Ovilinga 20:1-38

  • Paulu ko Makedonia kuenda ko Helasi (1-6)

  • Eutuko o pinduiwa ko Torasi (7-12)

  • Oku tunda ko Torasi wa enda ko Miletu (13-16)

  • Paulu o liongolola lakulu vo ko Efeso (17-38)

    • Oku longisa konjo lanjo (20)

    • “Esanju li tunda koku eca olio lia velapo” (35)

20  Eci onjuela ya tepuluka, Paulu wa tuma olondonge kuenda noke yoku va kolisa wa vosika kuenje eye wa fetika ungende waye woku enda ko Makedonia.  Noke yoku pita kovaimbo aco loku vetiya lolondaka vialua vana va kalako, wa pitĩla ko Helasi.  Oko a kala olosãi vitatu, pole, omo va Yudea vo tumbikila ongombo eci a laikele oku enda lonaviyu ko Suria, wa sima oku tiukila ko Makedonia.  Pokati ka vana vo kuama pa kala Sopatero omõla a Puro, u Berea, Aristarko, Sekundo, u Tesalonike, Gaio, u Derbe, Timoteo kuenda Tukiko wo kolupale luo Asia, la Trofimo.  Alume ava va pita kovaso kuenda va kala oku tu talamẽla ko Torasi;  tua enda lonaviyu oku tunda ko Filipoi noke yoloneke Violombolo ka vi Kuete Etumbisa, yu eci pa pita oloneke vitãlo tueya ko Torasi, oko tua kala oloneke epanduvali.  Keteke liatete liosemana, eci tua liongolola oco tu lie, Paulu wa fetika oku va lingila ohundo, momo wa laikele oku enda keteke lia kuamamo; kuenje wa linga ohundo yaye toke vokati kuteke.  Kua kala olondiyelo vialua vohondo yosapalalo muna va liongoluilile.  Ukuenje umue o tukuiwa Eutuko, wa tumãlele ponjanela wa pekela osimbu Paulu a kala oku vangula, pole, omo a kala lotulo tualua wa kupuka kosapalalo yatatu kuenje vo yelula tupu wa fa. 10  Pole, Paulu wa lokilako, wo kuata yu wo angata loku popia hati: “Ko ka lili vali, eye o kasi lomuenyo.” 11  Eci a londa wa fetika oku lia. Paulu wa amamako oku sapela okatembo kamue toke eci kua ca, noke wa enda. 12  Ovo va kuata ukuenje wa kala vali lomuenyo kuenda va sanjuka calua. 13  Tua londa vonaviyu, yu tua enda ko Aso, kuna tua yonguile oku upilila Paulu, momo noke yoku eca olonumbi, wa yonguile oku endako posi. 14  Eci a tu mola ko Aso, tuo wambata yu tua enda laye ko Mitulene. 15  Kuenje keteke lia kuamamo tua enda lonaviyu, yu tua pitĩla ko Kiyo, pole, keteke likuavo tua pitĩla ko Samo, kuenda eteke likuavo ko Miletu. 16  Paulu wa sokiyile oku enda lonaviyu ko Efeso, oco ka ka pesele otembo yalua kolupale luo Asia; momo wa yonguile oku pitĩla ko Yerusalãi keteke Liocipito co Pendekoste. 17  Osimbu a kala ko Miletu wa tuma ondaka ko Efeso oku vilikiya akulu vekongelo. 18  Eci va pitĩla kokuaye wa va sapuila hati: “Ene wa kũlĩhĩ alikolisilo nda linga pokati kene tunde keteke liatete nda liatela volupale luo Asia, 19  ndomo nda vumba Ñala lumbombe* walua lasuelẽla kuenda ohali nda tala ya tunda kongombo ya va Yudea, 20  osimbu sia liwekelepo oku vu sapuili ovina viwa,* ale oku vu longisa kovaso omanu kuenda konjo lanjo. 21  Pole, nda imbila uvangi ku va Yudea kuenda ku va Helasi catiamẽla koku likekembela kovaso a Suku, loku kolela Ñala Yesu. 22  Kuenje tala! loku vetiyiwa lespiritu, ngenda ko Yerusalãi, ndaño sia kũlĩhĩle ovina vi laika oku pita lame, 23  pole, nda kũlĩha lika okuti volupale lolupale, espiritu sandu olonjanja viosi li njimbila uvangi wokuti va ñapa vokayike kuenda ndi tala ohali yalua. 24  Pole, si tendi omuenyo wange ndocina cimue ci silivila kokuange,* ndi yongola ño oku tẽlisa ocikundi kuenda upange nda tambula ku Ñala Yesu, woku imba uvangi wolondaka viwa viohenda ya piãla ya Suku. 25  “Nda kũlĩha okuti lomue pokati kene nda kundila Usoma, o ka mola vali ocipala cange. 26  Cilo njongola okuti vu kuata elomboloko liokuti si kuete eko nda umue ka popeliwile, 27  momo sia liwekelepo oku vu sapuili elungulo* lia Suku. 28  Lilavi ene muẽle kuenda lavivo ocunda cosi cina espiritu sandu lio nõleli angombo oco va lave ekongelo lia Suku, lina eye a landa losonde Yomõlaye. 29  Nda kũlĩha okuti eci ngenda, pokati kene peya olombinji via tema kuenda ka vi tati ocunda lohenda, 30  kuenje pokati kene pa katuka alume va vangula ovina via penga, oco va koke olondonge okuti vi va kuama. 31  “Lavululi kuenda ivaluki okuti vokuenda kuanyamo atatu, utanya luteke sia la liwekapo oku u lunguli lasuelẽla omunu lomunu. 32  Kuenje cilo ndu u kundiki ku Suku kuenda kondaka yaye yohenda ya piãla, ondaka yina yu pamisi haiyo yu wĩhi ocipiñalo pokati ka vosi va kolisiwa. 33  Si yongola opalata yomunu, pamue ulu, ale uwalo. 34  Ene wa kũlĩhĩ okuti nda siata oku talavaya oco ndi litekule ame muẽle kuenda vana va kasi lame. 35  Ndo wimbili uvangi wovina viosi okuti lupange wene walua vu kuatisi vana va hongua kuenda ivaluki olondaka via Ñala Yesu, eci eye muẽle a popia hati: ‘Esanju li tunda koku eca olio lia velapo, li tunda koku tambula li sule.’” 36  Eci a popia ovina evi, wa kekama kolongolo kumue lavo kuenje wa likutilila. 37  Vosi yavo va lila calua, yu va pupola kapepe a Paulu* loku u sipula locisola,* 38  momo va sumuila ondaka a va sapuila yokuti, ka vo moli vali. Kuenje vo sindikila toke vowato.

Footnotes

Ale, “oku omboka vutima.”
Ale, “viu kuatisi.”
Ale, “ca velapo kokuange.”
Ale, “ocipango cosi.”
Lit., “va li imba kapepe a Paulu.”
Ale, “ocikembe.”