Ovilinga 5:1-42

  • Ananiya kuenda Safira (1-11)

  • Ovapostolo va linga olondimbukiso vialua (12-16)

  • Oku kapiwa vokayike kuenda oku yovuiwa (17-21a)

  • Oku tualiwa vali Kekanga Linene (21b-32)

    • ‘Oku pokola ku Suku komanu hakoko’ (29)

  • Elungulo lia Gamaliyele (33-40)

  • Oku kunda konjo lanjo (41, 42)

5  Ulume umue o tukuiwa Ananiya kumue lukãi waye Safira, va landisa ocipiñalo cimue.  Pole olombongo vikuavo eye wa vi soleka, ukãi waye wa ci kũlĩhĩlevo, wa nena lika onepa yimue yolombongo kuenda wa vi eca kovapostolo.  Petulu wa popia hati: “Ove a Ananiya, momo lie Satana a yukisila vutima wove uhembi woku kemba espiritu sandu loku soleka olombongo vimue viepia?  Osimbu kua li landisile, ka lia kaile hẽ liove? Noke yoku li landisa, olombongo viaco ka via kailevo viove? Kua kembele omanu, pole wa kemba Suku.”  Ananiya noke yoku yeva olondaka evi, wa kupuka, yu wa fa. Kuenje vosi va ci yeva va kuata usumba walua.  Akuenje veya, vo muñila polonanga, vo wambata, yu vo kenda.  Noke yolowola vitatu, ukãi waye weya, pole, ka kũlĩhĩle eci ca pita.  Petulu wo pula hati: “Evi ovio lika olombongo viepia wa landisi kavali kene?” Eye hati: “Oco, ovio lika.”  Petulu wo sapuila hati: “Momo lie kavali kene wa litaveli pokati oku seteka espiritu lia Yehova? Tala! Olomãhi viava va kenda veyove vievi puvelo kuenda va ku ambatavo.” 10  Vepuluvi liaco haico a kupukila kolomãhi viaye kuenje wa fa. Eci akuenje va iñila, vo sanga okuti wa fa ale kuenje vo wambata, yu vo kenda ocipepi la veyaye. 11  Kuenje ekongelo liosi kumue la vosi va yeva ovina evi va kala lusumba. 12  Ovapostolo va amamako oku linga olondimbukiso lovikomo* pokati komanu; kuenda va liongoluila vosi pamosi Pocindumba ca Salomone. 13  Lomue pokati ka vakuavo wa kuatele utõi woku likongela kokuavo; pole omanu va kala oku va pandiya. 14  Handi vali, etendelo lia vana va tava ku Ñala lia kala oku livokiya, okuti omanu valua ci kale alume lakãi. 15  Va nena olombeyi volokololo kuenda va vi kapa poviyalo vitito, okuti Petulu poku pita ulembo waye u veta ku vamue pokati kavo. 16  Owiñi wo valupale a lisungue lo Yerusalãi, wa nena omanu va vela la vana va kuatiwile lolondele kuenda vosi va sakuiwa. 17  Pole, ocitunda cinene la vana va kala laye va votoka kuenje vana va tiamẽlele kocisoko ca va Sadukeo kuenda vosi yavo va kala lonya. 18  Ovo va kuata ovapostolo, va va kapa vokayike kaño. 19  Puãi, vokuenda kuteke, ungelo wa Yehova wa yikula epito liokayike, wa va tundisa posamua loku popia hati: 20  “Kuendi kovitumãlo viene vonembele kuenda amamiko oku sapuila omanu ovina viosi viatiamẽla komuenyo wiya.” 21  Noke yoku yeva ovina evi, va iñila vonembele kociteketeke kuenje va fetika oku longisa. Eci ocitunda cinene la vana va kala laye va pitĩla, va tumbika Ekanga kuenda akulu vosi vomãla va Isareli va tuma vokayike oku kopa ovapostolo loku va nena kokuavo. 22  Pole, eci akuenje va pitĩla ka va va sangele vokayike. Va tiuka kuenje va popia 23  vati: “Tua sanga okuti okayike ka yikiwa kuenda olondavululi vi tãi povivelo, pole eci tua yulula apito ka tua sangelemo laumue.” 24  Eci kesongo konembele lovitunda via velapo va yeva olondaka evi, va saluka leci ca laikele oku pita. 25  Omunu umue weya kuenje wa va sapuila hati: “Alume vana wa kapeli vokayike, va kasi vonembele kuenda va tãi oku longisa omanu.” 26  Noke kesongo konembele wa enda lakuenje vaye, yu va kuata ovapostolo, pole, ka va ci lingile lungangala, momo va kala lusumba sanga omanu va va sosola lovawe. 27  Ovo va va nena kuenda va kapiwa pokati Kekanga. Kuenje ocitunda cinene ca va sapuila 28  hati: “Tuo handeleki ale oco ka vu ka longisi vali vonduko eyi, pole, tala! Wa yukisi o Yerusalãi lalongiso ene kuenda vu yongola okuti tu kuata eko liosonde yulume u.” 29  Petulu lovapostolo vakuavo va tambulula vati: “Cetu oku pokola ku Suku ndombiali, komanu hakoko. 30  Suku ya vakukululu yetu wa pindula Yesu, una wa pondi, poku u valela kuti. 31  Suku wo kemãlisa konẽle yaye yondio Ndusongui wa Velapo haeye Onjovoli, oco va Isareli va likekembele loku tambula ongecelo yakandu. 32  Etu tulombangi viovina viaco kuenda espiritu sandu, lina Suku a eca ku vana va pokola kokuaye ndombiali.” 33  Eci va yeva ovina evi, va fungula* kuenje va yonguile oku va ponda. 34  Puãi Vekanga mua votoka umue u Fariseo okuti onduko yaye Gamaliyele; eye ulongisi Wovihandeleko, haeye wa sumbiwa lomanu vosi kuenda wa tuma oku kapa alume vaco posamua okatembo kamue. 35  Noke wa va sapuila hati: “Ene alume va Isareli, lunguki leci vu yongola oku linga lalume ava. 36  Momo kua katukile ale Teodasi, wa litukuile hati, ndimunu unene kuenje omanu va soka 400 va likongelele kocitundo caye. Pole, eye wa ipawa kuenda vana va enda oku u kuama va sanduiwa, yu va taka. 37  Noke kua katuka Yuda umue u Galilea koloneke vioku li sonehisa kuenda wa kokela oloñame vialua kokuaye. Kuenje ulume waco layevo wa fa kuenda vosi vana vo kuamele va sanduiwa. 38  Omo liocitangi eci, ndu sapuili siti, alume ava va kale, ko ka va sakalaisi. Momo nda elongiso eli ale upange owu womanu, u nyõleha; 39  pole, nda wa Suku, ka vu tẽla oku va tateka. Handi vali, citava okuti vu kala ndava va liyaka la Suku.” 40  Kuenje va yeva elungulo liaye, va vilikiya ovapostolo, va va tipula* kuenda va va handeleka oco va liwekepo oku vangula vonduko ya Yesu, yu va va eca. 41  Ovo va tunda Vekanga lonjolela, momo va tendiwile okuti va sesamẽla oku sepuiwa omo lionduko yaye. 42  Eteke leteke vonembele kuenda konjo lanjo, ka va liwekelepo oku longisa loku kunda olondaka viwa viatiamẽla ku Kristu, Yesu.

Footnotes

Ale, “ovilimbu.”
Ale, “va tema calua.”
Ale, “oku veta.”