Ovilinga 3:1-26

  • Petulu o sakula ulume ocilema ukuakupinga osimola (1-10)

  • Ohundo ya Petulu Pocindumba ca Salomone (11-26)

    • ‘Oku tumbuluiwa kuovina viosi’ (21)

    • Uprofeto nda Mose (22)

3  Petulu la Yoano va kala oku lamana konembele kowola yoku likutilila, okuti kowola yecea,*  kuenje ulume umue okuti ocilema tunde koku citiwa, wa kala oku ambatiwa. Eteke leteke va enda oku u kapa pombundi yonembele ya tukuiwa okuti Ombundi Yeposo, oco a pinge oviali viohenda ku vana va iñila vonembele.  Eci a mola okuti Petulu la Yoano va kala oku iñila vonembele, eye wa fetika oku pinga oviali viohenda.  Pole, Petulu la Yoano, vo vandekela loku u sapuila vati: “Tu vanje.”  Eye wa vanja kokuavo, loku lavoka oku tambula cimue.  Kuenje Petulu wa popia hati: “Si kuete opalata lulu, pole eci ñuete oco ndu ku ĩha. Vonduko ya Yesu Kristu u Nasara, enda!”  Noke wo kuata leka liaye liondio, yu wo votola. Vonjanja yaco, haico olomãhi lolongolongolo viaye via kolisua;  kuenje wa katuka lonjanga, yu wa fetika oku enda, noke wa iñila lavo vonembele loku tẽha tẽha kuenda oku sivaya Suku.  Kuenje omanu vosi vo mola oku enda loku sivaya Suku. 10  Noke omanu va limbuka okuti ulume waco, una wa enda oku tumãla Pombundi Yeposo yonembele oku lavoka oviali viohenda, kuenje va lisalukako kuenda va komõha calua leci ca pita laye. 11  Osimbu ulume waco a kala oku kuatelela Petulu la Yoano, omanu vosi va lupukila kokuavo Kocindumba ca Salomone loku komõha calua. 12  Petulu poku ci mola wa sapuila omanu hati: “Ene alume va Isareli, nye wa komõheli kuenda wa tu vandekeleli nye ndu okuti eye o kasi oku enda omo liunene wetu pamue omo tu fendela Suku? 13  Suku ya Avirahama, ya Isake kuenda ya Yakoba haeye Suku ya va kukululu yetu, wa muisa ulamba Ukuenje waye Yesu, una wa pembuli loku u weca peka liovanyali ndaño Pilato wa yonguile oku u yovola. 14  Wa pembuli una o kola haeye ukuesunga kuenda wa pingi oco vo yovuili omunu una okuti omondi, 15  puãi wa pondi Usongui wa Velapo womuenyo. Pole, Suku wo pindula kuava va fa, okuti etu tu ci imbila uvangi. 16  Ulume u vu lete ndeti haeye wa kũlĩhi, wa pamisiwa vonduko ya Yesu kuenda lekolelo lietu vonduko yaye. Ekolelo liaco vonduko yaye olio lia muisa uhayele ulume u kovaso ene vosi. 17  Cilo a vamanji, nda kũlĩha okuti wa ci lingili vonumbi, ndeci asongui vene va linga. 18  Pole, lonjila eyi, Suku wa tẽlisa ovina a popele vomela wovaprofeto vosi, okuti Kristu o talisiwa ohali. 19  “Likekembeli, pongoloki oco akandu ene a ecelue* okuti Yehova* oku ĩhi oloneke viekavuluko, 20  oco a ku tumisi Kristu una wo sokiyiwili okuti, Yesu. 21  Eye o kala kilu toke koloneke vioku tumbulula ovina viosi via tukuiwa la Suku vomela wovaprofeto vaye va kola vo kosimbu. 22  Mose wa popia hati: ‘Yehova Suku yene, pokati ka vamanjene o ko katuili uprofeto ndame. Yeveleli cosi a ku sapuili. 23  Wosi ka yevelela Uprofeto waco, o ka kunduiwa pokati komanu.’ 24  Kuenje ovaprofeto vosi oku upisa ku Samuele lava vo kuama, ndeci valua va popia, ovo va imbavo owanji woloneke evi. 25  Ene vumãla vovaprofeto kuenda vocisila Suku a lisila la vakukululu yene poku popia ku Avirahama hati: ‘Apata osi o kilu lieve a sumũlũhĩla kocitumbulukila* cove.’ 26  Suku noke yoku katula Ukuenje waye, wo tuma tete kokuene oco a vu sumũlũisi, poku tindula omunu lomunu kovilinga viaye vĩvi.”

Footnotes

Okuti, kowola 3 kekumbi.
Lit., “oku imula.”
Lit., “kovaso a Yehova.”
Lit., “ombuto.”