Ovilinga 22:1-30

  • Paulu o liteyuila kovaso owiñi (1-21)

  • Paulu wa tukula okuti onungi yo ko Roma (22-29)

  • Ohongele Yekanga Linene (30)

22  “Ene a vamanji, la va isia, yeveleli osimbu ndu lomboluili ovina via pita.”  Eci va yeva okuti o kasi oku vangula lavo kelimi lio Heveru, vosi yavo võha, kuenje eye wa popia hati:  “Ame ndu Yudea, nda citiwila ko Tarso, ko Kilikiya, nda pindisiwa volupale lulo la Gamalieli, haime nda longisiwa oku pokola Kocihandeleko ca vakukululu kuenda nda kala ukuambili kupange wa Suku ndeci ene vu kasi etaili.  Onjila eyi nda yi lambalala toke koku fa kuenda nda kapa vamue vokayike ci kale alume, ci kale akãi,  ndaño ocitunda cinene kuenda akulu vosi va tẽla oku ci imbila uvangi. Nda tambula kokuavo ovikanda via sonehiwila vamanji vo ko Damasko kuenda nda endeleko oco ndi nene ko Yerusalãi vana va kalako okuti va kutiwa loku yambuiwa.  “Pole, vokuenda kungende, ocipepi lo Damasko, okuti ekumbi vongunji, vocipikipiki kilu kua tunda ocinyi ca ndi tuila,  kuenje nda kupukila posi, yu nda yeva ondaka ya ndi sapuila hati: ‘A Saulu, a Saulu, nye o ndi lambalalela?’  Nda tambulula siti: ‘Ove elie, a Ñala?’ Eye wa nambulula hati: ‘Ame Yesu u Nasara, una o kasi oku lambalala.’  Alume va kala kumue lame, va mola ocinyi pole, ka va yevele ondaka yomunu wa kala oku vangula lame. 10  Kuenje nda pula siti: ‘A Ñala, nye ndi linga?’ Ñala wa nambulula hati: ‘Votoka, kuende ko Damasko, oko va ka ku sapuila ovina viosi via ku tukuiwila.’ 11  Pole, omo sia tẽlele oku mola cimue omo liocinyi caco, nda pitĩla ko Damasko loku songuiwa la vana va kala lame. 12  “Kuenje ulume umue wa tukuiwa Ananiya, okuti wa sumbilile Suku ndomo ca lekisiwa Vocihandeleko, haeye va Yudea vosi va kalako vo wimbila uvangi uwa, 13  weya kokuange. Wa talama kovaso yange loku ndi sapuila hati: ‘A manji a Saulu, letuluka!’ Vonjanja yaco haico nda letuluka kuenje ndo mola. 14  Eye wa popia hati: ‘Suku ya va kukululu yetu, wa ku nõla oco o kũlĩhe ocipango caye, loku mola ukuesunga kuenda oku yeva ondaka yomẽla waye, 15  momo wa ku nõla oco o vangule ovina viosi wa mola levi wa yeva kokuaye. 16  Oco puãi o talukila nye? Votoka, papatisua kuenda vilikiya onduko ya Yesu kuenje Suku o ka ecela akandu ove.’ 17  “Pole, eci nda tiukila ko Yerusalãi, yu nda kala oku likutilila vonembele, nda kuata ocinjonde, 18  kuenje nda mola Ñala wa ndi sapuila hati, ‘Yayulako, tunda lonjanga vo Yerusalãi, momo ka va ka tava kuvangi wove watiamẽla kokuange.’ 19  Nda popia siti: ‘A Ñala, ovo va kũlĩha ndomo nda kapaile vokayike vana va ku kolela loku va tipula vosunangonga losunangonga; 20  leci osonde yombangi yove Stefano ya peselua haipo nda kala, nda tava kuenda nda lava ovowalo a vana vo ponda.’ 21  Puãi eye wa ndi sapuila hati: ‘Kuende, momo hu tuma kolofeka kupãla.’” 22  Ovo vo yevelela toke eci a tukula ondaka eyi. Kuenje va kaluka vati: “Omunu ndu, a pondiwe, ka sesamẽla oku kala lomuenyo!” 23  Omo okuti va kala oku kaluka loku imba ovowalo avo vilu kuenda oneketela, 24  usongui wasualali wa handeleka oku tuala Paulu kocivili casualali, yu wa tuma oku u tipula okuti o kũlĩha esunga lieci va kala oku kaluka oco Paulu a pondiwe. 25  Pole, eci vo yala oco a tipuiwe, Paulu wa pula usongui wasualali wa kalako hati: “Ca sunguluka kokuove oku tipula u Roma* okuti ka pisiwile?”* 26  Usongui wasualali poku ci yeva, wa enda ku kesongo kolohoka, wo ci sapuila loku pula hati: “Nye o sima oku linga? Momo ulume u, u Roma.” 27  Kesongo kolohoka wa amẽla kokuaye loku u pula hati: “Sapuileko, ove vu Roma?” Eye hati: “Oco.” 28  Kesongo kolohoka wa tambulula hati: “Ame nda feta olombongo vialua oco ndi lande unungi waco.” Paulu wa popia hati: “Ame puãi nda citiwa lawo.” 29  Vonjanja yaco, haico alume vana va laikele oku u konomuisa poku u tipula, vo sia; kuenje kesongo kolohoka wa kuata usumba poku limbuka okuti Paulu una a kutile lalienge wa kala u Roma. 30  Keteke lia kuamamo, kesongo wo kutulula momo wa yonguile oku kũlĩha esunga lieci va Yudea vo pindikila, yu wa handeleka ovitunda via velapo la vosi Vakuekanga oku liongolola. Wa nena Paulu kuenje wo talamisa pokati kavo.

Footnotes

Ale, “Onungi yo ko Roma.”
Ale, “ka sombisiwile?”