Ovilinga 12:1-25

  • Tiago o pondiwa; Petulu o kapiwa vokayike (1-5)

  • Petulu o yovuiwa locikomo (6-19)

  • Herode o vetiwa lungelo (20-25)

12  Vokuenda kuoloneke viaco, Soma Herode wa fetika oku kuata vamue vekongelo loku va kangisa.  Eye wa ponda losipata Tiago manji a Yoano.  Eci a limbuka okuti ca sanjuisa va Yudea, wa tumavo asualali oco va kuate Petulu. (Ca kala koloneke Violombolo ka vi Kuete Etumbisa.)  Eye wa kuata Petulu, wo kapa vokayike, wo kundika kovimunga vikuãla viasualali okuti ocimunga locimunga ca kala lasualali vakuãla, momo eye wa yonguile oku u weca* komanu noke yo Paskoa.  Kuenje Petulu wa amamako oku kala vokayike, pole, ekongelo ka lia liwekeleko oku u likutililako ku Suku.  Kuteke waco eci Herode a yonguile oku u weca, Petulu wa kala oku pekela okuti, wa kutiwa lalienge pokati kasualali vavali kuenda olondavululi via kala pepito via amamako oku lava okayike.  Pole, tala! Ungelo wa Yehova wa talama kuenda ocinyi ca tuila vohondo yokayike. Wa veta Petulu pepati, wo pasula loku popia hati: “Votoka lonjanga!” Kuenje alienge a kutuluka kovaka aye.  Ungelo wo sapuila hati: “Wala kuenda itika olohaku viove.” Eye wa ci linga. Ungelo wo sapuila vali hati: “Wala ocikutu cove kuenda ñuame.”  Eye wa tunda, yu wo kuama, pole ka kũlĩhĩle okuti eci ungelo a kala oku linga cocili. Wa sima okuti wa kala oku mola ocinjonde. 10  Noke yoku pita ondavululi yatete leyi yavali, ovo va pitĩla pombundi yutale ya vandekela volupale kuenda ya va yulukila oyo muẽle. Eci va tunda, va enda lonjila yavo loku iñila vokololo yimue kuenje haico ungelo o sia. 11  Petulu noke yoku limbuka eci ca pita, wa popia hati: “Cilo nda kũlĩha okuti Yehova wa tuma ungelo waye kuenda wa njovola peka lia Herode lo kovina viosi va Yudea va lavokaile.” 12  Noke yoku ci limbuka, wa enda konjo ya Maria ina ya Yoano wa tukuiwa Marko, kuna kua kala valua va liongoluile oku likutilila. 13  Eci a totola kepito liombundi, upika umue ufeko o tukuiwa Rode, weya oku tala u wa totola. 14  Poku limbuka ondaka ya Petulu, wa sanjuka calua okuti ka yikuile epito, pole wa lupukila vokati, yu wa lombolola okuti Petulu o tãi pombundi. 15  Va popia laye vati: “Ove vuyui.” Pole, eye wa lipilika hati, eye muẽle. Ovo vati: “Ungelo waye.” 16  Petulu wa amamako oku totola kepito. Eci va yikula epito, vo mola kuenje va lisalukako. 17  Eye wa linga ondimbukiso leka oco võhe kuenda wa va lomboluila lutate ndomo Yehova o upa vokayike, loku popia hati: “Ka sapuili ovina evi ku Tiago kuenda vamanji.” Kuenje wa tunda, yu wa enda kocitumãlo cikuavo. 18  Eci kua ca omẽle, pokati kasualali pa kala onjuela yalua omo lieci ca pita la Petulu. 19  Herode wo sandiliya calua kuenje ko sangele, yu wa konomuisa olondavululi kuenda wa tuma oku va kangisa; noke Herode wa tunda ko Yudea, wa lokila ko Kaisarea, oko a kala otembo yimue. 20  Eye wa temele* lomanu vo ko Turo la va Sidono. Eci ovo va linala la Blasto ukuenje wohama yonjo ya soma, veya ku Herode lutima umuamue, loku pinga ombembua, momo ofeka yavo ya enda oku tekuiwa lokulia kuofeka ya soma. 21  Eteke limue, Herode wa wala uwalo wusoma, wa tumãla komangu yekanga kuenda wa va lingila ohundo. 22  Pole, omanu va liongolola va kaluka vati: “Ondaka eyi yo suku, hayomunuko!” 23  Vocipikipiki ungelo wa Yehova wo veta, momo ka ecele ulamba ku Suku, noke wa liwa lapuka kuenje wa fa. 24  Ondaka ya Yehova ya amamako oku kula kuenje omanu valua va tava. 25  Pole, Barnaba la Saulu noke yoku tuala ekuatiso ko Yerusalãi, va tiuka, yu va ambata Yoano o tukuiwa Marko.

Footnotes

Ale, “oku u tuala kesombiso.”
Ale, “oku yaka.”