Ovilinga 26:1-32

  • Paulu o liteyuila kovaso a Agripa (1-11)

  • Paulu o lombolola ndomo a tava (12-23)

  • Etambululo lia Festo kuenda lia Agripa (24-32)

26  Agripa wa sapuila Paulu hati: “O kuete evelo lioku vangula.” Kuenje Paulu wolõla eka liaye, wa liteyuila poku popia hati:  “A Soma Agripa, catiamẽla kovina viosi va Yudea va mindika, esumũlũho kokuange oku talama kovaso ove etaili oco ndi liteyuile,  ca piãla enene omo wa kũlĩha ciwa ovituwa via va Yudea kuenda olonamalãla vi kasi pokati kavo. Kuenje hu pinga okuti o njevelela lepandi.  “Ekalo liomuenyo wange tunde vutila eci nda kala pokati komanu vange* kuenda vo Yerusalãi, lia kũlĩhĩwa ciwa la va Yudea vosi,  vana va ñũlĩhĩle tunde osimbu, nda va yongola oku ci imbila uvangi, okuti ame nda kala u Fariseo vana va tõlisa oviholo viefendelo lietu.  Puãi cilo ñasi vekanga omo lielavoko liohuminyo Suku a lingile ku vakukululu yetu;  okuti ohuminyo yaco haiyo apata etu 12 va lavoka oku tẽlisiwa poku linga upange u kola utanya luteke. A Soma, omo lielavoko liaco, va Yudea va kasi oku mindika.  “Momo lie vu simila* okuti Suku ka tẽla oku pindula ava va fa?  Nda simĩle okuti ca ndi sungulukilile oku linga ovina vialua vioku tamalãla londuko ya Yesu u Nasara. 10  Eci oco nda linga vo Yerusalãi kuenda nda kapa olosandu vialua vokayike, momo nda tambuile omoko yaco kovitunda via velapo; kuenje eci va laikele oku pondiwa, nda tava. 11  Noke yoku va yambula olonjanja vialua, nda va kisika oku likala ekolelo liavo volosunangonga viosi; kuenje omo okuti nda va kuatelele onyeño yalua, nda va lambalala toke kalupale o kupãla. 12  “Osimbu nda kala oku ci linga, nda enda ko Damasko lomoko kuenda ocikundi covitunda via velapo, 13  eci ekumbi lia kala vongunji, a Soma, vonjila nda mola ocinyi ca tunda kilu ca tua okuti oku nina kuekumbi ci sule kuenda ca ndi tuila ame kumue lava va kala oku enda lame. 14  Eci vosi tua kupukila posi, nda yeva ondaka ya ndi sapuila kelimi lio Heveru hati: ‘A Saulu, a Saulu, nye o ndi lambalalela? Nda wa amamako oku tasula kolosongo* cu ku vala.’ 15  Pole, nda pula siti: ‘Ove elie, a Ñala?’ Ñala wa nambulula hati: ‘Ame Yesu, una o kasi oku lambalala. 16  Votoka, talama vilu. Nda molẽha kokuove, momo nda ku nõla oco o linge oñuatisi kuenda imba uvangi wovina wa muila, levi hu situluila catiamẽla kokuange. 17  Kuenje hu popela komanu ava kuenda kolofeka kuna hu tuma, 18  oco o patulule ovaso avo, okuti va tunda vowelema ha va sangi ocinyi, loku tunda kuviali wa Satana okuti va tiamẽla ku Suku, oco va tambule ongecelo yakandu kuenda ocipiñalo pokati ka vana va yelisua omo va ñolela.’ 19  “A Soma Agripa, nda linga eci Yesu a numa oku linga vocinjonde, 20  pole, tete ku vana va kala ko Damasko, noke ku vana va kala ko Yerusalãi kuenda kovaimbo osi o vo Yudea, la vakualofeka vana nda kundila okuti, te va likekembela loku pongolokela ku Suku poku linga ovina vi lekisa oku likekembela kuavo. 21  Eli olio esunga lieci va Yudea va ñuatela vonembele loku seteka oku ndi ponda. 22  Kuenje omo nda tambula ekuatiso lia Suku, etaili ndamamako oku imba uvangi, ci kale kuava vatito, ci kale kuava vanene, si popi lacimue te lika eci Ovaprofeto la Mose va popia okuti ci lingiwa— 23  okuti Kristu wa laikele oku talisiwa ohali kuenda omo eye tete o pinduiwa kuava va fa, imba uvangi wocinyi komanu ava kuenda ku vakualofeka.” 24  Osimbu Paulu a kala oku popia olondaka evi oco a liteyuile, Festo wa popia lolukandi hati: “A Paulu, ove wa linga eyui! Oku lilongisa calua kua ku kokela uyui!” 25  Pole, Paulu hati: “A Ñala a Festo, sia lingile eyui, puãi ñasi oku vangula olondaka viocili haivio via sunguluka. 26  Ocili okuti, soma ñasi oku vangula laye lutõi wa kũlĩha ciwa ovina evi; nda kolela okuti pokati kovina evi ka pali cimue eye ka kũlĩhĩle, momo lacimue ca lingiwa vuyombeki. 27  A Soma Agripa, wa kolela Kovaprofeto? Ndi cĩ okuti wa kolela.” 28  Pole, Agripa wa sapuila Paulu hati: “Vokatembo katito nda wa ndi tavisa okuti ndi linga Ukristão.” 29  Kuenje Paulu hati: “Ndi livela kovaso a Suku okuti ci kale ndopo, ci kale noke, haveko lika puãi vosi va ndi yeva etaili nda va kala ndame, pole, okayike hakoko.” 30  Kuenje soma wa votoka kumue la nguluvulu kuenda Bernike lalume vana va tumãlele lavo. 31  Osimbu va kala oku enda, va fetika oku livangula pokati vati: “Omunu u, ka lingile cimue okuti o sesamẽla oku fa ale oku kapiwa vokayike.” 32  Agripa wa sapuila Festo hati: “Nda ulume u ka tukuile Kaisare, nda ca tava oku weca.”

Footnotes

Ale, “ofeka.”
Lit., “oku tenda.”
Osongo, ombueti yimue ya songoloka yoku songuila ocinyama.