Va Roma 4:1-25

  • Avirahama o tendiwa ndukuesunga omo liekolelo (1-12)

    • Avirahama, isia ya vana va kuete ekolelo (11)

  • Ohuminyo ya tambuiwa omo liekolelo (13-25)

4  Oco puãi, nye tu popia catiamẽla ku Avirahama kukululu yetu?  Nda Avirahama wa tendiwile ndukuesunga omo liovilinga, eye nda wa kuata esunga lioku lipanda, pole, ka lipandele kovaso a Suku.  Ocisonehua ci popia nye? “Avirahama wa kolela Yehova kuenje eci co tendiwila ndesunga.”  Kulume o talavaya, ofeto yaye ka yi tendiwa ndohenda ya piãla, pole, ndocina cimue a sesamẽla.*  Handi vali, u ka talavaya, pole, o kolela ku Una o tukula ondingaĩvi hati ukuesunga, ekolelo liaye li tendiwa ndesunga.  Ndeci Daviti a tukula esumũlũho liomunu Suku a tendela esunga ndaño ka kuete ovilinga hati:  “Va sumũlũha vana vakuakutomba ovihandeleko okuti ovilinga viavo vi ecelua kuenda akandu avo a tuvikiwa;*  wa sumũlũha omunu una okuti Yehova ka ivaluka ekandu liaye.”  Esumũlũho eli hẽ lia tukuiwila lika omanu va seviwa evamba, ale lava ka va seviwile evamba? Momo tu kasi oku popia tuti: “Eye wa tenda ekolelo lia Avirahama ndesunga.” 10  Vepuluvi lipi lia tendiwa ndesunga? Ceci a seviwa evamba, ale ceci ka seviwile evamba? Eye handi ka seviwile evamba, pole, wa kala ociyamba. 11  Eye wa tambula ondimbukiso—okuti, evamba—nduvangi* wesunga omo liekolelo a kuata osimbu ka seviwile evamba, okuti wa laikele oku kala isia ya vosi va kuete ekolelo osimbu ka seviwile evamba, oco Suku a va tendevo ndavakuesunga; 12  kuenda eye ka lingi lika isia ya vana va seviwa evamba, pole, o lingavo isia ya vana va kuama onjila yekolelo. Ekolelo lina isietu Avirahama a kuata osimbu ka seviwile evamba. 13  Avirahama ale ocitumbulukila* caye ka ca kuatele ohuminyo yokuti eye o kala kapiñala koluali omo liocihandeleko, pole, ca kala omo liesunga li tunda kekolelo. 14  Momo nda vana va kakatela kocihandeleko va linga vakapiñala, ekolelo ka li kuata esilivilo kuenda ohuminyo yimũha. 15  Ocihandeleko ci koka onyeño, pole, apa ka pali ocihandeleko ka pali oku sina. 16  Omo liaco, ekolelo li tiamisiwila kohenda ya piãla oco ohuminyo yi tẽlisiwe kocitumbulukila* caye cosi, okuti hakuvanako lika va kakatela Kocihandeleko, pole, la vana va kakatelavo kekolelo lia Avirahama isia ya vosi yetu. 17  (Ndeci ca sonehiwa citi: “Nda ku nõla oku linga isia yolofeka vialua.”) Oyo ya lingiwa kovaso a Suku, una eye a kolelele, haeye wa pindula ava va fa kuenda o tukula ovina ka via tẽlisiwile handi ndu okuti via tẽlisiwa ale.* 18  Ndaño ka kuatele elavoko, pole omo liekolelo wa lavokaile oku kala isia yolofeka vialua ndeci ca popiwile hati: “Ocitumbulukila* cove ci kalua.” 19  Eye ka tepulukile kekolelo ndaño wa tendele etimba liaye ndu okuti lia fa ale, (omo wa laikele oku tẽlisa 100 kanyamo) kuenda imo lia Sara laliovo lia kukile.* 20  Puãi omo liohuminyo ya Suku, ekolelo liaye ka lia tepulukile; pole, wa pama kekolelo kuenda wa muisa Suku ulamba, 21  loku kolela okuti Eye o tẽlisa eci a likuminya. 22  Kuenje “eci co tendiwila ndesunga.” 23  Olondaka viokuti, “eci co tendiwila” hayeko lika vio sonehiwila, 24  pole, via sonehiwilavo etu tu tendiwa, momo tua kolela Kokuaye una wa pindula Yesu Ñala yetu kuava va fa. 25  Eye wa pondiwa omo liakandu etu kuenda wa pinduiwa oco tu tendiwe ndavakuesunga.

Footnotes

Ale, “ndofuka.”
Ale, “oku ecelua.”
Ale, “ohuminyo; oku tava.”
Lit., “ombuto.”
Lit., “ombuto.”
Ale pamue, “oku lulika eci ka ca lulikiwile handi.”
Lit., “ombuto.”
Ale, “ka kuatele vali uyali.”