Va Roma 12:1-21

  • Eci atimba ene ndocilumba ci kasi lomuenyo (1, 2)

  • Olongavelo via litepa pole, etimba limosi (3-8)

  • Alungulo Kakristão vocili (9-21)

12  A vamanji, ndu pingi lohenda ya Suku, okuti weci atimba ene ndocilumba ci kasi lomuenyo, ci kola, haico ci taviwa la Suku, okuti upange u kola kuenda uloño wene woku sokolola.  Ko ka setukuli ovituwa violuali lulo,* puãi pongololi ovisimĩlo viene okuti vu limbuka ndeci ci kasi ocipango ca Suku okuti ciwa, ca sunguluka kuenda ca pua eko.  Momo omo liohenda ya piãla nda tambula, ndu sapuili vosi pokati kene okuti, ko ka simi okuti wa velipo, vakuene va sule, pole, sokololi oco vu kuati olondunge, ndomo Suku a eca* ekolelo komunu lomunu.  Ndeci etu tu kuete etimba limosi lovimatamata vialua, pole, ovimatamata viaco ka vi lingi upange umuamue,  haico, ndaño tualua haimo tutimba limuamue vu Kristu kuenda tuvimatamata vi likuatisa pokati.  Omo okuti omunu lomunu o kuete olongavelo via litepa ndomo via tu ĩhiwa lohenda ya piãla, nda oku imba owanji, tu imbi owanji ndeci ca soka lekolelo va tu ĩha;  nda upange u kola, tu lingi upange waco; ale una o longisa, a litumbike koku longisa kuaco;  una o vetiya,* a vetiye;* una eca,* a ece lutima wosi; una o songola,* a ci linge lombili;* una o lekisa ohenda, a ci linge lesanju.  Ocisola cene ka ci ka kale combambe. Suvuki eci cĩvi; kakateli kueci ciwa. 10  Lisoli lutima wosi ndomunu la manjaye. Koku sumbila, velisipo vakuene.* 11  Lingi vakuopange,* ko ka kali vakuawesi.* Eceleli okuti espiritu sandu liu vetiyi oku kuata ombili. Vumbi Yehova ndapika. 12  Sanjuki omo lielavoko liene. Pandikisi kohali. Pandikisi lolohutililo. 13  Kuatisi olosandu lovina vu kuete. Kuati ocituwa coku yekisa akombe. 14  Sumũlũisi ava vo lambalali; sumũlũisi, oku siñala hacoko. 15  Yoleli lava va yolela; lili lava va lila. 16  Tendi vakuene ndeci vu li tenda ene muẽle; yuvuli ovisimĩlo vioku livelisapo,* pole, kuati ocituwa coku lisuluvika. Ko ka lilekisi okuti wakualondunge kovaso ene muẽle. 17  Ko ka fetuluinyi umue cĩvi leci cĩvi. Lingili eci ciwa omanu vosi.* 18  Nda citava, kali vakuambembua lomanu vosi. 19  Akuetu wa soliwi, ko ka fetuluinyi, efetuluinyo li kale konyeño ya Suku; momo ca sonehiwa citi: “‘Efetuluinyo liange; ame fetuluinya,’ oco Yehova a popia.” 20  Pole, “nda unyali wove o kasi lonjala, u wĩha coku lia, nda o kasi lenyona, u wĩha cimue coku nyua; momo poku ci linga o lundika akala ondalu ponumbutue yaye.”* 21  Ku ka yuliwe leci cĩvi, puãi eci cĩvi ci yula leci ciwa.

Footnotes

Ale, “koloneke vilo.” Tala Elomboluilo.
Ale, “oku tepaisa; oku avela.”
Ale, “oku lungula.”
Ale, “elungulo.”
Ale, “oku kuatisa.”
Ale, “oku pita kovaso.”
Ale, “lutima wosi.”
Ale, “oku pita kovaso.”
Ale, “vakuambili.”
Ale, “Ko ka cilui kovina viene.”
Ale, “ovisimĩlo viepela.”
Ale, “kovaso.”
Okuti, oku tulumula onyeño yomunu, kuenda oku tepulula oku tĩlisa kutima waye.