Va Galatia 2:1-21

  • Paulu o lisanga lovapostolo ko Yerusalãi (1-10)

  • Paulu o vetela evelo Petulu (Kefa) (11-14)

  • Oku tendiwa ndavakuesunga omo liekolelo (15-21)

2  Kuenje eci pa pita ci soka 14 kanyamo nda lamanela vali ko Yerusalãi kumue la Barnaba kuenda nda ambatavo Tito.  Nda lamanelako omo liesituluilo lia tunda kilu kuenje nda va sapuila olondaka viwa ñasi oku kundila pokati ka vakualofeka. Eci ca pita vohongele ya lingiwa la vana va songola ekongelo, okuti upange ñasi oku linga lowu nda linga ale, ka u lingi wolivova.  Pole, Tito, una wa kala lame, ka kisikiwile oku seviwa evamba ndaño eye u Helasi.  Eci ca lingiwa omo lia vamanji vamue vesanda va iñila uyombeki oco va sange onjila yoku nyõla elianjo tu kuete vu Kristu Yesu, okuti va tu lingisa apika;  puãi ka tua tavele ndaño naito kondaka yavo, okuti ocili colondaka viwa camamako lene.  Pole, ku vana va litendele okuti va velapo—ndomo va kala kosimbu, kokuange hacimueko, momo Suku ka vanji kemolẽho liomunu—omo alume vaco va kemãla, ka va ndi sapuilile lacimue cokaliye.  Puãi eci va mola okuti nda kundikiwa olondaka viwa kuava ka va sevisiwile evamba, ndeci Petulu a linga la vana va seviwa evamba—  Suku una wa eca unene ku Petulu woku kala upostolo wa vana va seviwa evamba, wa nyĩhavo unene woku linga upange waco ku vakualofeka—  kuenje eci va limbuka ohenda ya piãla ya nyĩhiwa, Tiago la Kefa kuenda Yoano, okuti ovo va kala olongunji, va tu kuata peka liondio ame la Barnaba okuti tu enda ku vakualofeka, pole, ovo va enda kuava va seviwa evamba. 10  Ovo va tu pinga lika okuti tu kapako olohukũi kuenje eci oco nda likolisilako oku linga. 11  Kuenje eci Kefa eya ko Antiokea, ndo vetela evelo omo wa sesamẽlele oku pisiwa. 12  Momo osimbu alume vamue va tunda ku Tiago ka veyile handi, eye wa enda oku lia la vakualofeka; pole, eci alume vaco veya, wa liwekapo oku ci linga kuenda wa litepa lavo omo liusumba a kuatela vana va seviwa evamba. 13  Va Yudea vakuavo va likongela kokuaye kelimbi liaco, ndaño Barnaba wa yapuisiwavo lelimbi liavo. 14  Eci nda limbuka okuti ka va kasi oku endela vocili colondaka viwa, nda sapuila Kefa kovaso avo siti: “Nda ove u Yudea o lingainga ndeci ci lingainga vakualofeka kuenje ku lingainga ndeci va Yudea, o vetiya ndati vakualofeka oco va linge ovina va Yudea va lingainga?” 15  Etu tu va Yudea koku citiwa, hatuvakuakanduko nda vakualofeka, 16  kuenje tua limbuka okuti omunu o tendiwa ndukuesunga hamekondako lioku kuama ocihandeleko, te loku kolela Yesu Kristu. Omo liaco, tua kolela Kristu Yesu okuti tu tendiwa ndavakuesunga omo liekolelo tu kuetele Kristu, hamekondako lioku kuama ocihandeleko, momo lomue o tendiwa ndukuesunga omo lioku kuama ocihandeleko. 17  Nda cilo tu vakuakandu osimbu tu sanda oku tendiwa ndavakuesunga omo lia Kristu, anga Kristu wa linga upika wekandu? Hacoko! 18  Nda ovina nda nyõla ndi vi tunga vali, ndi molẽhisa okuti ndukuesino. 19  Momo mekonda liocihandeleko nda fa kocihandeleko, okuti muila omuenyo ku Suku. 20  Nda valeliwa kuti kumue la Kristu. Hameko vali ñasi lomuenyo, Kristu eye o kasi lomuenyo vokuange. Omuenyo ñasi lawo cilo vetimba ndu u kuetele omo nda kolela Komõla a Suku, una wa ndi sola kuenje wa lieca olumue mekonda liange. 21  Omo liaco, si likali ohenda ya piãla ya Suku, momo nda esunga li tunda kocihandeleko, Kristu wa fa ño olivova.

Footnotes