Va Galatia 3:1-29

  • Oku litepa kuoku kuama Ocihandeleko kuenda ekolelo (1-14)

    • Ukuesunga o muila omuenyo kekolelo (11)

  • Ohuminyo ya lingiwa ku Avirahama Halocihandelekoko (15-18)

    • Ocitumbulukila ca Avirahama, Kristu (16)

  • Koku kua tunda Ocihandeleko kuenda ocimãho calio (19-25)

  • Omãla va Suku omo liekolelo (26-29)

    • Ocitumbulukila ca Avirahama, vana va tiamẽla ku Kristu (29)

3  Ene a va Galatia waveke! Helie wo yapuisi, anga Yesu Kristu wa lekisiwa kovaso ene poku valeliwa kuti?  Eci oco ndi yongola oku vu puli: Wa tambuli espiritu omo lioku kuama ocihandeleko, ale omo lioku kolela kueci wa yevi?  Anga waveke? Noke yoku fetika oku enda lekuatiso liespiritu lia Suku, vu endela vetimba?  Wa tali ño ohali yalua olivova? Pamue eci ca lingiwa ño olivova.  Una u wĩhi espiritu haeye o linga ovikomo pokati kene, o ci lingila omo lioku kuama ocihandeleko, ale omo liekolelo kueci wa yevi?  Ndeci, Avirahama “wa kolela Yehova kuenje wo tenda ndukuesunga.”  Ene wa kũlĩhi okuti vana va kuete ekolelo ovo omãla va Avirahama.  Ocisonehua ca popele okuti Suku o tenda omanu vakualofeka ndavakuesunga omo liekolelo kuenda kua sapuiwa olondaka viwa ku Avirahama okuti: “Omanu vosi voluali va ka sumũlũhĩla vonduko yove.”  Pole, vana va kuete ekolelo, va sumũlũhĩla kumue la Avirahama, una wa kuata ekolelo. 10  Vosi va kuama ocihandeleko, va siñaliwa, momo ca sonehiwa citi: “Omunu wosi ka lingi ovina via sonehiwa velivulu Liocihandeleko haeye ka vi pokola, wa siñaliwa.” 11  Ocili okuti lomue o tendiwa la Suku ndukuesunga omo liocihandeleko, momo “ukuesunga o muila omuenyo kekolelo.” 12  Pole, Ocihandeleko ka ci tiamẽla kekolelo. Momo “wosi o tẽlisa ovina viaco, o muila omuenyo kokuavio.” 13  Kristu wa tu landa loku tu yovola kesiñalo Liocihandeleko poku tu siñaliwila, momo ca sonehiwa citi: “Omunu wosi wa valeliwa kuti, wa siñaliwa.” 14  Eci ca lingiwa oco esumũlũho lia Avirahama liyevo ku vakualofeka mekonda lia Kristu Yesu, okuti tu tambula espiritu sandu Suku a likuminya oku eca omo liekolelo lietu. 15  A vamanji, mopia ndomo omanu va popia popia okuti: Ndeci ocisila ca lingiwa ale, ndaño ca lingiwa lomunu, lomue o tẽla oku ci imula ndaño oku ci vokiya. 16  Cilo olohuminyo via lingiwa ku Avirahama kuenda kocitumbulukila caye. Ka via popele viti, “kuenda kovitumbulukila viove,” ndu okuti vialua. Pole, yi popia yiti, “kuenda kocitumbulukila cove,” okuti umosi, Kristu. 17  Eci ñasi oku popia ceci okuti: Ocihandeleko cina ca eciwa 430 kanyamo konyima, ka ci nyõli ocisila ca lingiwa ale la Suku, okuti ci imũla ohuminyo. 18  Nda ocipiñalo catiamẽla kocihandeleko, ka ci tiamẽla vali kohuminyo; puãi Suku locisola wa ceca ku Avirahama omo liohuminyo. 19  Ocihandeleko hẽ ceyilila nye? Ceyilila oku situlula ovina vĩvi omanu va lingaile, toke eci ocitumbulukila ceya ku yuna ohuminyo ya lingiwila; kuenda Suku wa eca ocihandeleko kovangelo kuenje va ci sapula vonduko ya kapitiya. 20  Cilo ka kuli kapitiya nda mua kongela lika omunu umosi, pole, Suku umosi lika. 21  Oco hẽ, Ocihandeleko ci patãla olohuminyo via Suku? Hacoko! Nda okuti kua eciwile ocihandeleko ci muisa omuenyo, esunga nda lia tunda kocihandeleko. 22  Pole, Ocisonehua ca eca ovina viosi kupika wekandu, okuti ohuminyo yi tunda koku kolela Yesu Kristu yeciwa ku vana va kuete ekolelo. 23  Osimbu ekolelo ka lieyile, tua kala vemehi liocihandeleko, tua teyuiwa laco loku lavoka ekolelo lia laikele oku situluiwa. 24  Tua laviwa Locihandeleko oku tu tuala ku Kristu, okuti tu tendiwa ndavakuesunga omo liekolelo. 25  Cilo omo ekolelo lieya, ka tu laviwa vali. 26  Vosi yene vumãla va Suku omo liekolelo liene vu Kristu Yesu. 27  Momo nda vosi yene wa papatisiwi vu Kristu, vu kuete ovituwa ndevi via Kristu. 28  Ka pali oku litepa pokati ku Yudea lu Helasi, ale kupika lomunu wa yovoka, ulume ale ukãi; momo vosi yene wa lingi umuamue vu Kristu Yesu. 29  Omo liaco, nda wa tiamẽli ku Kristu, vucitumbulukila ca Avirahama kuenda vukapiñala kohuminyo.

Footnotes