Va Galatia 6:1-18

  • Oku liambatisako ovilemo (1-10)

    • Eci ci kũliwa haico cu unguiwa (7, 8)

  • Evamba okuti ka li kuete esilivilo (11-16)

    • Ocina cokaliye ca lulikiwa (15)

  • Oku malusula (17, 18)

6  A vamanji, nda umue wa linga ekandu limue okuti eye ka ci limbukile, ene wa pami kespiritu pengululi omunu waco lumbombe. Pole, lunguka sanga ove muẽle o yonjiwavo.  Liambatisiko ovilemo viene kuenje poku ci linga vu tẽlisa ocihandeleko ca Kristu.  Momo nda umue o sima okuti wa velapo, osimbu ka velelepo, o likemba eye muẽle.  Omunu lomunu a kũlĩhise ovilinga viaye muẽle kuenje o kuata esunga lioku sanjuka, haloku lisokisako lomunu ukuavo.  Momo omunu lomunu ambata ocitele caye.  Wosi o longisiwa ondaka ya Suku, a litepele ovina viosi viwa la una o longisa.  Ko ka kembiwi: Suku ka tombiwa. Momo eci omunu a kũla, haico ongula;  u o kũla loku sokolola oloñeyi vietimba, ungula oku nyõleha kuetimba liaye, pole, una o kũla loku sokolola kovina viespiritu ungula omuenyo ko pui u tunda kespiritu.  Puãi ka tu ka liwekipo oku linga eci ciwa, omo tu ungula votembo ya sokiyiwa nda ka tua konyõhele. 10  Kuenje osimbu tu kuete epuluvi tu lingi eci ciwa komanu vosi, ca piãla enene ku vamanjetu vekolelo. 11  Tali ovikanda vinene ndo soneheli leka liange muẽle. 12  Vosi vana va yongola oku komõhisa vakuavo leposo lio ketimba, va seteka oku vu vetiyi oku seviwa evamba, loku ci lingila lika oco va yuvule oku lambalaliwa luti wekangiso wa Kristu. 13  Ndaño vana va seviwa evamba, ka va pokola Kocihandeleko, puãi va yongola okuti ene vu seviwa evamba oco ovo va kuate esunga lioku lipandela etimba liene. 14  Pole, ame si yongola oku lipanda, te lika oku lipandela uti wekangiso wa Ñala yetu Yesu Kristu, una okuti vonduko yaye oluali lu fila kovaso ange kuenda ame ndi fila kovaso oluali. 15  Momo evamba kuenda uyamba ka vi kuete esilivilo, te lika ocina cokaliye Suku a lulika. 16  Vosi va kapako onumbi eyi komuenyo wavo, kokuavo ku kale ombembua kuenda ohenda, momo va panga onepa ku Isareli ya Suku. 17  Oku upisa cilo, lomue ka ka sakalale vali lame, momo ondimbukiso ñuete yi lekisa okuti ndupika wa Yesu. 18  A vamanji, ohenda ya piãla ya Ñala yetu Yesu Kristu yi kale vovitima viene. Amene.

Footnotes