Ovilinga 11:1-30

  • Petulu o lomboluila ovapostolo (1-18)

  • Barnaba kuenda Saulu ko Antiokea yo ko Suria (19-26)

    • Ceci olondonge via tukuiwa tete okuti Akristão (26)

  • Agabo o tukula onjala ya laikele oku iya (27-30)

11  Ovapostolo kuenda vamanji va kala vo Yudea, va yeva okuti omanu vakualofeka va tavavo kondaka ya Suku.  Pole, eci Petulu a lamanela ko Yerusalãi, vakuakuvetiya evamba va fetika oku u pisa,*  loku popia hati: “Ove wa endele konjo yalume vamue okuti ka va seviwile evamba loku lia kumue lavo.”  Kuenje Petulu wa va lomboluila cosi hati:  “Ame nda kala volupale luo Yopa oku likutilila kuenje vocinjonde nda kuata, nda mola cimue* ca kala oku loka kilu ndelasola liovalatanya lia lowisiwa lasusu akuãla kuenje lieya kokuange.  Eci nda livanja lutate nda mola ovinyama viovolu akuãla vio kilu lieve, lovinyama via tema levi vi likoka posi* kuenda olonjila vio kilu.  Noke nda yevavo ondaka ya popia lame hati: ‘A Petulu, votoka, vi ponda kuenda lia!’  Pole, nda kumbulula siti: ‘Sio, a Ñala, momo vomela wange ka mua la iñila cimue ca vĩha ale ceci ka ca yelisiwile.’  Kilu kua yevala ondaka onjanja yavali ya tambulula hati: ‘Ku ka tukule ovina Suku a yelisa okuti via vĩha.’ 10  Ondaka yaco ya pituluiwa onjanja yatatu kuenda ovina viosi via ambatiwa vali kilu. 11  Kuenje vonjanja yaco, alume vatatu va pitĩla konjo tua kala, va tunda ko Kaisarea, va tumiwa kokuange. 12  Noke espiritu lia ndi sapuila oco ngende lavo, okuti si kuata atatahãi. Vamanji epandu va ndi sindikila kuenje tua iñila vonjo yulume waco. 13  “Eye wa tu sapuila ndomo a mola ungelo wa talama vonjo yaye leci a vangula hati: ‘Tuma alume ko Yopa oku vilikiya Simono o tukuiwa Petulu, 14  kuenje oku sapuila ovina viu ku popela ove kumue la vakuanjo yove.’ 15  Eci nda fetika oku vangula, espiritu sandu lia va wila ndeci lia tu wilavo kefetikilo. 16  Vepuluvi liaco nda ivaluka olondaka via Ñala, ndeci a popaile hati: ‘Yoano wa papatisa lovava, pole, ene vu papatisiwa lespiritu sandu.’ 17  Nda Suku, wa eca ­ocali kokuavo ndeci a tu ĩha omo tua tava ku Ñala Yesu Kristu, ame elie okuti ndi tamalãla la Suku?”* 18  Eci ovo va yeva ovina evi, va liwekako oku tamalãla* kuenda va sivaya Suku loku popia vati: “Suku wa ecelelavo okuti omanu vakualofeka va likekembela akandu avo oco va kuate omuenyo.” 19  Vana va sandokaile omo lielambalalo lia votuiwa ku Stefano va enda toke ko Foinike, ko Kupro kuenda ko Antiokea pole, va kundila lika ondaka ku va Yudea. 20  Pokati kavo pa kala alume vamue va tundile ko Kupro, ko Kurene, yu veya ko Antiokea kuenje va fetika oku sapela lomanu va vangula o Helasi, loku kunda olondaka viwa via Ñala Yesu. 21  Kuenje eka lia Yehova lia kala lavo kuenda owiñi walua wa tava yu va pongolokela ku Ñala. 22  Ondaka yatiamẽla kokuavo ya lisanduila kakongelo osi vo Yerusalãi kuenje va tuma Barnaba ko Antiokea. 23  Eci eye a pitĩla, wa mola ohenda ya piãla ya Suku kuenje wa sanjuka yu wa fetika oku vetiya vosi oku amamako vu Ñala lutima wosi; 24  momo wa kala omunu uwa haeye we yukile espiritu sandu lekolelo. Kuenje owiñi walua wa tava ku Ñala. 25  Eye wa enda ko Tarso oku ka sandiliya Saulu. 26  Eci o sanga, wo nena ko Antiokea. Eci pa pita unyamo, va liongolola lavo kekongelo kuenda va longisa owiñi walua kuenje ko Antiokea oko tete olondonge via tambuila onumbi ya Suku yoku tukuiwa okuti Akristão. 27  Koloneke viaco, ovaprofeto va tunda ko Yerusalãi oku enda ko Antiokea. 28  Umue pokati kavo wa tukuiwa Agabo wa votoka, yu wa vangula vonduko yespiritu okuti onjala yalua ya laikele oku iya voluali luosi, ndeyi ya pita koloneke via Kaludio. 29  Kuenje olondonge via sokiya okuti omunu lomunu eca ndeci a tẽla oco ku tumiwe ekuatiso ku vamanji va tungile vo Yudea; 30  eci oco va linga, ekuatiso liaco va li tuma kakulu peka lia Barnaba kuenda Saulu.

Footnotes

Ale, “oku hoya.”
Lit., “ocikuata.”
Ale, “apuka.”
Ale, “oku tateka onjila ya Suku?”
Lit., “võhako.”