Ovilinga 17:1-34

  • Paulu kuenda Sila ko Tesalonike (1-9)

  • Paulu kuenda Sila ko Berea (10-15)

  • Paulu ko Atenai (16-22a)

  • Ohundo ya Paulu ko Areopago (22b-34)

17  Ovo va pita ko Amfipoli, lo ko Apolonia kuenda va enda ko Tesalonike kuna kua kala osunangonga ya va Yudea.  Ndeci ca kala ocituwa ca Paulu, eye wa iñila vosunangonga kuenda kasambata atatu wa va longisa Ovisonehua,  wa lombolola ovisonehua kuenda wa lekisa okuti ca sukilile okuti Kristu o talisiwa ohali loku pinduiwa kuava va fa, loku popia hati: “U eye Kristu, okuti Yesu una ñasi oku ku lomboluili.”  Omo liaco, vamue pokati kavo va tava kuenda va likongela ku Paulu la Sila kumue lowiñi walua wa va Helasi okuti va fendela Suku, lakãi valua va kemãla.  Pole, va Yudea omo lionya, vongolola alume vamue olondingaĩvi okuti vakuakuñuala ñuala pocitanda kuenda vongolola owiñi, yu va fetika oku linga ombuanja volupale. Va tuiyila onjo ya Yasone, momo va yonguile oku eca Paulu la Sila kowiñi.  Omo okuti ka va va sangele, va ambata Yasone kumue la vamanji vamue kolombiali violupale, loku kaluka vati: “Alume vana va kasi oku koka ombuanja* koluali luosi, va kasivo kulo,  kuenje Yasone wa va tambula ndakombe. Vosi yavo va sinila ocihandeleko ca Kaisare loku popia hati, kuli osoma yikuavo okuti Yesu.”  Eci va yeva ovina evi, owiñi lolombiali violupale, va sakalala;  kuenje Yasone la vakuavo noke yoku feta olombongo, va va eca. 10  Vepuluvi liaco kuteke, haico vamanji va tuma Paulu la Sila ko Berea. Eci va pitĩla, va enda kosunangonga ya va Yudea. 11  Va Yudea va kala ko Berea, va kuatele ombili yoku lilongisa okuti vana va kala ko Tesalonike va sule, momo va tambula ondaka lonjongole yalua kuenda va enda oku konomuisa Ovisonehua eteke leteke loku kũlĩhĩsa nda ovina Paulu a popia viocili. 12  Kuenje valua pokati kavo va tava, oku kongelamo akãi vamue lalume va Helasi va kemãla. 13  Pole, eci va Yudea vo ko Tesalonike va yeva okuti Paulu wa kalavo oku kunda ondaka ya Suku ko Berea, veya oco va tutuiye owiñi kuenda oku va sosuiya. 14  Vamanji haico va tuma Paulu oku lokila kokalunga, pole, Sila la Timoteo oko va siala. 15  Vana va sindikila Paulu va enda laye toke ko Atenai kuenje noke ovo va enda eci va tambula onumbi yokuti Sila la Timoteo va sukila oku iya lonjanga ku Paulu. 16  Osimbu Paulu a kala oku va kevelila ko Atenai, utima waye wa sakalala poku mola okuti olupale lueyukile oviteka. 17  Kuenje eye wa fetika oku longisa Ovisonehua ku va Yudea va kala vosunangonga, kumue lomanu vakuavo va fendela Suku kuenda vana va enda oku kala pocitanda eteke leteke. 18  Pole, olonoño vimue via va Epikuru, la va Stoiku via fetika oku lihoya laye kuenje vamue va popia vati: “Emamõhe eli, li yongola oku vangula nye?” Vakuavo vati: “Eye mbi ukuakukunda olosuku viñi.” Va ci popela omo eye a kala oku kunda olondaka viwa via Yesu kuenda epinduko. 19  Ovo vo kuata kuenje vo tuala ko Areopago loku pula vati: “Citava okuti o tu sapuila eci ci lomboloka elongiso liokaliye o kasi oku vangula? 20  Momo o kasi oku vangula ovina vimue okuti ka tua vi kũlĩhĩle, pole, tu yongola oku kũlĩha eci ci lomboloka ovina evi.” 21  Va Atenai vosi lovingendeleyi va kalapo,* va enda oku pesela otembo koku vangula ale koku yevelela cimue cokaliye. 22  Paulu wa talama pokati ko Areopago loku popia hati: “Ene alume vo Atenai, nda limbuka okuti kovina viosi, wa sumbili vali olosuku* okuti vakuene ci sule. 23  Kuenje eci nda kala oku pita, yu nda mola ovikuata viene viefendelo, nda sangavo owatale umue mua sonehiwa hati, ‘Ku Suku ka Kũlĩhĩwile.’ Puãi, ovina vu fendela okuti ka wa vi kũlĩhĩli, ovio ñasi oku u kundili. 24  Suku una wa lulika oluali lovina viosi vi kasimo, eye Ñala yo kilu lo posi kuenda ka kala volonembele via tungiwa lovaka; 25  ndaño oku vumbiwa lomanu ndu o sukila cimue, momo eye eca omuenyo komanu vosi lefuimo kuenda ovina viosi. 26  Kuenje lomunu umosi, wa sovola olofeka viosi viomanu, oco va tunge kilu lieve kuenda wa sokiya olotembo via tukuiwa lolongave omanu va pondola oku kala, 27  okuti va sanda Suku, pole, ndaño vo sandiliya, vo sanga, momo eye ka kasi ocipãla letu. 28  Vokuaye tu kuete omuenyo, tu lisenga senga, tu kasi komuenyo, ndeci vamue pokati kasonehi vene va popia vati, ‘Letuvo tumãla* vaye.’ 29  “Omo okuti tumãla* va Suku, ka tu ka simi okuti Suku o kasi ndulu, ndopalata, pamue ewe, ale ocina cimue ca luvikiyiwa kuenda ca sovuiwa lomanu. 30  Ocili okuti Suku ka tendele oloneke viaco vionumbi; pole, cilo eye o sapuila omanu vosi vo kolonepa viosi okuti va sukila oku likekembela. 31  Momo eye wa sokiya eteke lioku sombisa oluali lesunga vonduko yulume eye a nõla kuenda wa lekisa komanu vosi okuti wo pindula kuava va fa.” 32  Eci va yeva epinduko liava va fa, vamue va fetika oku yola epembe, osimbu vakuavo va popia vati: “Tu ku yevelela vali noke.” 33  Kuenje Paulu wa tunda pokati kavo, 34  alume vamue va likongela kokuaye kuenda va tava. Pokati kalume vaco pa kala Dionusio, una wa kala onganji yo ko Areopago kumue lukãi umue o tukuiwa Damarisi kuenda omanu vakuavo.

Footnotes

Ale, “oku wengula ema.”
Ale, “oku nyula.”
Ale, “atavo alua.”
Ale, “ocitumbulukila.”
Ale, “ocitumbulukila.”