Ovilinga 16:1-40

  • Paulu o nõla Timoteo (1-5)

  • Ocinjonde culume u Makedonia (6-10)

  • Ludia wo ko Filipoi wa tava (11-15)

  • Paulu kuenda Sila va kapiwa vokayike (16-24)

  • Ukuakayike kuenda vakuepata liaye va papatisiwa (25-34)

  • Paulu o pinga ongecelo (35-40)

16  Paulu wa pitĩlavo ko Derbe lo ko Lustra. Oko, kua kala ondonge yimue yi tukuiwa Timoteo, okuti inaye u Yudea kuenda wa kala ondonge, pole, isiaye u Helasi,  kuenje vamanji vo Lustra lo vo Ikoniyu vo wimbila uvangi uwa.  Omo okuti Paulu wa yonguile oku enda la Timoteo, tete wo sevisa evamba mekonda lia va Yudea va kala kovitumãlo viaco, momo vosi va kũlĩhĩle okuti isiaye u Helasi.  Osimbu va kala oku linga ungende kalupale, va pitiya olonumbi via sokiyiwa lovapostolo kuenda akulu vo Yerusalãi.  Omo liaco, akongelo va amamako oku pamisiwa vekolelo loku livokiya eteke leteke.  Kuenje va pita vo Frugia lofeka yo Galatia, momo va tatekiwa lespiritu sandu oco ka va ka sapule ondaka kolupale luo Asia.  Eci va lokila ko Musia va seteka oku enda ko Bitunia, pole, espiritu lia Yesu ka lia va ecelelele.  Kuenje va pitahãla ko Musia, yu va lokila ko Torasi.  Vokuenda kuteke, Paulu wa mola ocinjonde cokuti—ulume umue u Makedonia wa talama, yu wo livondela hati: “Yokila ko Makedonia kuenda tu kuatise.” 10  Eci a mola ocinjonde caco, tua seteka oku enda ko Makedonia, loku sima okuti Suku wa tu tuma oku va kundila olondaka viwa. 11  Oku tunda ko Torasi tua enda lonaviyu toke ko Samotrake, pole keteke lia kuamamo tua enda ko Neapoli; 12  kuenje oku tundako tua enda ko Filipoi okuti imbo lia velapo vofeka yo Makedonia. Tua kala volupale luaco oloneke vimue. 13  Keteke Liesambata tua tundila kombundi oku enda kohulo yolui, kuna tua simĩle okuti kua kala ocitumãlo colohutililo, tua tumãla kuenje tua fetika oku sapela lakãi vamue va liongoluilako. 14  Ukãi umue o tukuiwa Ludia wo volupale luo Tuatera ukuakulandisa olonanga viohusu haeye ufendeli wa Suku, wa kala oku yevelela kuenje Yehova wa yulula utima waye oco a tave ovina Paulu a kala oku popia. 15  Eci eye kumue la vakuanjo yaye va papatisiwa, wa tu peya hati: “Nda ene vu ndi tenda okuti nda kolela Yehova, enjui kuenda kali konjo yange.” Kuenje eye wa tu ambata. 16  Osimbu tua kala oku enda kocitumãlo colohutililo, tua sanga ufeko umue upika wa kuatiwile londele yoku tãha. Eye wa eca onganyu yalua ku vacime caye omo liupange waye woku tukula eci ciya kovaso yoloneke.* 17  Ufeko waco wa kuama kuama Paulu kumue letu loku ­kaluka ­lolukandi hati: “Alume ava va kasi oku ku sapuili onjila yepopelo, akuenje va Suku Tõlo.” 18  Eye wa ci lingainga vokuenda kuoloneke vialua. Paulu wa ci suvuka, yu wo vandekela loku sapuila ondele hati: “Vonduko ya Yesu Kristu hu handeleka oku tunda vokuaye.” Vepuluvi liaco, haico ondele yo tunda. 19  Eci vacime caye va limbuka okuti ka va tambula vali onganyu, va kuata Paulu la Sila kuenje va va nanañanyaila pocitanda kolombiali. 20  Eci va pitĩla kolonganji, va popia vati: “Alume ava va kasi oku koka ombuanja yalua volupale luetu. Ovo va Yudea, 21  kuenda va kasi oku longisa oviholo ka via sungulukile kokuetu oco tu vi kuame, omo okuti tua va Roma.” 22  Kuenje owiñi wosi wa va katukila; noke yolonganji oku tola uwalo wavo, va tuma oco va tipuiwe lolombueti. 23  Noke yoku va tipula calua, va va kapa vokayike kuenda va handeleka ukuakayike oco a va lave ciwa okuti ka va tila. 24  Omo liocihandeleko caco, eye wa va kapa vonepa ya koka yokayike kuenda wa kuta ovolu avo kovikumbi. 25  Pole, vokati kuteke Paulu la Sila va kala oku likutilila loku sivaya Suku lovisungo kuenda olomandekua via va yeva. 26  Vocipikipiki kua pita ocilemawe cinene, yu ociseveto cokayike ca lisenga. Kuenje apito osi haico a yikuka kuenda alienge omanu vosi a kutuluka. 27  Eci ukuakayike a pasuka, yu a mola okuti apito okayike a kala upulule, wopa osipata yaye kuenda wa yonguile oku liponda, momo wa sima okuti olomandekua via tila. 28  Paulu wa kaluka lolukandi hati: “Ku ka lilemehe, momo vosi tu kasi mulo!” 29  Eye wa pinga ovimihi kuenje wa iñila, yu wa kekamẽla Paulu la Sila omo liusumba. 30  Eye wa va nena posamua loku popia hati: “A vacime cange, nye ndi sukila oku linga oco mopeliwe?” 31  Ovo vo sapuila vati: “Kolela Ñala Yesu kuenje o popeliwa, ove kumue la vakuanjo yove.” 32  Kuenje vo sapuila ondaka ya Yehova kumue la vosi vakuanjo yaye. 33  Kowola yaco yuteke eye wa va ambata kuenda wa sukula apute avo. Kuenje eye kumue la vakuanjo yaye yosi haico va papatisiwa. 34  Ukuakayike wa va nena konjo yaye, wa va tumãlisa komesa loku va ĩha okulia kuenje eye kumue la vakuanjo yaye va kuata esanju lialua omo va tava ku Suku. 35  Eci kua ca, komẽle, olonganji via tuma olondavululi oku popia vati: “Alume ava va va ece.” 36  Ukuakayike wa sapula olondaka viavo ku Paulu hati: “Olonganji via tuma alume oco kavali kene weciwi. Omo liaco, tundi, kuendi lombembua.” 37  Paulu wa va sapuila hati: “Ka tua kuatele eko,* pole, va tu tipuila kovaso owiñi, ndaño okuti tua va Roma, yu va tu kapa vokayike. Cilo va yongola oku tu upamo vuyombeki? Lalimue eteke! Ovo muẽle veye, va tu upemo.” 38  Olondavululi via sapula ondaka yaco kolonganji. Ovo va kuata usumba eci va yeva okuti alume vaco va Roma. 39  Kuenje veya, yu va va peya, noke yoku va nena posamua, va va pinga oco va tunde volupale. 40  Pole, va tunda vokayike, va enda konjo ya Ludia; noke yoku mola vamanji, va va kolisa kuenje va enda.

Footnotes

Ale, “ocituwa coku tãha.”
Ale, “ka tua sombisiwile.”