Ovilinga 28:1-31

  • Oku pitĩla ko Melita (1-6)

  • Isia ya Popiliu o sakuiwa (7-10)

  • Oku iñila ko Roma (11-16)

  • Paulu o vangula la va Yudea ko Roma (17-29)

  • Paulu o kunda lutõi anyamo avali (30, 31)

28  Noke yoku puluka, va tu sapuila okuti ocifuka caco ci tukuiwa Melita.  Vakuacifuka caco* va lekisa ohenda yalua kokuetu.* Va tu siakalẽla ondalu kuenda va tu tambula vosi yetu locisola, omo liombela ya kala oku loka kuenda ombambi.  Pole, eci Paulu a kala oku tiaña olohũi oco a vi vokiye pondalu, onyoha ya tunda kowuya waco kuenje ya kakatela keka liaye.  Eci vakuacifuka caco va mola okuti onyoha ya nyoñamela keka liaye, va livangula pokati vati: “Ulume u mbi omondi, ndaño wa puluka kokalunga, Esunga* ka liu ecelela okuti o kala lomuenyo.”  Eye puãi wa takumuila onyoha yaco vondalu kuenje ka yo lingile cimue.  Ovo va simĩle okuti o lenda, ale o fa ocipikipiki. Eci va lavoka osimbu yalua, va mola okuti lacimue cĩvi ca pita laye kuenje va pongolola ovisimĩlo viavo, loku popia vati, u osuku yimue.  Ocipepi locitumãlo caco kua kala ovisenge viulume umue wa velapo kocifuka, okuti onduko yaye Popiliu kuenje eye wa tu tambula ciwa, yu wa tu yekisa locisola oloneke vitatu.  Ceya okuti isia ya Popiliu wa kala oku vela ombambi kuenda ocipulukãlo kuenje Paulu wa enda kokuaye, wa likutilila, wo kapa ovaka aye, yu wo sakula.  Noke omanu vakuavo vo kocifuka caco okuti va kuatiwile loku vela, va fetikavo oku iya kokuaye kuenje va sakuiwa. 10  Ovo va tu ĩhavo olombanjaile vialua kuenda eci tua tundako va tu longekela ovina viosi tua sukilile. 11  Noke yolosãi vitatu tua enda lonaviyu yimue ya kuatele ondimbukiso yokuti, “Omãla va Sewusi.” Onaviyu yaco ya tundile ko Alexandria kuenda ya pita otembo yombambi kocifuka caco. 12  Eci tua pitĩla ketapu lio Surakuso, oko tua kala oloneke vitatu; 13  oku tunda kocitumãlo caco tua pitĩla ko Regio. Keteke lia kuamamo eci ofela yo kutundilo ya sika, tua enda ko Puteoli keteke liavali. 14  Kuenje tua sanga vamanji, noke va tu pinga oco tu kale lavo oloneke epanduvali, yu tua enda ko Roma. 15  Vamanji eci va yeva okuti tueya, veya oku lisanga letu toke kocitanda co Apiu kuenda kocitumãlo cokulia loku puyukila ci tukuiwa, Olonjo Vitatu. Eci Paulu a va mola, wa pandula Suku kuenda wa kuata utõi. 16  Eci tua iñila ko Roma, va ecelela okuti Paulu o kala lesualali limue oku u lava. 17  Noke lioloneke vitatu, eye wa vilikiya alume va velapo vo ko Yudea. Eci va liongolola wa va sapuila hati: “Ene a vamanji, sia lingile cimue cĩvi omanu, ale oviholo via vakukululu yetu, pole, nda linga omandekua tunde ko Yerusalãi toke eci nda eciwa peka lia va Roma. 18  Kuenje noke yoku ndi konomuisa, ovo va yonguile oku ngeca, momo ka va ndi sangele leko lia sesamẽla oku fa. 19  Eci va Yudea va patãla, nda kisikiwa oku tukula Kaisare, pole, sia ci lingilile omo ñuete cimue coku pindika ofeka yange. 20  Omo liaco, ndo pañinyi oco ndu moli, loku vangula lene okuti, mekonda lielavoko lia va Isareli, nda kutiwa lalienge a-a.” 21  Ovo vo sapuila vati: “Ka tua tambuile ovikanda vi tunda ko Yudea vi ku tukula kuenda ka kua tundile manji laumue wa sapula pamue wa vangula cimue cĩvi catiamẽla kokuove. 22  Pole, tu yongola oku yeva ovisimĩlo viove, momo catiamẽla kocisoko caco, tua kũlĩha okuti kuosi va ci patãla.” 23  Ovo va sokiya eteke lioku lisanga laye kuenje valua veya oku sapela laye konjo a sikĩla. Wa va lomboluila ondaka yaco poku va kundila Usoma wa Suku, loku seteka oku va tavisa ku Yesu poku tukula Ocihandeleko ca Mose kuenda Kovaprofeto, tunde omẽle toke koñolosi. 24  Omanu vamue va fetika oku tava ovina eye a popia; pole vakuavo ka va tavele. 25  Omo va lipatãla pokati, va fetika oku tunda kuenda Paulu wa popia hati: “Espiritu sandu lia sapuila vakukululu yene vonduko yuprofeto Isaya, 26  hati: ‘Kuende komanu ava kuenda va sapuila siti: “Oku yeva vu yeva, pole, ka vu kuata elomboloko, oku mola vu mola, pole, ka vu ci limbuka. 27  Momo utima womanu ava wa tindila, ovatũi avo a yeva, pole, ka va kuata elomboloko, va pata ovaso, oco ka va ka vanje lovaso avo ndaño oku yeva lovatũi avo, ale oku kuata elomboloko lutima wavo, okuti va tiuka kuenje ndi va sakula.’” 28  Omo liaco, limbuki okuti epopelo eli li tunda ku Suku, lia tumiwa ku vakualofeka; ovo va li yeva.” 29 ⁠ —hs-1— 30  Eye wa kala vonjo a fetela anyamo avali kuenje wa enda oku tambula locisola vosi veya kokuaye, 31  wa va kundila Usoma wa Suku loku va longisa ovina viatiamẽla ku Ñala Yesu Kristu lutõi,* okuti lomue wo tateka.

Footnotes

Ale, “olonungi vio pocitumãlo caco.”
Ale, “oku lekisa ohenda komanu.”
Kelimi lio Helasi ondaka Dike, pamue yi tiamisiwila kosuku yukãi o fetuluinya esunga, ale locisimĩlo cesunga ka li muiwa.
Ale, “lutõi walua.”