Skip to content

Olombangi Via Yehova

Select language Umbundu

 EKUATISO LIATIAMẼLA KEPATA | OLOHUELA

Ndomo tu Pamisa Ohuminyo Volohuela

Ndomo tu Pamisa Ohuminyo Volohuela

OCITANGI

Eteke wa kuela wa linga ohuminyo yimue. Omo liohuminyo yaco yolohuela, wa tambula ocikele vokuenda kuomuenyo wove wosi okuti, coku kala lomunu ove o sole kuenda oku tetulula ovitangi u ka kuata.

Vokuenda kuanyamo, oku lihoya pokati kene, kua tepulula ocisola cene volohuela. Omo liaco, ci kuete esilivilo oku kũlĩhĩsa nda handi wa kapako ohuminyo wa linga eci wa kuela

CECI O SUKILA OKU KŨLĨHA

Ohuminyo yolohuela yi sokisiwa lonjundo, okuti yamamako oku pamisa olohuela viove

Ohuminyo hacitangiko, pole, oku tetulula ovitangi. Omanu valua koloneke vilo ka va tava okuti ohuminyo volohuela yi kuete esilivilo lia velapo. Omanu vamue va tenda ohuminyo yaco ndelienge li kuta omunu omo lionjila ka ya sungulukile a nõla. Pole, tenda ohuminyo yolohuela ndonjundo, okuti yamamako oku pamisa olohuela viene. Ukãi umue o tukuiwa hati, Megan wa popia ndoco: “Amue pokati kasumũlũho oku kapako ohuminyo yetu, oku kũlĩha okuti ndaño wa lihoyi, pole, wa koleli okuti lomue pokati kene o ka siapo ukuavo.” * Oku kolela okuti olohuela ka vi kasi kohele ndaño kepuluvi limue liovitangi, ci kuatisa oku kuata ekalo liwa li ecelela oku tetulula ovitangi viene.—Tala okakasia losapi hati: “ Ohuminyo Kuenda Oku Kala Ukuacili.”

Olondaka Vioku Malusula: Nda o kasi oku liyaka lovitangi volohuela, yilo hatemboko yoku pembula esilivilo liohuminyo yolohuela, pole, epuluvi lioku pamisa ohuminyo yaco. Nye o sukila oku linga?

 CECI O SUKILA OKU LINGA

Kũlĩhĩsa ovisimĩlo viove: “Toke eci olofa vi tu tepa.” Olondaka evi vi ku vetiya hẽ oku sima okuti wa kutiwa, ale vi ku ĩha ekolelo liokuti wa kolapo? Eci kuiya ovitangi, anga hẽ ocisimĩlo cove coku tepa olohuela? Oco o pamise ohuminyo yolohuela, ci kuete esilivilo oku tenda olohuela ndocina cimue ka ci tepiwa pole camamako.—Onumbi Yembimbiliya: Mateo 19:6.

Ku ka yapuisiwe lovolandu avĩ. Ovisimĩlo viove viatiamẽla kohuminyo yolohuela citava okuti vi yapuisiwa lovina wa mola kolonjali viove. Ukãi umue o kuele o tukuiwa hati, Lea wa popia ndoco: “Olonjali viange via li nyãla eci nda kala handi omõla, kuenje ndi kuete usumba wokuti ocituwa caco, ci pondolavo oku nyõla ovisimĩlo ndi kuete viatiamẽla kohuminyo yolohuela.” Pole, citava okuti volohuela viove, o linga ovina via litepa. Ove ku kisikiwa oku kuama ovilinga vĩvi violonjali viove.—Onumbi Yembimbiliya: Va Galatia 6:4, 5.

Lunguka lovina o popia. Nda vu kasi oku lihoya calua, yuvula oku popia olondaka vina okuti noke o livela, ndeci: “Ngenda!” ale “Ndi ka sandiliya omunu umue wa ndi kapako!” Olondaka evi vi nyõla ohuminyo yolohuela, ovio ka vi tetulula ovitangi, pole, vi vokiya onjuela. O sukila oku yuvula olondaka vina vi sumũisa, pole, o pondola oku popia olondaka vimue ndeci: “Tala, kavali ketu tua tema. Nye tu sukila oku linga oco vosi yetu tu tetulule ocitangi caco?”—Onumbi Yembimbiliya: Olosapo 12:18.

Lekisa okuti wa kapako ohuminyo yolohuela. Kapa elitalatu liohueli yove kocitumãlo cove cupange. Popia ovina viwa viatiamẽla kolohuela viove. Nda o kasi oku linga ungende lika liove, sandiliya oku sapela lohueli yove votelefone oloneke viosi. Olonjanja viosi tukula olondaka viokuti “etu” kuenda olondaka viokuti, “ame kumue lukãi wange,” ale, “ame kumue lulume wange.” Poku ci linga, o ka ivaluisa omanu vakuavo kuenda ove muẽle okuti wa linga ohuminyo lohueli yove.

Sandiliya ongangu yiwa. Sanda olohueli via kuela osimbu, okuti via tẽla oku yula ovitangi viavo. O pondola oku va pula ndoco: “Nye ci lomboloka ohuminyo yolohuela kokuene? Ocituwa eci ca ku kuatisi ndati ndolohueli?” Embimbiliya li popia hati: “Ndeci utale u lepika utale, haico omunu a lepika omunu.” (Olosapo 27:17) Poku sokolola eci catiamẽla konumbi eyi, ka ca sungulukile hẽ kokuove oku pinga olonumbi komunu umue wa tẽla oku kuata olohuela viesanju?

^ tini. 7 Embimbiliya li ecelela okuti omunu umue o nyõla ohuminyo yaye yolohuela nda umue pokati kavo wa linga evĩho liukahonga. Tala ocipama losapi hati: “Onumbi Yembimbiliya Yatiamẽla Kukahokolo” vo Despertai! yilo.