Ovilinga 8:1-40

  • Saulu ukuakulambalala (1-3)

  • Oku kunda kua Filipu ko Samaria ku eca onima yiwa (4-13)

  • Petulu la Yoano va tumiwa ko Samaria (14-17)

  • Simono o seteka oku landa espiritu sandu (18-25)

  • Kalei wo ko Etiopia (26-40)

8  Saulu wa tava oku pondiwa kua Stefano. Keteke liaco kua katuka elambalalo lialua kekongelo lia kala vo Yerusalãi; kuenje vosi va sandokaila kolofeka vio Yudea la Samaria, pole, ovapostolo ovo lika va sialele vo Yerusalãi.  Alume vana va sumbilile Suku, va ambata Stefano yu vo kenda kuenje vo lila calua.  Saulu wa fetika oku kangisa ekongelo. Eye wa enda oku iñila vonjo lanjo oku koka alume lakãi loku va kapa vokayike.  Kuenje vana va sandoka va ñuala ñuala vofeka oku kunda olondaka viwa.  Filipu wa lokila volupale luo Samaria kuenje wa fetika oku va kundila Kristu.  Owiñi wosi wa yevelela ovina Filipu a kala oku popia, osimbu va mola olondimbukiso eye a kala oku linga.  Omanu valua va kuatiwile lolondele kuenda ovio via kaluka lolukandi kuenje via tunda. Handi vali, ovihata la vana va fa ovolu va sakuiwa.  Kuenje kua kala onjolela yalua volupale luaco.  Volupale mua kala ulume umue onduko yaye Simono, okuti kosimbu wa enda oku tãha kuenda wa komõhisa omanu vo ko Samaria, loku popia okuti, wa kala omunu unene. 10  Vosi yavo oku upisa kuava vatito toke kuava vanene, vo yevelela kuenje va popia vati: “Ulume u wa kũlĩhĩwa okuti, Unene wa Suku kuenje citava oku u tukula okuti wa Velapo.” 11  Ovo vo yevelela momo wa va komõhisa vokuenda kuotembo yalua loku tãha kuaye. 12  Pole, eci ovo va tava ku Filipu, una wa kala oku kunda olondaka viwa Viusoma wa Suku kuenda vionduko ya Yesu Kristu, ci kale alume ci kale akãi va papatisiwa. 13  Simono wa tavavo kuenje noke yoku papatisiwa, wa kala kumue la Filipu; yu wa komõha poku mola ovilimbu lovilinga vi komõhisa via kala oku lingiwa. 14  Eci ovapostolo ko Yerusalãi va yeva okuti va Samaria va tava kondaka ya Suku, va tuma kokuavo Petulu la Yoano; 15  kuenje ovo va lokilako yu va va likutililako oco va tambule espiritu sandu. 16  Momo pokati kavo lomue wa tambuile espiritu sandu, pole va papatisiwile lika vonduko ya Ñala Yesu. 17  Noke va va kapa ovaka avo, yu va fetika oku tambula espiritu sandu. 18  Eci Simono a mola okuti espiritu lia kala oku eciwa lovapostolo poku kapa ovaka komanu, eye wa va ĩha olombongo, 19  loku popia hati: “Nyĩhivo unene owu okuti, eci ndi kapa ovaka komunu umue eye o tambula espiritu sandu.” 20  Pole, Petulu wo sapuila hati: “Olombongo viove vi nyõlehe love, momo o sima okuti o pondola oku kuata ocali ca Suku lolombongo. 21  Ove ku kuete onepa kupange owu, momo utima wove ka wa sungulukile kovaso a Suku. 22  Likekembela kevĩho liove kuenda pinga ku Yehova, okuti nda citava ecela ũvi u kasi vutima wove; 23  momo nda limbuka okuti ove uwule* kuenda wupika umue ka sungulukile.” 24  Simono wa va tambulula hati: “Mingiliko ene ku Yehova okuti lacimue covina wa tukuli ci mbeta.” 25  Eci ovo va imba uvangi loku popia ondaka ya Yehova, va tiukila ko Yerusalãi kuenje va kundila olondaka viwa vovaimbo alua a va Samaria. 26  Kuenje ungelo wa Yehova wa sapuila Filipu hati: “Votoka, kuende kombuelo vonjila yi lokila ko Yerusalãi oku enda ko Gasa.” (Onjila yaco yekalasoko.) 27  Wa votoka, yu wa enda kuenje wa sanga ulume umue u Etiopia okuti kalei* kanene ka nasoma Kandake wa va Etiopia, haeye wa kundikiwa ukuasi waye wosi. Eye wa endele oku ka fendela ko Yerusalãi, 28  kuenda poku tiuka wa tumãla vekãlu liaye loku tanga lolukandi elivulu liuprofeto Isaya. 29  Espiritu lia sapuila Filipu hati: “Kuende, amela kekãlu olio.” 30  Filipu wa lupukilako kuenda wo yeva oku tanga lolukandi elivulu liuprofeto Isaya, yu wo pula hati: “Eci o kasi oku tanga ndeti ca ku lomboloka?” 31  Eye wa tambulula hati: “Ci ndomboloka ndati nda ka pali laumue o ci ndomboluila?” Kuenje wa pañinya Filipu oku londa loku tumãla kumue laye. 32  Onepa Yocisonehua a kala oku tanga lolukandi yiti: “Ndeci omeme ya ambatiwa kepondelo, ale ndeci okameme kohĩla ukuakupemula, eye ka samele omẽla waye. 33  Eci a kutisua osõi, ka vo lekisile esunga. Helie o ka lomboluila ovina evi kocitumbulukila caye? Momo omuenyo waye wopiwa kilu lieve.” 34  Kalei wa sapuila Filipu hati: “Ndi sapuile, uprofeto waco a tukula helie? Wa litukula eye muẽle, ale omunu ukuavo?” 35  Filipu poku vangula wa fetika oku tukula ocisonehua caco kuenda wo lomboluila olondaka viwa viatiamẽla ku Yesu. 36  Osimbu va kala vonjila, veya kovava kuenje kalei wa popia hati: “Ovava ya; nye ci nateka oku papatisiwa?” 37  —— 38  Kuenje wa tuma oku talamisa ekãlu, noke Filipu kumue la kalei va wila vovava kuenda Filipu wo papatisa. 39  Eci va tunda vovava, espiritu lia Yehova lia songuila Filipu kumue kuiñi kuenje kalei ko muile vali, yu wa enda lonjila yaye lesanju. 40  Filipu wa enda ko Asidode kuenda wa iñila vovaimbo oku kunda olondaka viwa kalupale osi toke eci a pitĩla ko Kaisarea.

Footnotes

Lit., “ondulu.”
Ale, “ukuenje welombe.”