Va Roma 14:1-23

  • Ko ka lipisi omunu lukuavo (1-12)

  • Ku ka kokele vakuele ocilondokua (13-18)

  • Oku kakatela kovina vi koka ombembua kuenda omunga (19-23)

14  Yekisi omunu ka pamele kekolelo kuenda ku ka patãle ovisimĩlo viaye.  Umue ekolelo liu wecelela oku lia ovina viosi, pole, u wa hongua, o lia lika olombi.  Omunu o lia ka ka pembule u ka li kuenda u ka li, ka ka pise una o lia, momo Suku wo tambula.  Ove elie okuti o pisa ukuenje wamãle? Ku cime caye eye o talama, ale o kupuka. Pole, eye o talamisua, momo Yehova o tẽla oku u talamisa.  Omunu umue o tenda eteke limue okuti lia velapo, oloneke vikuavo vi sule; pole, omunu ukuavo o tenda oloneke viosi okuti via lisoka; omunu lomunu a tave okuti ovina a kolela via sunguluka.  U o tenda eteke limue okuti lia velapo, a li tende ndu okuti lia velapo ku Yehova. U o lia ovina viosi a ci lingile oku kemainya Yehova, momo wa eca olopandu ku Suku. Una o lia lika olombi, a ci lingilevo oku kemainya Yehova, momo wa eca olopandu ku Suku.  Lomue pokati ketu o kasi lomuenyo oco a likemainye eye muẽle kuenda lomue o fa oco a likemainye eye muẽle.  Momo nda tu kasi lomuenyo, tu kasi lawo oco tu sivaye Yehova kuenda nda tu fa, tu fa oco tu sivaye Yehova. Ci kale nda tu kasi lomuenyo ale tu fa, tua tiamẽla ku Yehova.  Omo liaco, Kristu wa fa kuenda o kasi vali lomuenyo oco a linge Ñala yava va fa, lava va kasi lomuenyo. 10  Momo lie o pisila manjove? Pamue nye o pembuila manjove? Momo vosi yetu tu ka talama komangu yekanga lia Suku. 11  Momo ca sonehiwa citi: “‘Ndeci ñasi lomuenyo,’ oco Yehova a popia, ‘olongolo viosi vi ñekamẽla kuenda alimi osi a ka limbuka okuti ame Suku.’” 12  Suku o ka sombisa omunu lomunu pokati ketu ndeci ci soka lovilinga vietu. 13  Omo liaco, ka tu ka lipisi pokati, puãi yuvuli oku kapela ocilondokua manji umue. 14  Nda kũlĩha kuenda ñolela vu Ñala Yesu okuti lacimue ci livĩhisa oco muẽle; te lika eci omunu a tenda ocina cimue okuti ca vĩha, kokuaye oco ca vĩha. 15  Nda okuti omo liokulia o sumuisa manjove, ku kasi oku endela vocisola. Ku ka nyõle lokulia kuove una Kristu a fila. 16  Ko ka lingi ovina vu sima okuti viwa, pole, vi kokela omanu oku ku popi lãvi. 17  Momo Usoma wa Suku ka u lomboloka okulia loku nyua, pole, u lomboloka esunga, ombembua kuenda esanju lespiritu sandu. 18  Kuenje wosi o kuete ovituwa evi, haeye upika wa Kristu, o taviwa la Suku kuenda lomanu. 19  Tu kakateli kovina vi koka ombembua kuenda kovina vioku likuatisa pokati. 20  Ku ka nyõle upange wa Suku omo liokulia. Ocili, ovina viosi via yela, pole, eci omunu a lia kuenje o kokela vakuavo ocilondokua, cĩvi. 21  Ka ca sungulukile oku kokela manjove ocilondokua omo lioku lia ositu, oku nyua ovinyu, ale oku linga ocina cikuavo. 22  Ekolelo o kuete, li kale pokati kove la Suku. Omunu una ka lipisila ovina a tava, wa sumũlũha. 23  Pole, omunu waco nda o kasi latatahãi kuenje o lia, wa pisiwa ale, omo ka kasi oku lia lekolelo. Momo cosi ka ci tiamisiwila kekolelo, ekandu.

Footnotes