Ovilinga 13:1-52

  • Barnaba kuenda Saulu va tumiwa ndolomisionaliu (1-3)

  • Upange woku kunda ko Kupro (4-12)

  • Ohundo ya Paulu ko Antiokea yo ko Pisidia (13-41)

  • Ocitumasuku coku kundila vakualofeka (42-52)

13  Vekongelo lio ko Antiokea mua kala ovaprofeto kuenda alongisi ndeci: Barnaba, Sumone haeye wa tukuiwa Katekãva,* Lukiu wo ko Kurene, Manane wa pindisiwa la Herode ombiali kuenda Saulu.  Osimbu va kala oku fendela* Yehova loku likandangiya okulia, espiritu sandu lia popia hati: “Ndi nõleli Barnaba la Saulu kupange nda va kovongela.”  Noke yoku likandangiya okulia loku likutilila, va va kapa ovaka avo kuenje va va tuma oku enda.  Alume ava okuti va songuiwa lespiritu sandu, va lokila ko Selukia kuenje eci va tundako va endela vonaviyu toke ko Kupro.  Eci va pitĩla ko Salami, va fetika oku kundila ondaka ya Suku volosunangonga via va Yudea. Ovo va kalavo la Yoano ndoñuatisi.*  Eci va ñuala ocifuka cosi toke ko Pafu, va lisanga lulume umue u Yudea okuti onduko yaye Bar-Yesu, una wa kala ocimbanda haeye uprofeto wesanda.  Eye wa kala kumue lepalanga* Sergio Paulu, ulume umue ukualondunge. Sergio Paulu wa vilikiya Barnaba la Saulu, momo wa yonguile oku yeva ondaka ya Suku.  Pole, Elumasi ocimbanda (okuti oco ci lomboloka onduko yaye) wa fetika oku tamãlala lavo, momo wa seteka oku konyuisa epalanga oco ka ka kolele Ñala.  Noke Saulu o tukuiwavo Paulu, weyukisua lespiritu sandu, yu wo tulukila, 10  loku popia hati: “Olume weyuka elimbi kuenda ovina viosi vĩvi, vumõla Eliapu, unyali wovina viosi viesunga, ku liwekapo hẽ oku pengisa olonjila via sunguluka via Yehova? 11  Tala! Eka lia Yehova li ku wila, o linga omeke, ku moli ekumbi vokuenda kuotembo yimue.” Vonjanja yaco haico ovaso aye a vuvala kuenje wa fetika oku papayata oku vanjiliya umue u kuatela peka. 12  Oco, epalanga poku mola eci ca pita, wa tava, momo wa komõha alongiso a Yehova. 13  Paulu kumue lalume va kala laye, va endela vonaviyu oku tunda ko Pafu kuenje va pitĩla ko Perga ko vo Pamfulia. Pole, Yoano wa litepa lavo, yu wa tiukila ko Yerusalãi. 14  Ovo va tunda ko Perga va enda ko Antiokea ko Pisidia. Kuenje va iñila vosunangonga keteke Liesambata, yu va tumãla. 15  Noke yoku tanga Ocihandeleko Lovaprofeto, asongui vosunangonga va tuma oku va sapuila vati: “A vamanji, nda vu kuete ondaka yimue yoku lembeleka omanu, yi popi.” 16  Oco Paulu wa votoka, wa linga ondimbukiso leka liaye loku popia hati: “Ene alume va Isareli, lene wa sumbili Suku, yeveleli. 17  Suku yomanu ava va Isareli wa nõla vakukululu yetu yu wa kemalisa omanu vaco osimbu va kala ovingendeleyi vofeka Yegito kuenje wa vopamo lokuokuo kua pama. 18  Kuenje vokuenda kuanyamo a soka 40 wa pandikisa lavo vekalasoko. 19  Noke yoku nyõla olofeka epanduvali ko Kanana, wa tepaisa ofeka yaco ndocipiñalo. 20  Cosi eci ca lingiwa vokuenda kueci ci soka 450 kanyamo. “Noke yovina evi, eye wa va ĩha olonganji toke ku Samuele uprofeto. 21  Oku upisa opo va pinga osoma yimue kuenje Suku wa va ĩha Saulu omõla a Kisi, ukuepata lia Benjamini, oco a va viale vokuenda kuanyamo 40. 22  Noke yoku upako, Suku wa katula Daviti oco a linge osoma, una a imbila uvangi loku popia hati: ‘Nda sanga Daviti omõla a Jese, omunu umue wa sanjuisa utima wange; haeye o linga ovina viosi ndi yongola.’ 23  Kocitumbulukila* culume waco, Suku wopako onjovoli ya va Isareli okuti Yesu, ndeci a likuminyile. 24  Osimbu omunu waco keyile, Yoano wa kundila omanu vosi va Isareli epapatiso ndondimbukiso yoku likekembela. 25  Pole, eci upange wa Yoano wa kala kesulilo, eye wa popia hati: ‘Nye vu sima, ame ame elie? Ame hameko una vu sima. Pole, u iya konyima yange, ame si sesamẽla oku u lula olohaku kolomãhi viaye.’ 26  “A vamanji, amãla vepata lia Avirahama kuenda vosi pokati kene okuti wa sumbili Suku, ondaka yepopelo eli ya tumiwa kokuetu. 27  Olonungi vio Yerusalãi lolombiali viavo ka via limbukile omunu waco, pole, eci vo pisa, ovo va tẽlisa ovina via vanguiwa lovaprofeto, vina vi tangiwa lolukandi asambata osi. 28  Omo okuti ka vo sangele leko lioku fa, va pinga ku Pilato oco vo ponde. 29  Eci va tẽlisa ovina viosi via sonehiwa viatiamẽla kokuaye, vo tulula kuti kuenje vo langeka veyambo. 30  Pole, Suku wo pindula kuava va fa, 31  kuenje vokuenda kuoloneke vialua wa molẽhela ku vana va endaenda laye oku tunda ko Galilea oku enda ko Yerusalãi. Ovo cilo va linga olombangi viaye komanu. 32  “Etu tu kasi oku ku sapuili olondaka viwa viohuminyo yina ya lingiwa ku vakukululu yetu. 33  Suku o kasi oku yi tẽlisila vokuetu tumãla vavo poku pindula Yesu; ndeci ca sonehiwa vosamo yavali citi: ‘Ove vumõlange; etaili nda linga isiove.’ 34  Kondaka yoku U pindula kuava va fa okuti ka futi vali, Eye wa popele hati: ‘Ndu muisi ocisola cange ca piãla, cina nda likuminyile ku Daviti ukuekolelo.’* 35  Eye wa popiavo vosamo yikuavo hati: ‘Ku ecelela okuti ufendeli wove o futa.’ 36  Daviti wa vumba Suku* vocitumbulukila caye, wa fa, wa kendiwila kumue la vakukululu yaye kuenda wa mola oku futa. 37  Handi vali, Yesu, una Suku a pindula ka muile oku futa. 38  “Eci ci kũlĩhĩwe kokuene, a vamanji okuti vonduko yomunu u, ongecelo yakandu yi sapuiwa kokuene, 39  okuti kovina viosi nda wa tendiwili okuti nda ka vu kuete eko Vocihandeleko ca Mose, wosi o kolela o tendiwa okuti ka kuete eko vonduko ya Yesu. 40  Omo liaco, lunguki okuti eci ca popiwa Vovaprofeto ka ciya kokuene: 41  ‘Ene alomembuli vanji, komõhi kuenda nyolẽhi, momo ñasi oku linga upange umue koloneke viene, upange una okuti ndaño umue wo u lomboluili ka vu u kolela.’” 42  Eci va kala oku tunda, omanu va pinga oco va va sapuile vali ovina evi Kesambata li kuamamo. 43  Kuenje, eci ohongele vosunangonga ya pua, va Yudea valua lolomongoloke, vana va enda oku fendela Suku, va kuama Paulu la Barnaba, vana okuti osimbu va vangula lavo, va va vetiya oku amamako oku kala vohenda ya piãla ya Suku. 44  Kesambata lia kuamamo omanu valua volupale vongoloka oco va yeve ondaka ya Yehova. 45  Eci va Yudea va mola owiñi, va kuata onya kuenda va fetika oku sepula loku patãla ovina Paulu a kala oku vangula. 46  Kuenje Paulu la Barnaba va va sapuila lutõi vati: “Ca sesamẽlele okuti ondaka ya Suku yi vanguiwa tete kokuene. Omo okuti ka wa yi taveli kuenda ene wa li tendi okuti ka vu sesamẽla omuenyo ko pui, cilo tu enda ku vakualofeka. 47  Momo Yehova wa tu handeleka hati: ‘Nda ku nõla oco o linge ocinyi ca vakualofeka okuti, o tuala epopelo kasulilo o kilu lieve.’” 48  Eci vakualofeka va ci yeva, va sanjuka kuenda va sivaya ondaka ya Yehova kuenje vosi vana vakuotima wa sungulukila omuenyo ko pui, va tava. 49  Kuenje, ondaka ya Yehova ya lisanduila vofeka yosi. 50  Pole, va Yudea va tutuiya akãi va kemãla vana va sumbilile Suku kuenje va fetika oku lambalala Paulu la Barnaba, loku va tundisa vofeka yavo. 51  Ovo va tutumuila oneketela yolomãhi viavo komanu kuenda va enda ko Ikoniyu. 52  Kuenje olondonge via amamako lonjolela kuenda veyukile espiritu sandu.

Footnotes

Lit., “Niger.”
Ale, “oku vumba kovaso owiñi.”
Ale, “ukuenje.”
Nguluvulu yolupale lumue luo ko Roma. Tala Elomboluilo.
Lit., “ombuto.”
Ale, “oku koleliwa.”
Ale, “wa linga ocipango ca Suku.”