko lio kovaso: 1 Li tu kuatisa oku kuata ocimãho komuenyo wetu kuenda 2 ndomo tu pondola oku kala akamba Vululiki wetu otembo ka yi pui.

OKU KUATA OCIMÃHO KOMUENYO

Oku kapako olonumbi Viembimbiliya viatiamẽla koku liyaka lovitangi vietu, ceca onima yiwa, momo olio helivuluko liaño. Olio li tu longisa okuti omuenyo wetu u kuete vali esilivilo okuti, ka tu sakalala lika lovitangi vietu. Poku ci linga oco lika omuenyo u kuata ocimãho cocili.

Kũlĩhĩsa handi onumbi eyi Yembimbiliya hati: “Esanju li tunda koku eca olio lia velapo, li tunda koku tambula li sule.” (Ovilinga 20:35) Ivaluka hẽ otembo yimue wa kuatisile umue wa sukilile ekuatiso lio ketimba? Ale pamue ceci wa liecele olumue koku yevelela ekamba liove lia kala oku situlula ovisimĩlo viaye viovutima? Wa liyeva hẽ ndati? Ocili okuti wa yeva esanju poku u kuatisa keteke liaco.

Tu yeva esanju lialua eci tu eca okuti ka tu lavoka oku tambula cimue. Usonehi umue wa lombolola hati: “Ca tĩla omunu oku lieca olumue okuti ka lavoka oku u tiuwila calua. Eci ci tẽliwa lika nda okuti omunu eca, pole ka lavoka onima.” Eci tu kuatisa vakuetu, ca piãla enene vana ka va kuete epondolo lioku tu tiuwila, ocili okuti tu tambula onima. Eci tu kuatisa vakuetu, tu kasi oku talavayela kumue Lululiki, una o li tenda ndu okuti o tu kuetele ofuka. (Olosapo 19:17) Eye o sanjukila cosi tu lingila vana va suka kuenda wa likuminya oku tu tiuwila omuenyo ko pui vocumbo celau palo Posi okuti, elavoko limue li sanjuisa hailio ka li sokisiwa.​—⁠Osamo 37:29; Luka 14:​12-14. *

Handi vali, Embimbiliya li tu longisa okuti tu pondola oku kuata ocimãho ca velapo komuenyo poku fendela Suku yocili, Yehova. Embimbiliya li tu vetiya oku eca kokuaye esivayo, ulamba kuenda epokolo eye a sesamẽla. (Ukundi 12:13; Esituluilo 4:11) Nda tu ci linga, tu sanjuisa Suku. Eci ocina cimue ci komõhisa! Eye o tu vetiya hati: “Kuata olondunge . . . sanjuisa utima wange.” (Olosapo 27:11) Sokolola ndoco: eci tu nõla lolondunge onjila tu kuama okuti ya kunamẽla Vembimbiliya, tu sanjuisa utima wa Isietu wo kilu. Momo lie? Momo eye o tu sole kuenda o yongola okuti tu kuatisiwa poku kuama olonumbi viaye. (Isaya 48:​17, 18) Esumũlũho lipi lia velapo tu pondola oku kuata lioku fendela Ombiali yoluali luosi, loku ambata omuenyo lonjila yimue yi sanjuisa utima waye?

OKU KALA EKAMBA LIULULIKI WETU

Embimbiliya li tu longisavo oku kala ekamba Liululiki wetu. Olio li popia hati: “Amẽli ku Suku kuenje eye amẽla kokuene.” (Tiago 4:⁠8) Pamue tu kuata atatahãi nda citava muẽle oku kala ekamba Liululiki ukuonene wosi. Pole, Embimbiliya li tu sapuila okuti nda tua “sanda Suku,” tu u “sanga,” momo “eye ka kasi ocipãla letu.” (Ovilinga 17:27) Elungulo Liembimbiliya lioku kala ekamba lia Suku li kuete esilivilo liocili kelavoko lietu. Ndamupi?

Sokolola ndoco: Lomue pokati ketu o tẽla oku seteka oku puluka kunyãli wa sulako okuti, kufa. (1 Va Korindo 15:26) Suku o kasi otembo ka yi pui. Eye lalimue eteke a ka fa kuenje o yongola okuti akamba vaye va kalavo otembo ka yi pui. Loku kuama olondaka via posoka haivio vi teta onimbu, Embimbiliya li tu sapuila eci Yehova a yongola hati: “Ovitima viene vi kale lomuenyo ko pui.”​—⁠Osamo 22:⁠26.

O pondola oku kala ndati ekamba lia Suku otembo ka yi pui? Amamako oku lilongisa eci catiamẽla kokuaye lekuatiso Liondaka yaye, Embimbiliya. (Yoano 17:3; 2 Timoteo 3:16) Pinga ekuatiso liaye oco o kuate elomboloko Liembimbiliya. Olio li tu sapuila okuti Suku o ka tu ĩha olondunge nda tu amamako oku u pinga lutima wosi. * (Tiago 1:⁠5) Likolisilako oku kapako eci wa lilongisa, loku ecelela okuti Ondaka ya Suku yi kala “ovela yolomai [viove],” kuenda “ocinyi cokonjila [yove]” cilo kuenda otembo ka yi pui.​—⁠Osamo 119:105.

^ tini. 8 Oco o sange alomboluilo akuavo atiamẽla kohuminyo ya Suku yomuenyo ko pui Vocumbo Celau, tanga ocipama 3 celivulu losapi hati, Embimbiliya li Pondola Oku tu Longisa Nye? lia sandekiwa Lolombangi Via Yehova.

^ tini. 13 Olombangi Via Yehova vi longisa Embimbiliya ocali okuti, li pondola oku ku kuatisa oku kuata elomboloko liwa Liondaka ya Suku. Oco o kũlĩhe ndomo elilongiso liaco li lingiwa, tala ovideo losapi hati, Nye ci Lingiwa Velilongiso Limue Liembimbiliya? Oco o sange ovideo yaco iñila vonumbi jw.org loku soneha osapi yovideo, kuenje sandiliya.

Suku o kasi otembo ka yi pui kuenje o yongola okuti akamba vaye va kalavo otembo ka yi pui