Ovilinga 14:1-28

  • Evokiyo kuenda elambalalo ko Ikoniyu (1-7)

  • Va tendiwa ndolosuku ko Lustra (8-18)

  • Paulu o puluka koku sosuiwa lovawe (19, 20)

  • Oku vetiya akongelo (21-23)

  • Oku tiukila ko Antiokea yo ko Suria (24-28)

14  Ko Ikoniyu Paulu la Barnaba va iñila vosunangonga ya va Yudea kuenda va vangula lonjila yimue okuti owiñi wa va Yudea la va Helasi, va tava.  Pole, va Yudea vana ka va tavele, va tutuminya omanu* vakualofeka oco va suvuke vamanji.  Kuenje va kalako otembo yalua oku vangula lutõi kuenda unene wa Yehova, una wa imba uvangi wondaka yohenda yaye ya piãla, poku ecelela okuti ovo va linga olondimbukiso kuenda ovikomo.*  Kuenje owiñi volupale wa litepa; vamue va kala konẽle ya va Yudea, vakuavo konẽle yovapostolo.  Eci omanu vakualofeka la va Yudea kuenda olombiali viavo va seteka oku va sepula loku va sosola lovawe,  ovo va ci yeva kuenda va tilila kalupale o Lukaonia, ko Lustra, ko Derbe kuenda kovaimbo a sungueko.  Oko va kundila olondaka viwa.  Vo Lustra mua kala ulume umue okuti wa fa ovolu. Eye ocilema tunde koku citiwa kuenda ka la enda.  Ulume waco wa tumãla oku yevelela osimbu Paulu a kala oku vangula. Kuenje Paulu oku u vandekela loku limbuka okuti eye wa kolelele okuti o kaya, 10  wa popia lolukandi hati: “Votoka.” Ulume waco wa votoka yu wa fetika oku enda. 11  Owiñi poku mola eci Paulu a linga, va kaluka kelimi lio Lukaonia vati: “Olosuku via pongoloka omanu kuenda via lokila kokuetu!” 12  Kuenje va tukula Barnaba hati, Sewusi, pole, Paulu vo tukula hati, Hermes, momo eye wa kala oku linga ohundo. 13  Onembele ya Sewusi ya kala koku iñilila kuolupale kuenda ocitunda caco ca nena olongombe lekolowa liolonelẽho polombundi, momo wa yonguile oku eca ovilumba kumue lowiñi. 14  Eci ovapostolo Barnaba la Paulu va ci yeva, va tola uwalo wavo kuenda va tunda pokati kowiñi loku kaluka vati: 15  “Ene alume, momo lie vu lingila ovina evi? Etu letuvo tumanu kuenda tu kuetevo ovitangi ndene. Tu kasi oku u kundili olondaka viwa oco vu liwekipo oku linga ovina vĩvi okuti vu fendela Suku o kasi lomuenyo, una wa lulika ilu, losi, lokalunga lovina viosi vi kasimo. 16  Kovitumbulukila vio kosimbu, eye wa ecelela okuti olofeka viosi vi endela volonjila viavo muẽle, 17  haimo lumue, ka liwekelepo oku va ĩha uvangi omo wa linga ovina viwa poku wĩhi ombela ya tunda kilu, apako vovovo alio, loku yukisa ovitima viene lokulia kuenda esanju.” 18  Ndaño loku popia ovina evi, ka va tẽlele oku tateka owiñi oku va ĩha ovilumba. 19  Pole, va Yudea va tunda ko Antiokea lo ko Ikoniyu va tutuminya owiñi, yu va sosola Paulu lovawe kuenda vo kokela kosamua yolupale loku sima okuti wa fa. 20  Kuenje eci olondonge vio ñuala, eye wa votoka yu wa iñila volupale. Keteke lia kuamamo wa enda la Barnaba ko Derbe. 21  Noke yoku kunda olondaka viwa kolupale luaco loku linga olondonge vialua, va tiukila ko Lustra, ko Ikoniyu kuenda ko Antiokea. 22  Ovo va kolisa olondonge* kuenje va vi vetiya oku amamako vekolelo, loku popia vati: “Te tu iñila Vusoma wa Suku lohali yalua.” 23  Ovo va nõla akulu vakongelo osi, va linga ohutililo loku likandangiya okulia kuenda va va kundika ku Yehova una ovo va tava. 24  Noke va pita ko Pisidia, yu va enda ko Pamfulia, 25  kuenje noke yoku kunda ondaka ko Perga, va lokila ko Atalea. 26  Oku tundako va enda lonaviyu toke ko Antiokea, kuna va kundikiwilue ohenda ya piãla ya Suku, omo liupange va tẽlisa. 27  Eci va pitĩla, va liongolola lekongelo kuenda va lombolola ovina vialua Suku a linga vonduko yavo, leci a yuluila vakualofeka epito liekolelo. 28  Kuenje oko va kala otembo yimue lolondonge.

Footnotes

Ale, “ovitima viomanu.”
Ale, “ovilimbu.”
Ale, “ovitima violondonge.”