Va Roma 3:1-31

  • “Suku a limbukiwe okuti ukuacili” (1-8)

  • Ci kale va Yudea kuenda va Helasi va kasi vemehi liekandu (9-20)

  • Vakuesunga omo liekolelo (21-31)

    • Vosi va lipumbisa ulamba wa Suku (23)

3  Oco hẽ u Yudea wa velapo ndati, ale evamba li kuete esilivilo lie?  Ci kuatisa calua kolonepa viosi. Catete, ovo va kundikiwa olondaka vi kola via Suku.  Nye ci popiwa? Nda vamue ka va kuete ekolelo, anga ekambo liavo liekolelo li nyõla ocili ca Suku?  Sio, ka li ci nyõli! Suku a limbukiwe okuti ukuacili, ndaño omanu vosi olohembi, ndeci ca sonehiwa citi: “Oco o tendiwe ndukuesunga kolondaka viove kuenje eci o sombisiwa, o yula.”  Pole, nda ovilinga vietu vĩvi vi lombolola esunga lia Suku, tu popia nye? Anga Suku hokuesungako eci a lekisa onyeño yaye? (Ñasi oku popia ndeci ci popia omanu.)  Hacoko! Oco puãi, Suku nda o sombisa ndati oluali?  Pole, nda nda kemba kuenda uhembi wange u lekisa okuti eci Suku a popia ocili kuenje ci vetiya omanu oku u sivaya, momo lie Suku a nukuilavo okuti ndukuakandu?  Momo lie ka tu popela ndalume vamue va tu lundila okuti tua popia tuti, “Tu lingi eci cĩvi okuti ovina viwa viya?” Episo liomanu vaco lia sunguluka.  Nye ci popiwa? Anga tua velapo? Sio! Momo tua vanguile ale alundi vokuti ci kale va Yudea ci kale va Helasi, vosi va kasi vemehi liekandu; 10  ndeci ca sonehiwa citi: “Ka kuli ukuesunga, ndaño omunu umosi; 11  ka kuli umue ukualondunge; ka kuli omunu o sandiliya Suku. 12  Omanu vosi va yapuka, vosi yavo ka va silivila; ka kuli laumue o lekisa ocisola, ndaño umosi.” 13  “Angũli avo a soka leyambo li kasi upulule; va kemba kemba lalimi avo.” “Owule wolonyõha u kasi vemehi liolonjembu viavo.” 14  “Ovimẽla viavo vie yuka esiñalo loku lula.” 15  “Olomãhi viavo vi lupukila koku pesela osonde.” 16  “Volonjila viavo muli oku nyõleha lohali, 17  kuenda ka va kũlĩhĩle onjila yombembua.” 18  “Ka va kuete usumba la Suku.” 19  Cilo tua kũlĩha okuti ovina viosi via popiwa Vocihandeleko vi tiamisiwila kuava va kasi vemehi Liocihandeleko, okuti ovimẽla viavo vi munihiwa kuenje oluali luosi lu tetuluiwa la Suku. 20  Lomue* o tendiwa ndukuesunga kovaso aye omo lioku kuama ocihandeleko, momo oku kũlĩha ekandu ku tunda kocihandeleko. 21  Osimbu ka kua kaile ocihandeleko, esunga lia Suku lia situluiwa, ndomo ca imbiwa uvangi Locihandeleko kuenda Ovaprofeto, 22  okuti esunga lia Suku li sangiwa ku vosi va kuete ekolelo li tunda koku kolela Yesu Kristu. Momo ka kuli oku litepa. 23  Vosi va linga ekandu kuenje va lipumbisa ulamba wa Suku, 24  pole, locali va tendiwa ndavakuesunga omo liohenda ya piãla poku yovuiwa locisembi ca eciwa la Kristu Yesu. 25  Suku wo weca ndocilumba oco omanu va kuate ombembua Laye omo lioku kolela kosonde ya Kristu. Eci ca lingiwila oku lekisa esunga liaye, momo Suku wa kala oku lekisa epandi loku ecela akandu a lingiwa kosimbu. 26  Ca lingiwila oku lekisa esunga liaye koloneke vilo, oco a linge ukuesunga, haeye o tenda ukuesunga omunu wa kolela Yesu. 27  Oku lipanda ku kasi pi? Ka kuli evelo liaco. Ca tukuiwa locihandeleko cipi? Anga locihandeleko covilinga? Sio, te locihandeleko cekolelo. 28  Oco tu limbuke okuti omunu o tendiwa ndukuesunga omo liekolelo, pole, kovilinga viocihandeleko hakoko. 29  Suku hẽ, ya va Yudea lika? Ha Suku ya vakualofekakovo? Ocili muẽle, haeyevo Suku ya vakualofeka. 30  Omo Suku umosi lika, o tenda vakuevamba ndavakuesunga omo liekolelo kuenda ava ka va seviwile evamba o va tendavo ndavakuesunga omo liekolelo liavo. 31  Oco hẽ tua imula ocihandeleko omo liekolelo lietu? Hacoko! Pole, tua tõlisa ocihandeleko.

Footnotes

Lit., “omunu.”