Skip to content

Skip to table of contents

Olombangi Via Yehova

Select language Umbundu

Olonumbi Viembimbiliya vi Kuete hẽ Esilivilo Koloneke Vilo?

Olonumbi Viembimbiliya vi Kuete hẽ Esilivilo Koloneke Vilo?

OMANU VAMUE VA POPIA OKUTI SIO. Ndotolo umue wa popia okuti, oku kuama olonumbi Viembimbiliya oco vi tu songuile, ci sokisiwa loku kuama elivulu limue lia sonehiwa kunyamo 1920, oco li tu longise uloño wo química. Omunu umue citava okuti o lipula ndoco: Helie o kuama elivulu liolonumbi vio komputador yosimbu okuti ka yi kasiko vali oco a talavaye lo komputador yokaliye? Omanu vaco va tenda Embimbiliya ndelivulu limue ka li kuete esilivilo.

Momo lie omunu umue a kuamẽla olonumbi vielivulu limue liosimbu ndeci Embimbiliya, nda koloneke vilo kuli olonjila vialua vioku tambula olonumbi? Ocili okuti vo Internet muli ovipama viñi viñi vieca alungulo kuenda olonumbi vialua. Handi vali, vovipama vio Televisão mua siata oku eciwavo olonumbi violondotolo, violonoño kuenda viasonehi. Volovenda vialivulu mu landisiwa alivulu alua muna mu sangiwa olonumbi kuenje eci ca siata oku eca olombongo vialua ku vakualomĩlu.

Omo okuti kuli olonumbi vialua viokaliye vi kasi oku sandekiwa, momo lie ndi kuamẽla olonumbi Viembimbiliya, oco vi ndi songuile nda okuti, tunde eci lia malusuiwa oku sonehiwa pa pita ale ci soka 2.000 kanyamo? Anga hẽ omanu ka va sumbilile Embimbiliya, ka va kuete hẽ esunga poku popia okuti oku kuama olonumbi vielivulu limue liosimbu ci sokisiwa loku kuama olonumbi vielivulu vio komputador ale vielivulu lio quimica viosimbu? Pole, esokiso liaco ka lia sungulukile. Ukũlĩhĩso lulonoño u pongoloka lonjanga, pole, ekalo liomanu, sio. Omanu va yongola oku kuata ocimãho komuenyo, oku kuata esanju, oku kolapo, loku kuata akamba vawa kuenda epata lia sanjuka.

Embimbiliya ndaño liosimbu, pole, li lombolola eci catiamẽla kovina evi. Olio li popiavo okuti, Ondaka ya Suku. Li tu ĩha olonumbi violonepa vialua viomuenyo kuenda li tu kuatisa oku liyaka lovitangi vieteke leteke. (2 Timoteo 3:​16, 17) Handi vali, alungulo alio a kala otembo ka yi pui, lalimue eteke vi pita! Embimbiliya li popia okuti: “Ondaka ya Suku yi kasi lomuenyo.”​—⁠Va Heveru 4:⁠12.

Anga hẽ ovina evi viosi Embimbiliya li popia viocili? Li kuete hẽ esilivilo, ale elivulu lia velapo pokati kalivulu osi? Olio li pondola hẽ oku tu kuatisa komuenyo wetu? Utala owu Wondavululi owo etendelo liatete liovolandu a likasi. Owo, u ka ku kuatisa oku limbuka nda Embimbiliya handi li kuete esilivilo kokuetu koloneke vilo.