Va Roma 5:1-21

  • Oku linalisa la Suku omo lia Kristu (1-11)

  • Oku fa omo lia Adama, omuenyo omo lia Kristu (12-21)

    • Ekandu kuenda oku fa kua li sanduila komanu vosi (12)

    • Elinga limosi liesunga (18)

5  Omo cilo tua tendiwa ndavakuesunga mekonda liekolelo, tu kuati ombembua* la Suku vonduko ya Ñala yetu Yesu Kristu,  una okuti vokuaye tua tambula ohenda ya piãla omo liekolelo tu kuete cilo; kuenje tu sanjuki* omo lielavoko li tunda kulamba wa Suku.  Eci hacoko lika, pole, tu sanjuki* osimbu tu tala ohali, momo tua kũlĩha okuti ohali yi koka epandi;  epandi li koka oku taviwa la Suku; oku taviwa la Suku ku koka elavoko,  kuenda elavoko ka li tu sumuisa; momo ocisola ca Suku ca sukumuhila vovitima vietu omo liespiritu sandu lina lia tu ĩhiwa.  Momo osimbu ka tua kaile longusu, Kristu wa fila vakuakandu votembo ya sokiyiwa.  Momo umue o pondola oku fila omunu ukuesunga; handi vali, komunu umue uwa citava okuti umue u fila.  Pole, Suku wa lekisa ocisola caye kokuetu okuti osimbu tua kala vakuakandu, Kristu wa tu fila.  Omo cilo tua tendiwa ndavakuesunga omo liosonde yaye, tua yovuiwa konyeño ya Suku mekonda liaye. 10  Nda eci tua kala ovanyali, tua linalisa la Suku omo liolofa Viomõlaye, ca piãla enene cilo tua linalisa, tua yovuiwa mekonda liomuenyo waye. 11  Eci hacoko lika, tua sanjukilavo vu Suku vonduko ya Ñala yetu Yesu Kristu, una okuti vonduko yaye cilo tua tambula oku linalisa la Suku. 12  Ndeci ekandu lia iñila voluali omo liomunu umosi kuenda oku fa omo liekandu kuenje oku fa kua li sanduila komanu vosi momo vosi va linga ekandu—. 13  Momo ekandu lia kala voluali osimbu ka kua eciwile Ocihandeleko, puãi ekandu ka li tendiwa osimbu ka kuli ocihandeleko. 14  Kuenje, oku fa kua viala ndosoma tunde ku Adama toke ku Mose, ndaño ku vana ka va lingile ekandu ndeli lia Adama, una wa linga ocisetahãlo cu wa laikele oku iya. 15  Pole, ongavelo ka ya lisokele londando yoku lueya. Momo nda omo lioku lueya kuomunu umosi valua va fa, ohenda ya piãla ya Suku longavelo yaye yocali, ya supokaila ku valua omo liohenda ya piãla yomunu umosi okuti Yesu Kristu! 16  Ongavelo yocali kuenda ekandu omunu umosi a linga yi kuete onima ya litepa. Omo liekandu limosi omanu vosi va tendiwa okuti vakuakandu, pole, ongavelo yocali yeya omo liakandu alua, lia ecelela okuti omanu valua va tendiwa ndavakuesunga. 17  Nda omo liekandu liomunu umosi oku fa kua viala ndosoma mekonda liomunu waco, ca piãla enene vana va tambula ohenda ya piãla kuenda ongavelo yocali cesunga, va viala vomuenyo ndolosoma omo liomunu umosi, okuti Yesu Kristu! 18  Ndeci omo liekandu limosi omanu vosi va pisiwa, cimuamue haico, omo lielinga limosi liesunga omanu vosi va tendiwa ndavakuesunga oco va kuate omuenyo. 19  Ndeci valua va lingisua vakuakandu omo liesino liomunu umosi, cimuamue haico, omo liepokolo liomunu umosi valua va tendiwa ndavakuesunga. 20  Ocihandeleko ceya oku luisa ekandu. Pole, apa pali ekandu lialua ohenda ya piãla yaluapo vali. 21  Locimãho cipi? Ndeci ekandu kuenda oku fa via viala ndosoma, cimuamue haico, ohenda ya piãla yi viala ndosoma omo liesunga loku tuala komuenyo ko pui mekonda lia Yesu Kristu Ñala yetu.

Footnotes

Ale pamue, “tu kuete ombembua.”
Ale pamue, “tu yoleli.”
Ale pamue, “tu yoleli.”