Ovilinga 24:1-27

  • Alundi a lingiwa ku Paulu (1-9)

  • Paulu o liteyuila kovaso a Feliki (10-21)

  • Ocitangi ca Paulu ca pita anyamo avali (22-27)

24  Eci pa pita oloneke vitãlo, ocitunda cinene Ananiya kuenda akulu vamue veya longanji yimue o tukuiwa Tertulo kuenje va pindika Paulu ku nguluvulu.  Eci Tertulo a kovongiwa, wa fetika oku u pindika hati: “Omo okuti tu kuete ombembua yalua vonduko yove kuenda wa lingila ofeka yilo apongoloko omo liuloño wove,  a Ñala a Feliki kuosi tu kasi, olonjanja viosi eci tu ci limbuka, tu ku pandula calua.  Pole, oco si ka ku tateke, hu pinga lohenda okuti o tu yevelela.  Tua sanga ulume u okuti wa soka ndefengi,* o wengula ovosuanji pokati ka va Yudea vosi va kasi voluali, haeye usongui wocisoko ca va Nasiri.  Eye wa yonguilevo oku vĩhisa onembele, pole tuo kuata.  —hs-1—  Eci ove muẽle u kũlĩhĩsa, o ka limbuka ovina viosi tu kasi oku u pindikila.”  Kuenje va Yudea va likongelavo kelundi liaco loku popia okuti ovina evi viocili. 10  Eci nguluvulu a linga ondimbukiso ku Paulu oco a vangule, eye wa popia hati: “Omo nda kũlĩha okuti ove wa linga onganji yofeka yilo vokuenda kuanyamo alua, njimba uvangi wange. 11  Ndeci ove muẽle wa ci limbuka okuti pa pita lika 12 koloneke tunde eci nda lamanela ko Yerusalãi oku ka fendela; 12  kuenda ovo ka va la ndi sanga vonembele oku lipatãla lomunu umue, pamue oku tutuminya owiñi ndaño volosunangonga ale volupale luosi. 13  Ovina va kasi oku mindikila kokuove cilo, ka va tẽla oku vi imbila uvangi. 14  Eci ndi tava ceci okuti, catiamẽla konjila ovo va tukula hati ocisoko, ñasi oku vumba Suku ya vakukululu vange, ndi tavavo kovina viosi Viocihandeleko levi via sonehiwa Vovaprofeto. 15  Kuenje ñuete elavoko ku Suku, elavoko omanu ava va kuetevo liokuti, ku laika oku kala epinduko lia vakuesunga lava havakuesungako. 16  Momo ndi kasi oku likolisilako oku kuata utima wa yela* kovaso a Suku lo komanu. 17  Noke yanyamo alua, ndeya oku nenela ofeka yange oviali viohenda kuenda oku eca ovilumba. 18  Osimbu nda kala oku linga ovina evi, va ndi sanga vonembele okuti nda yelisua kuenje ka kua kaile owiñi ndaño onjuela. Pole, kueya vamue va Yudea va tunda kolupale luo Asia, 19  okuti va sesamẽlele oku kala palo oco va mindikile kovaso ove, nda va kuete cimue coku mindika. 20  Handi vali, alume va kasi palo va popie nda va sanga cimue cĩvi, osimbu ñasi Vekanga, 21  te lika ondaka nda popia osimbu nda kala pokati kavo yokuti: ‘Etaili ñasi oku sombisiwa kovaso ene omo lielavoko liepinduko liava va fa!’” 22  Omo okuti Feliki wa kũlĩhĩle ciwa ovina viatiamẽla Konjila yaco, wa fetika oku va tundisa loku popia hati: “Eci kesongo kolohoka Lusia eya, oco netulula ondaka yene.” 23  Kuenje wa handeleka usongui wasualali oku kuata ulume waco, loku wĩha naito elianjo, okuti omanu vaye ka va tatekiwa oku u kuatisa. 24  Eci pa pita oloneke vimue, Feliki weya lukãi waye Drusila, u Yudea kuenda eye wa tuma oku vilikiya Paulu kuenje wo yevelela eci a lombolola catiamẽla koku kolela Kristu Yesu. 25  Pole, osimbu Paulu a kala oku lombolola eci catiamẽla kesunga, loku likandangiya kuenda esombiso lia laikele oku iya, Feliki wa yokoka, yu wa popia hati: “Kuende, pole, eci ñuata epuluvi hu tuma oku ku vilikiya vali.” 26  Handi vali, eye wa lavokaile okuti Paulu u wĩha olombongo. Omo liaco, wa enda oku u vilikiya olonjanja vialua oco a sapele laye. 27  Puãi, eci pa pita anyamo avali, Porkio Festo wa piñainya Feliki; omo okuti Feliki wa yonguile oku sanjuisa va Yudea, wa sia Paulu vokayike.

Footnotes

Ale, “ukuakukoka ovitangi”. Lit., “uvei u sambuka.”
Ale, “oku pua eko.”