Va Roma 15:1-33

  • Litambuli pokati ndeci Kristu a linga (1-13)

  • Paulu, ukuenje wa vakualofeka (14-21)

  • Esokiyo liovongende a Paulu (22-33)

15  Etu tua pama tu sukila oku pandikisa loku hongua kuava ka va pamele kuenda ka tu li kokela etu muẽle esanju.  Omunu lomunu pokati ketu, a sanjuise ukuavo kueci ciwa coku u kolisa.  Momo ndaño Kristu ka sandele oku tẽlisa onjongole yaye muẽle, pole, ca sonehiwa citi: “Ovina omanu va popia levi va linga oco va ku sepule, vieya kokuange.”  Momo ovina viosi via sonehiwa osimbu, via sonehiwila oku tu longisa, okuti omo liepandi lietu kuenda elembeleko li tunda Kovisonehua, tu kuata elavoko.  Suku una o tu lembeleka haeye o tu pamisa, a ecelele okuti omunu lomunu pokati kene a kuate ovisimĩlo vimuamue ndevi via Kristu Yesu,  okuti londaka* yimuamue vu sivaya Suku haeye Isia ya Ñala Yesu Kristu.  Litambuli pokati ndeci Kristu o tambuli, oco Suku a muisue ulamba.  Momo Kristu wa linga ukuenje wa vana va seviwa evamba oco va limbuke okuti Suku ukuacili kuenda va kũlĩhĩsa olohuminyo Eye a lingila ku vakukululu yavo,  okuti olofeka vi sivaya Suku omo liohenda yaye. Ndeci ca sonehiwa citi: “Hu sivayaila pokati ka vakualofeka, loku imbila onduko yove ovisungo.” 10  Eye wa popia vali hati: “Yoleli ene a vakualofeka, kumue lomanu vaye.” 11  Kuenda vali hati: “Sivayi Yehova ene a lofeka viosi kuenda omanu vosi vo sivaye.” 12  Isaya wa popiavo hati: “Ocikoti* ca Jese ciya, ku katuka umue o viala olofeka; vokuaye omo olofeka vi kuatela elavoko.” 13  Suku, una eca eca elavoko a ku yukisi lesanju lialua kuenda ombembua omo wa koleli kokuaye, okuti vu supoka lelavoko lunene wespiritu sandu. 14  A vamanji, ame muẽle nda kolela okuti weyuki ohenda, haene weyuki ukũlĩhĩso wosi kuenje vu tẽla oku lilungula* pokati. 15  Kuenje, ñasi oku vu soneheli atosi amue lutõi walua oku wivaluisi omo liohenda ya piãla ya nyĩhiwa la Suku, 16  okuti ndinga ukuenje wa Kristu Yesu kolofeka. Nda litumbika kupange u kola wolondaka viwa via Suku, okuti ombanjaile yolofeka evi yi taviwa kuenda yi kolisua lespiritu sandu. 17  Kuenje nda sanjuka omo ndi ndonge ya Kristu Yesu kuenda ñasi oku linga upange wa Suku. 18  Momo si yongola oku vangula cimue, te ovina Kristu a kasi oku lingila vonduko yange, oco vakualofeka va pokole omo liolondaka kuenda ovilinga viange, 19  lunene wolondimbukiso, lovikomo,* lunene wespiritu lia Suku, okuti nda kunda olondaka viwa viatiamẽla ku Kristu tunde ko Yerusalãi toke ko Iliriku. 20  Omo liaco, nda kuata ocimãho cokuti si kundila olondaka viwa kuna va yevele ale catiamẽla konduko ya Kristu, oco si ka tungile kociseveto comunu ukuavo; 21  puãi, ndeci ca sonehiwa citi: “Vana ka va tambuile esapulo liatiamẽla kokuaye, va ko kũlĩha kuenda vana ka va lo yeva, va ka kuata elomboloko.” 22  Eli olio esunga lieci sia tẽlele oku iya kokuene, ndaño olonjanja vialua nda yonguile oku ci linga. 23  Puãi cilo, vovaimbo a-a si kuete vali ocikanjo okuti sia kundililemo kuenda pa pita ale anyamo alua nda sokiya oku iya kokuene. 24  Omo liaco, ndi lavoka okuti eci ngenda ko Espanya, ndi lisanga lene okuti noke vu ndi sindikila naito vonjila. 25  Cilo ñasi oku enda ko Yerusalãi oku ka kuatisa olosandu. 26  Vana va kasi ko Makedonia, lo ko Akaya va sanjukila oku eca ombanjaile yimue yoku kuatisa olohukũi vi kasi pokati kolosandu ko Yerusalãi. 27  Ocili, ovo va sanjukila oku ci linga kuenda va va kuatelele ofuka; momo nda vakualofeka va eca ovina viavo via tunda ku Suku, ovo va sesamẽlavo oku kuatisa lovina viavo vietimba. 28  Eci ndi ci linga, loku eca ombanjaile* yaco kokuavo, oco mita noke kokuene oku enda ko Espanya. 29  Pole, ndi cĩ okuti eci ndiya kokuene, ndiya tupu nde yuka esumũlũho lia Kristu. 30  A vamanji, ndu pingi vu Ñala Yesu Kristu locisola ci tunda kespiritu, okuti vu kolisako kumue lame volohutililo viene ku Suku, oku liñutililako, 31  okuti mopelua kuava ka va tavele vo Yudea kuenda okuti upange ndingila va Yerusalãi u taviwavo lolosandu, 32  kuenje omo liocipango ca Suku, ndiya kokuene lonjolela oco ndi kavuluke kumue lene. 33  Suku una eca eca ombembua a kale lene vosi. Amene.

Footnotes

Lit., “omẽla.”
“Lit., olumbombo.’”
Ale, “oku longisa.”
Ale, “ovilimbu.”
Lit., “epako.”