Skip to content

Skip to table of contents

Olombangi Via Yehova

Select language Umbundu

1 Ceci ci Kuatisa Oku Yuvula Ovitangi

1 Ceci ci Kuatisa Oku Yuvula Ovitangi

Embimbiliya li popia okuti alungulo alio a tunda ku Suku kuenda a “silivila koku tu longisa, koku tu pisa, koku suñamisa ovina.” (2 Timoteo 3:16) Anga hẽ olondaka evi viocili? Konomuisa ndomo olondunge Viembimbiliya via siata oku kuatisa omanu oku yuvula ovitangi vimue via tĩla, osimbu ovio ka via livokiyile.

UHOLUA

Cláudia, wa tukuiwa ale vocipama ca pita, wa kala oku nyua calua ovina vi koluisa oco a tepulule asakalalo aye. Embimbiliya ka li pisa oku nyua lonjila ya sunguluka. Pole, olio li popia hati: “Ku ka kale pokati koloholua.” (Olosapo 23:20) Uholua u koka ovitangi viuhayele, vi nyõla loku tepa ukamba kuenda unyamo lunyamo kua siata oku fa omanu valua. Ovitangi via tukuiwa ndeti, vi pondola oku yuvuiwa nda omanu va kuamele elungulo eli Liembimbiliya.

Cláudia oco a linga. Eye wa popia hati: “Nda limbuka okuti oku nyua evi vi koluisa ka via maleleko asakalalo ange. Nda kapako olondaka vi sangiwa ku Va Filipoi 4:​6, 7, viokuti: ‘Ko ka sakalali locina cimue, pole, . . . apingilo ene a kũlĩhĩwe la Suku.’ Uteke luteke eci ovisimĩlo lonjongole yaco vi livokiya, nda enda oku pinga ku Yehova. Ndo sapuila ovisimĩlo viange viosi, oku kongelamo onyeño, esumuo, ekambo lielavoko kuenda nda enda oku u pinga oco a ñuatise oku liyeva ciwa. Kuenje keteke likuavo nda enda oku likolisilako oco si ka kuate vali ovisimĩlo viaco vutima. Ocituwa coku likutilila ca ñuatisa oku tiamisila utima kovina nda kuatele, okuti kueci sia kuatele sio. Ombembua ndi kuete cilo ya velapo okuti si yongola oku yi pumba. Omo liaco, nda nõlapo oku liwekapo oku nyua evi vi koluisa.”

 EVĨHO LIUKAHONGA

Evĩho liukahonga ocina cimue ca siata oku koka evalo kutima kuenda esumuo lialua. Pole, olonumbi Viembimbiliya vi tu kuatisa oku yuvula vimue pokati kovitangi vi tuala kevĩho liukahonga ndeci, ocitiokoso kuenda umbondo. Umalẽhe umue o tukuiwa Samuel wa popia hati: “Ca leluka oku lekisa ocitiokoso. Olonjanja vimue ame sia lekasaile onjongole kufeko umue, pole, nda nda limbuka okuti eye o ndi sole, ca ñokaila vali oku linga ocitiokoso.” Samuel eci a limbuka okuti omanu va kala oku u lundila okuti wo linga ocitiokoso, osimbu okuti hacoko, noke wa nõlapo oku linga ocitiokoso kocipango. Pole, ocituwa caco ca kala oku u sakalaisa. Eye wa popia hati, “ocituwa caco ka ca sungulukile, momo nda fetika oku kuata epela.”

Samuel wa tanga ocipama cimue catiamẽla kamalẽhe, ca sandekiwa vonumbi yo Internet jw.org. Noke wa sokolola kolondaka Violosapo 20:​11, viokuti: “Ndaño omõla o limbukiwa kovilinga viaye, nda upange waye wa sunguluka haiwo wocili.” Eci co kuatisa ndati? Samuel wa limbuka okuti ocituwa caye cocitiokoso ka ca sungulukile. Kuenje wa popia hati: “Nda limbuka okuti nda umalẽhe umue o kuete ocituwa cocitiokoso, ka ka kala ohueli yiwa. Nda fetika oku sokolola okuti, nda nda kuatele ukãi, eye nda wa liyeva ndati poku ndi mola okuti ñasi oku linga ocitiokoso kukãi ukuavo. Eci ca ndi vetiya oku limbuka okuti ocituwa caco cĩvi. Ocili okuti, ka ca lelukile oku linga eci ca sunguluka.” Samuel wa siapo ocituwa caco. Oku yuvula oku linga ocitiokoso co kuatisavo oku yuvula evĩho liukahonga.

Antonio wa kala oku liyaka locitangi cimue cinene: Eye wa kuatele ocituwa coku tala omanu va linga umbondo. Ndaño okuti wa kuelele lukãi umue eye a solele calua, pole, ka tẽlele oku likandangiya oku tala ovina viaco. Eye wa popia okuti oku sokolola kolondaka vi sangiwa kukanda 1 Petulu 5:​8, co kuatisa calua. Ovio viti: “Lunguki, lavululi! Unyali wene Eliapu o ñuala ñuala ndohosi yi koma, oku sandiliya u a lia.” Antonio wa lombolola hati: “Oviluvialuvia viomanu va linga umbondo vi sangiwa kolonepa viosi violuali lulo kuenda ovio ka via lelukile oku viupa vutima. Ocinimbu caco ca ndi kuatisa calua oku sokolola catiamẽla kono yayonjo aco. Nda sukilile oku limbuka lonjanga okuti ono yoviluvialuvia viaco vĩvi, Eliapu. Cilo, nda kũlĩha okuti Yehova eye lika o pondola oku ndi kuatisa oku ‘lunguka loku lavulula’ oco ndi tẽle oku liyaka layonjo aco vovisimĩlo viange, vutima wange kuenda volohuela viange.” Antonio wa tambula ekuatiso kuenje wa siapo ocituwa caco cĩvi. Eci co kuatisa oku yuvula ovitangi vinene.

Tua limbuka okuti, Embimbiliya li kuete esilivilo kuenda li tu kuatisa oku yuvula ovitangi vinene. Pole, nye ci popiwa nda ocitangi cimue ci kasi oku amamako kuenda ka tu tẽla oku ci tila? Tu konomuisi ndomo Ondaka ya Suku yi pondola oku tu kuatisa oku tetulula ovitangi vina okuti via tĩla.

Olonumbi Viembimbiliya vi pondola oku tu kuatisa oku yuvula ovitangi vialua