Va Galatia 5:1-26

  • Elianjo Liakristão (1-15)

  • Oku endaenda lespiritu (16-26)

    • Ovilinga vietimba (19-21)

    • Epako liespiritu (22, 23)

5  Kristu wa tu yovola omo lielianjo liaco. Omo liaco, talami ngõ kuenda ene muẽle ko ka kali vali vupika.  Ame ndi Paulu ndu sapuili okuti nda wa seviwi evamba, eci Kristu a siata oku linga ka cu kuatisi.  Njimba vali uvangi kalume vosi va seviwa evamba okuti va sukila oku amamako oku pokola Kocihandeleko cosi.  Ene vosi wa tepiwi ku Kristu, eci vu seteka oku tendiwa ndavakuesunga omo liocihandeleko; wa konyohi kohenda yaye ya piãla.  Etu puãi omo liespiritu, tu lavoka esunga li tunda kekolelo.  Momo ku Kristu Yesu, evamba kuenda uyamba ka vi kuete esilivilo, te ekolelo li talavaya locisola.  Ene wa kaili oku enda ciwa vonjila yocili. Helie wo tateki oku amamako oku pokola kocili?  Etateko liaco ka lia tundile ku Una wo kovongi.  Etumbisa litito li tumbisa osema yosi ya tamiwa. 10  Nda kolela okuti ene vu kasi vomunga kumue la Ñala, ka vu simi ovina via litepa; pole, una o vu sakalaisi nda elie, nda elie, o tambula eyambulo a sesamẽla. 11  A vamanji, nda ame handi ndi kunda evamba, momo lie ndi lambalaliwila? Nda oco, ewe li koka ocilondokua cuti wekangiso lia nyõliwa. 12  Ndi yongola okuti vana va seteka oku vu sakalaisi, va livete ovo muẽle. 13  Ene a vamanji wa kovongiwili elianjo; ko ka tendi elianjo liaco ndepuluvi lioku tẽlisa olonjongole vietimba, puãi livumbi pokati locisola. 14  Momo Ocihandeleko cosi ca tẽlisiwila vondaka yimuamue yokuti: “Sola ukuẽle ndeci o lisole ove muẽle.” 15  Nda pokati kene vu lihoyisa loku liundumuhila, lunguki sanga vu linyõla pokati. 16  Pole, ndu sapuili siti, endaendi lespiritu oco ka vu ka tẽlisi olonjongole vietimba. 17  Etimba li yaka lespiritu omo liolonjongole vialio kuenda espiritu li yaka letimba; ovio vi linyãle, omo liaco, ko ka lingi ovina viosi vu yongola oku linga. 18  Nda vu songuiwa lespiritu, ka wu kasi vemehi liocihandeleko. 19  Ovilinga vietimba vi molẽha, vievi: evĩho liukahonga, eliño, umbondo, 20  efendelo lioviteka, umbanda, esuvu, ema, ocipululu, onyeño yalua, olonamalala, olonepele, oku kuama alongiso omanu, 21  onya, ovoholua, ayele, lovina via lisoka lavio. Ndu lunguli kovina evi, ndeci ndo lunguili ale okuti vana va lingainga ovina viaco ka va piñala Usoma wa Suku. 22  Puãi epako liespiritu lieli, ocisola, esanju, ombembua, epandi, esunga, ohenda, ekolelo, 23  umbombe kuenda oku likandangiya. Ka kuli ocihandeleko ci patãla ovina evi. 24  Pole, vana va tiamẽla ku Kristu Yesu va valela etimba liavo kuti kumue lolonjongole kuenda oloñeyi vialuo. 25  Nda tu songuiwa lespiritu, tu endaendivo lespiritu. 26  Ka tu ka kali vakuakulipanda, oku likuatela ocipululu kuenda oku livela ovina viamãle.

Footnotes