Va Roma 10:1-21

  • Ndomo tu kakatela kesunga lia Suku (1-15)

    • Oku sapula ondaka (10)

    • Oku likutilila ku Yehova ci lomboloka epopelo (13)

    • Olomãhi viava va kunda via posoka (15)

  • Olondaka viwa ka vi taviwa (16-21)

10  A vamanji onjongole yange yovutima leci ndi va pingilako ku Suku, yeci okuti ovo va popeliwa.  Momo ndi va imbila uvangi wokuti va kuete ombili yoku vumba Suku, pole, ka va ci lingi lukũlĩhĩso wa suapo.  Momo ka va kũlĩhĩle esunga lia Suku, pole, va sanda oku litumbikila esunga liavo muẽle, ka va pokola kesunga lia Suku.  Momo Kristu eye esulilo Liovihandeleko, okuti wosi u kolela o sanga esunga.  Mose wa soneha eci catiamẽla kesunga li tunda Kocihandeleko okuti: “Omunu wosi o tẽlisa ovina viaco, o muila omuenyo kokuavio.”  Pole, esunga li tunda kekolelo li popia liti: “Ku ka vangule vutima wove huti, ‘Helie o londa kilu?’ ci lomboloka oku kopa Kristu,  ale, ‘Helie o lokila vekungu?’ ci lomboloka oku kopa Kristu kuava va fa.”  Oco hẽ nye ci popiwa? “Ondaka yi kasi ocipepi love, vomẽla wove kuenda vutima wove”; yi lomboloka “ondaka” yekolelo tu kasi oku kunda.  Momo nda o sapula ondaka lomẽla wove okuti, Yesu eye Ñala, loku kolela lutima wove okuti Suku wo pindula kuava va fa, o popeliwa. 10  Momo lutima omunu o lekisa ekolelo li tuala kesunga, puãi lomẽla o sapula ondaka yi tuala kepopelo. 11  Ocisonehua ci popia citi: “Lomue o kolela kokuaye okuti o sumua.” 12  Momo ka pali oku litepa pokati ku Yudea lu Helasi. Kuli lika Ñala umosi wa vosi, una eca* asumũlũho alua ku vosi vo vilikiya. 13  “Wosi o likutilila vonduko ya Yehova loku pinga ekuatiso, o popeliwa.” 14  Pole, va likutilila ndati kokuaye nda ka vo kolelele? Va kolela ndati u ka va la yeva? Va yeva ndati nda ka kuli u o kunda? 15  Va kunda ndati nda ka va tumiwile? Ndomo ca sonehiwa citi: “Olomãhi viava va kunda olondaka viwa viovina viwa, via posoka cimue!” 16  Puãi havosiko va pokola kolondaka viwa. Momo Isaya wa popia hati: “A Yehova helie wa kolela kueci va yeva kokuetu?”* 17  Ekolelo li tunda kueci ca yeviwa. Kuenje eci ca yeviwa ci tunda koku kunda ovina viatiamẽla ku Kristu. 18  Kuenje nda pula hati, Ci lomboloka hẽ okuti ka va yevele esapulo? Sio, hacoko, “omanu vo kolonepa viosi violuali va li yeva kuenda vana va kasi kovitumãlo kupãla violuali va yevavo esapulo liaco.” 19  Puãi nda pula hati, Anga hẽ ci lomboloka okuti va Isareli ka va ci kũlĩhĩle? Sio, hacoko, ovo va ci kũlĩha. Tete Mose wa popia hati: “Ndu muisi ukuse wava havakuafekako; ndi va lingisa onyeño lomanu aveke.” 20  Pole, Isaya wa sapula olondaka via Suku lutõi hati: “Nda sangiwa la vana ka va ndi sandele; nda lisituluila kuava ka va mulisile.” 21  Catiamẽla ku va Isareli eye wa popia hati: “Eteke liosi ­ndolũila ovoko ange komanu vakuesino haivo vakualonamalala.”

Footnotes

Ale, “ukuacali.”
Ale, “kesapulo lietu?”