Va Galatia 1:1-24

  • Ovilamo (1-5)

  • Ka kuli olondaka vikuavo viwa (6-9)

  • Olondaka viwa Paulu a kunda via tunda ku Suku (10-12)

  • Oku tava kua Paulu kuenda efetikilo liupange waye (13-24)

1  Ame ndi Paulu, ndupostolo, sia nõliwile lomanu, pamue oku tumiwa lomunu, pole, nda tumiwa la Yesu Kristu kuenda Suku Isia, una wo pindula kolofa,  ame la vamanji vosi va kasi lame tu sonehela akongelo o ko Galatia:  Ohenda ya piãla lombembua yi tunda ku Suku Isietu kuenda ku Ñala Yesu Kristu, yi kale lene.  Eye wa lieca omo liakandu etu oco a tu popele voluali lulo lua vĩha ndeci Suku Isietu a panga,  kokuaye ku kale ulamba oloneke vi enda ño-o hũ ka vi pui. Amene.  Nda komõha omo wa yapuisiwi lonjanga ku una wo kovongi lohenda ya piãla ya Kristu kolondaka vikuavo viwa.  Ka kuli olondaka vikuavo viwa; pole, kuli vamue va kasi oku vu kokeli esakalalo kuenda va yongola oku pengisa olondaka viwa viatiamẽla ku Kristu.  Omo liaco, nda etu, nda ungelo umue o tunda kilu, nda tu vu kundili olondaka viwa vi patãla vina tuo longisi, omunu waco a siñaliwe.  Ndeci tua popia ale, haico mopia vali okuti, Wosi u kundili olondaka viwa vi patãla vina wa tavi, omunu waco a siñaliwe. 10  Ñasi hẽ oku sanda oku taviwa lomanu, ale la Suku? Ale ñasi oku sanjuisa omanu? Nda ñasi oku sanjuisa omanu siupikako wa Kristu. 11  A vamanji, ndi yongola okuti vu kũlĩha okuti olondaka viwa ñasi oku vu sapuili haviomunuko; 12  momo sia vi tambuile komanu ndaño oku vi ndi longisa, puãi via situluiwa la Yesu Kristu. 13  Ene wa yevi ndomo nda tuwile eci nda tiamẽlele ketavo lia va Yudea, okuti nda lambalalele calua ekongelo lia Suku, loku seteka oku li nyõla; 14  ketavo lia va Yudea nda velelepo vakuotunga wange vofeka yange, nda kala ukuambili yalua koviholo violosekulu viange. 15  Pole, Suku una wa ecelela okuti ndi citiwa, wa ñovonga omo liohenda yaye ya piãla kuenda wa panga 16  oku ndi situluila Omõlaye, okuti ndi sapuila vakualofeka olondaka viwa viatiamẽla kokuaye, pole, sia vanguile lomunu umue; 17  ndaño ko Yerusalãi sia endeleko ku vana va kala tete ovapostolo okuti ame handi sia kaile, puãi nda endele ko Arabia, noke nda tiukila ko Damasko. 18  Noke yanyamo atatu nda lamanela ko Yerusalãi oku ka nyula Kefa kuenje nda kala laye ci soka 15 koloneke. 19  Pole, ovapostolo vakuavo sia va muile, te lika Tiago manji a Ñala. 20  Kaliye catiamẽla kovina ndo soneheli, ndu sapuili kovaso a Suku, okuti si kasi oku kemba. 21  Noke nda enda kolofeka vio ko Suria kuenda vio ko Kilikiya. 22  Pole, sia kũlĩhĩwile lakongelo a Kristu a kala vo Yudea. 23  Ovo va yeva lika ku vakuavo okuti: “Ulume una wa enda oku tu lambalala, cilo o kasi oku sapula olondaka viwa viatiamẽla ketavo lina eye a setekele oku nyõla.” 24  Kuenje va fetika oku kemainya Suku mekonda liange.

Footnotes