Ovilinga 4:1-37

  • Petulu la Yoano va pulisiwa (1-4)

    • Vana va tava va tẽla 5.000 kalume (4)

  • Ohali kovaso Yekanga Linene (5-22)

    • ‘Ka tu liwekapo oku vangula’ (20)

  • Va pinga utõi vohutililo (23-31)

  • Olondonge via litepela ovina viavo (32-37)

4  Osimbu Petulu la Yoano va kala oku vangula lomanu, ovitunda via velapo, la kesongo konembele kumue la va Sadukeo, veya kokuavo.  Ovo va tema omo va kala oku longisa omanu loku va lomboluila okuti Yesu wa pinduiwa kuava va fa.*  Kuenje va va kuata, yu va kapiwa vokayike toke keteke lia kuamamo, momo ca kala ale oñolosi.  Puãi, valua va yeva ohundo, va tava kuenda etendelo lialume lia soka 5.000.  Keteke lia kuamamo asongui vavo lakulu, la vakuavisonehua va liongoluila pamosi vo Yerusalãi,  kua kalavo Anasi ocitunda ca velapo, Kayafa, Yoano, Alexandro kuenda vosi vakuepata liocitunda ca velapo.  Kuenje va kapa Petulu la Yoano pokati kavo loku va pula vati: “Lunene welie ale londuko yelie vu linga ovina evi?”  Omo Petulu we yukile espiritu sandu, wa va tambulula hati: “Ene asongui vomanu lakulu,  nda etaili tu kasi oku pulisiwa omo lieci ciwa tua linga kulume wa kala ocilema kuenda vu yongola oku kũlĩha u wa sakula ulume waco, 10  vosi yene lomanu vosi va Isareli, kũlĩhi okuti vonduko ya Yesu Kristu u Nasara una wa pondiwila kuti, pole Suku wo pindula kuava va fa, vonduko yaye ulume u o tãi ndeti, o kasi luhayele kovaso ene. 11  Eye, eye ‘ewe lia nyehuiwa lene vulonungi, okuti olio lia linga ewe lia velapo lievindi.’* 12  Omo liaco, vemehi lilu ka muli onduko yikuavo ya eciwa komanu okuti tu popeliwa layo kuenje ka kuli epopelo komunu ukuavo.” 13  Eci va mola utõi wa Petulu la Yoano, yu va limbuka okuti omanu vaño haivo ka va longisiwile,* va komõha. Kuenje va limbuka okuti va kala kala la Yesu. 14  Poku mola okuti ulume wa sakuiwa o tãi pokati kavo, ka va popele vali cimue. 15  Va va handeleka oku tunda Kekanga kuenda va fetika oku vangula omunu lukuavo, 16  vati: “Nye tu linga lalume ava? Momo olonungi vio vo Yerusalãi via mola ocilimbu cinene ovo va linga kuenje ka tu tẽla oku ci patãla. 17  Pole, oco ondaka yaco ka yi ka lisanduile komanu, tu va saluisi kuenda tu va handeleki oco ka va ka vangule vali lomunu umue catiamẽla konduko yaco.” 18  Kuenje va va kovonga loku va handeleka oco ka va ka vangule cimue ale oku longisa vonduko ya Yesu. 19  Puãi Petulu la Yoano va va tambulula vati: “Nda esunga kovaso a Suku oku tava kokuene okuti ku Suku hakoko, ci popi ene muẽle. 20  Pole, kokuetu ka citava oku liwekako oku vangula ovina tua mola levi tua yeva.” 21  Noke yoku va saluisa, va va eca, omo ka va sangele esunga lioku va kangisa mekonda liowiñi, momo vosi va kala oku sivaya Suku omo liovina via lingiwa. 22  Ulume wa sakuiwa locikomo* caco, wa kuata eci ci pitahãla 40 kanyamo. 23  Noke yoku va eca, ovo va enda kolondonge vikuavo kuenje va vi sapuila eci ovitunda via velapo lakulu va popia lavo. 24  Eci va ci yeva, va likutilila ku Suku lutima umuamue vati: “A Ñala, a Cime cetu, ove Una wa lulika ilu losi, lokalunga lovina viosi vi kasimo, 25  haive wa vanguila vonduko yespiritu sandu vomela wa kukululu yetu Daviti, ukuenje wove, hati: ‘Olofeka via sakalalela nye kuenda omanu nye va sokoluila ovina viesanda? 26  Olosoma vio kilu lieve via lipongiya, olombiali via tumbikila ongombo Yehova lombuavekua yaye.’* 27  Kuenje ci kale Herode, ci kale Pondiu Pilato kuenda vakualofeka, lomanu va Isareli va liongoluila volupale lulo, va katukila ukuenje wove o kola, Yesu, una ove wa nõla, 28  oku linga cosi eka liove lia panga kuenda oku tẽlisa ocipango covina via sokiyiwile ale oku lingiwa. 29  Cilo, a Yehova, limbuka ndomo va kasi oku tu saluisa kuenda eca kakuenje vove utõi woku popia ondaka yove, 30  osimbu õluila eka liove poku sakula, loku linga olondimbukiso lovikomo* vonduko yukuenje wove o kola, Yesu.” 31  Noke yoku linga ohutililo,* ocitumãlo va liongoluila ca lisenga kuenje omunu lomunu we yukisua lespiritu sandu kuenda va fetika oku popia ondaka ya Suku lutõi. 32  Owiñi womanu va tava, va kala lutima umuamue kuenda ocisimĩlo cimuamue kuenje lomue pokati kavo wa popia okuti ovina a kuatele viaye, pole, va litepaila ovina viosi. 33  Kuenje ovapostolo va amamako oku eca uvangi watiamẽla kepinduko lia Ñala Yesu lunene walua kuenda ohenda ya piãla ya va wila vosi. 34  Omo liaco, pokati kavo lomue wa sukile cimue, momo vosi va kuatele ovapia ale olonjo, va vi landisa loku nena olombongo vieci ca landisiwa, 35  va vi eca kovapostolo. Kuenje via tepisiwa komunu lomunu ndeci va sukilile. 36  Kuenje Yosefe, una ovapostolo vo tukuilevo Barnaba, (ci lomboloka “Omõla Elembeleko”), u Lewi, wa citiwila ko Kupro, 37  wa kuatelevo epia, yu wa li landisa kuenje olombongo viaco wa vi nena kovapostolo.

Footnotes

Ale, “epinduko liava va fa konepa ya Yesu.”
Lit., “utue wevindi.”
Okuti, ka lilongisile kolosikola via velapo; ka ci lomboloka okuti ka lilongisile.
Ale, “ondimbukiso.”
Ale, “Kristu waye.”
Ale, “ovilimbu.”
Ale, “oku likutilila lutima wosi.”