Ovilinga 15:1-41

  • Oku lihoyisa ko Antiokea omo lievamba (1, 2)

  • Ocitangi ci ambatiwa ko Yerusalãi (3-5)

  • Akulu vekongelo lovapostolo va liongoluila pamosi (6-21)

  • Ukanda wa tunda kosungu yakulu (22-29)

    • Oku yuvula osonde (28, 29)

  • Akongelo a vetiyiwa lukanda (30-35)

  • Paulu kuenda Barnaba va enda kolonjila via litepa (36-41)

15  Alume vamue va tunda vo Yudea, yu va fetika oku longisa vamanji vati: “Ka vu tẽla oku popeliwa, te wa seviwi evamba ndociholo ca Mose.”  Pole, eci pokati kavo la Paulu kuenda Barnaba peya onjuela loku lihoyisa kualua, ovo va sokiya okuti Paulu la Barnaba la vamue pokati kavo, va enda kovapostolo lakulu ko Yerusalãi oku tetulula ondaka yaco.*  Eci ekongelo lia va sindikila okacinãla kamue, alume vaco va amamako lungende wavo yu va pita vo Foinike lo vo Samaria kuenda va lombolola ndomo omanu vakualofeka va linga epongoloko kuenje ulandu waco wa sanjuisa vamanji vosi.  Eci va pitĩla ko Yerusalãi va tambuiwa locisola lekongelo, lovapostolo kuenda lakulu kuenje va lombolola ovina vialua Suku a linga vonduko yavo.  Pole, vamue va tiamẽlele kocisoko ca va Fariseo okuti va tava, va votoka kolomangu viavo loku popia vati: “Ovo te va seviwa evamba loku va handeleka okuti va pokola Kocihandeleko ca Mose.”  Ovapostolo lakulu va liongolola oco va kũlĩhĩse ocitangi caco.  Noke lioku lihoyisa calua, Petulu wa votoka yu wa va sapuila hati: “A vamanji, wa kũlĩhi ciwa okuti tunde koloneke viatete, Suku pokati kene wa nõlapo okuti komela wange oko vakualofeka va yevela olondaka viwa kuenje va tava.  Suku una wa kũlĩha ovitima, wa eca uvangi poku va ĩha espiritu sandu, ndeci a lingavo letu.  Eye ka lingile olonepele pokati ketu lavo, pole wa yelisa ovitima viavo lekolelo. 10  Nye vu setekela Suku poku kapa ovilemo polosingo violondonge, okuti ndaño vakukululu yetu ale etu ka tu tẽla oku vi ambata? 11  Etu puãi tu kuete ekolelo liokuti tu popeliwa lohenda ya piãla ya Ñala Yesu ndeci ovo.” 12  Ocimunga cosi cõhako kuenje va fetika oku yevelela Barnaba la Paulu, vana va kala oku va lomboluila olondimbukiso kuenda ovikomo* vialua Suku a linga vonduko yavo pokati ka vakualofeka. 13  Eci va mala oku vangula, Tiago wa kumbulula hati: “A vamanji, njeveleli. 14  Sumone wa lombolola ndomo Suku onjanja yatete a nõlele vakualofeka oco pokati kavo a nõle omanu va imbila uvangi wonduko yaye. 15  Eci ca lisoka lolondaka Viovaprofeto ndeci ca sonehiwa citi: 16  ‘Noke yovina evi niuka oco ndi tumbulule vali ombalaka* ya Daviti yina ya kupuka; ndi tumbululavo ovingululu viayo loku yi katula vali, 17  okuti omanu vana va supapo, va sandiliya Yehova kumue la vakualofeka vosi, la vana va tukuiwa londuko yange, oco Yehova a popia una o kasi oku linga ovina evi, 18  via kũlĩhĩwa tunde osimbu.’ 19  Si yongola* oku sakalaisa vakualofeka, vana va pongolokela ku Suku, 20  pole, ndi va sonehela oco va likandangiye kovina via vĩhisua loviteka, kevĩho liukahonga,* kovina via lekiwa ekõle* kuenda kosonde. 21  Tunde kosiahũlu volupale lolupale mua kala vana va imbila uvangi Mose, momo ovisonehua viaye via enda oku tangiwa lolukandi volosunangonga kasambata osi.” 22  Kuenje ovapostolo lakulu kuenda ekongelo liosi, va tuma ko Antiokea vana va nõliwa pokati kavo kumue la Paulu, la Barnaba; ovo va tuma Yuda wa tukuiwa Barsamba kuenda Sila haivo va kala asongui pokati ka vamanji. 23  Ovo va soneha kuenda va tuma kokuavo ndoco: “Ovapostolo lakulu, okuti vamanjene, va tuma ovilamo ku vamanji ko Antiokea, ko Suria kuenda ko Kilikiya okuti va tunda kolofeka! 24  Omo tua yeva okuti vamue pokati ketu vo sakalaisi lovina va popia, loku seteka oku vu nyõli,* ndaño ka tua va ĩhile onumbi yimue, 25  oco tua sokiya oku nõla alume loku va tuma kokuene kumue la vakuetu va soliwa okuti, Barnaba la Paulu, 26  haivo va kapele kohele omuenyo wavo vonduko ya Ñala yetu Yesu Kristu. 27  Tu kasi oku tumavo Yuda, la Sila, oco va ku lomboluili olondaka vimuamue. 28  Espiritu sandu letu tua tava okuti ka tu vu vokiyi ocilemo, tu u kisiki lika ovina vi sukiliwa ndeci: 29  oku lilava kovina via lumbiwa koviteka, kosonde, lovina via lekiwa ekõle* kuenda kevĩho liukahonga.* Nda vu lilava kovina evi, vu kala ciwa. Lalipo!” 30  Eci vosika alume vaco, va lokila ko Antiokea kuenje, ovo vongolola ocimunga cosi, yu va va ĩha ukanda. 31  Eci va u tanga, va sanjukila elembeleko liawo. 32  Omo okuti Yuda la Sila va kalavo ovaprofeto, va vetiya vamanji loku va kolisa lolondaka. 33  Noke yoku kalako otembo yimue, vamanji va liusika lavo lombembua kuenje va tiukila ku vana va va tumile. 34 ⁠ —hs-1— 35  Pole, Paulu la Barnaba va siala ko Antiokea oku longisa loku kunda olondaka viwa via Yehova, kumue la vamanji vakuavo. 36  Noke yoloneke vimue, Paulu wa sapuila Barnaba hati: “Tu tiukile, oku ka nyula vamanji va kasi valupale ana tua kundilile ondaka ya Yehova, oco tu tale ndomo va kasi.” 37  Kuenje Barnaba wa sokiya oku ambatavo Yoano wa tukuiwa Marko. 38  Pole, Paulu ka yonguile okuti eye enda lavo, momo wa litepele lavo ko Pamfulia kuenda ka endele lavo kupange. 39  Omo liaco, kua kala oku lihoyisa kualua kuenje va litepa; Barnaba wa ambata Marko, yu va enda lonaviyu toke ko Kupro. 40  Paulu wa nõla Sila kuenje noke yoku kundikiwa la vamanji ohenda ya piãla ya Yehova, va enda. 41  Eye wa pita ko Suria, ko Kilikiya oku kolisa akongelo.

Footnotes

Ale, “ocitangi.”
Ale, “ovilimbu.”
Ale, “onjo.”
Ale, “ocisimĩlo.”
Kelimi lio Helasi, porneia. Tala Elomboluilo.
Ale, “cimue ci pondiwa okuti osonde yaco ka yi pesiwa.”
Ale, “ovimuenyo viene.”
Ale, “cimue ci pondiwa okuti osonde yaco ka yi pesiwa.”
Kelimi lio Helasi, porneia. Tala Elomboluilo.