Yuda 1:1-25

  • Ovilamo (1, 2)

  • Eyambulo lialongisi vesanda li tẽlisiwa (3-16)

    • Mingeli o lihoya Leliapu (9)

    • Ocitumasuku ca Enoke (14, 15)

  • Oku kala vocisola ca Suku (17-23)

  • Oku eca ulamba ku Suku (24, 25)

 Ame Yuda, ndukuenje wa Yesu Kristu, haime ndi manji a Tiago, ndi sonehela ava va kovongiwa haivo va soliwe la Suku Isia, okuti va popeliwa oco va kale kumue la Yesu Kristu:  Ohenda lombembua kuenda ocisola vi livokiye kokuene.  A vamanji wa soliwi, ndaño okuti nda likolisilako oku vu soneheli catiamẽla keyovo tua kakatela vosi, pole, nda nõlapo oku vu soneheli oco ndu vetiyi okuti vu yakela ekolelo lina lia eciwile onjanja yimosi kolosandu.  Nda ci sonehela momo alume vamue va iñila latutu pokati ketu okuti episo liavo lia sokiyiwa ale tunde osimbu Lovisonehua; ovo vakuakutomba Suku, haivo va pengisa ohenda ya piãla ya Suku oco ci va ĩhe evelo lioku lingainga umbondo* kuenje va sepula una okuti eye lika cime cetu, haeye Ñala Yesu Kristu.  Ndi yongola oku wivaluisi okuti, ndaño wa kũlĩhi ovina viosi tunde osimbu okuti Yehova wa popela omanu poku vopa vofeka Yegito, noke wa nyõla vana ka va lekisile ekolelo.  Kuenje ovangelo vana okuti ka va lavele ocikele cavo, pole, va siapo ovitumãlo viavo, eye wa va pongiyila oku kutiwa lalienge ka a pui vowelema wa piãla oco va sombisiwe keteke linene.  Haico ca pita lo Sodoma la Gomora kuenda alupale a lisungue lao, okuti a lieca kevĩho liukahonga* wa piãla loku tẽlisa oloñeyi vietimba lonjila yimue ka ya sungulukile; kuenje ovina viaco vi kasi ndelungulo kokuetu poku yambuiwa londalu ka yi pui.  Handi vali, alume vaco vovisimĩlo viavo viesanda va vĩhisa atimba kuenda va sepula uviali loku popia lãvi* vana va sumbiwa la Suku.  Pole, eci Mingeli ungelo unene a lipatãla Leliapu loku lihoyela etimba lia Mose, eye ka lukutile oku u pisa lolondaka viesepu, puãi wa popia hati: “Yehova a ku pise.” 10  Puãi ovo va sepula ovina viosi ka va kũlĩhĩle ciwa; kuenda kovina viosi va linga, va tuwa ndovinyama ka vi sokolola kuenje va linyõla ovo muẽle. 11  Ngongo yavo, momo va kuama onjila ya Kaini kuenda va yolokela koku lueya kua Baliame oco va kuate onima kuenje va nyõliwa omo liombangulo yesino ya Kora. 12  Alume vaco, va kasi lene povipito vu linga oco va lekise ocisola ku vamanji. Pole, ovo va sokisiwa lovawe a solekiwa kosi yovava, haivo angombo va litekula ovo muẽle okuti ka va kuete usumba; ovo alende ka a kuete ovava okuti ambatiwa lofela; oviti ka vimi apako votembo yaco,* haivio via fa luvali* kuenda via tukũiwa; 13  ovo akimba a tema okalunga okuti a tutuma efelefele liosõi yayo; haivo olombungululu vi tungayala, okuti via pongiyiwila owelema otembo ka yi pui. 14  Enoke okuti omunu wepanduvali kocitumbulukila ca Adama, wa imba owanji watiamẽla komanu vaco eci a popia hati: “Yehova weya lolohuluwa violosandu viaye,* 15  oco a pise vosi, loku yambula olondingaĩvi viosi omo liovilinga viavo vĩvi. Suku o ka ci linga omo lielinga liavo lĩvi. Ovo vakuakandu, ka vo sumbilile kuenda vo sepula.” 16  Alume vaco, vakuakulisiõsiõla haivo vakuakuliyeya omo liekalo liomuenyo wavo, loku tẽlisa oloñeyi viavo kuenje lomela wavo va popia olondaka vioku lipanda kuenda va sumbila omanu lombambe* oco va tambule cimue. 17  A vamanji wa soliwi, ivaluki olondaka viosi via sapuiwa ale* lovapostolo va Ñala yetu Yesu Kristu, 18  ndeci va ku sapowaili vati: “Koloneke via sulako kuiya vakuakupembula, loku kuama oloñeyi viavo vĩvi oco va linge ovina vi tomba Suku.” 19  Omanu vaco va linga olonepele, va tuwa ndovinyama,* haivo ka va kuete espiritu lia Suku. 20  Puãi a vamanji wa soliwi, osimbu vu lipamisa lekolelo liene li kola, loku likutilila lespiritu sandu, 21  kali vocisola ca Suku, osimbu vu lavoka ohenda ya Ñala yetu Yesu Kristu, yina yi tuala komuenyo ko pui. 22  Amamiko oku lekisa ohenda ku vana va kasi latatahãi; 23  va popeli poku vopa kondalu. Pole, amamiko oku lekisa ohenda ku vakuene, puãi ci lingi lusumba, osimbu vu suvuka uwalo wa vĩhisua letimba. 24  Ku una o tẽla oku vu teyuila okuti ka vu lilondoka, loku pua etondelo kovaso yulamba waye lesanju lialua, 25  okuti eye lika Suku haeye Upopeli wetu vonduko ya Yesu Kristu Ñala yetu, kokuaye ku kale ulamba, ekemãlo, unene, uviali tunde osimbu toke cilo kuenda otembo ka yi pui. Amene.

Footnotes

Ale, “ovilinga vi kutisa osõi.” Kelimi lio Helasi aselgeia. Tala Elomboluilo.
Tala Elomboluilo.
Lit., “ovo va popia atonãi.”
Lit., “otembo yokuenye.”
Ale, “via fa elisi.”
Ale, “ekũi liolohuluwa kolohuluwa.”
Ale, “oku komõha ovipala.”
Ale, “ovina via vanguiwa ale.”
Ale, “omanu vakuetimba.”