3 Yoano 1:1-14

  • Ocilamo kuenda ohutililo (1-4)

  • Epandiyo ku Gaio (5-8)

  • Deotrefe ukuepela (9, 10)

  • Uvangi uwa wa Demetrio (11, 12)

  • Esokiyo lioku nyula kuenda ovilamo (13, 14)

 Ame ndukulu,* ndi sonehela Gaio wa soliwa haeye ndi sole calua.*  A manji wa soliwa, ndi likutilila okuti kovina viosi o kala ciwa* kuenda o kuata uhayele uwa, ndeci omuenyo wove u kasi ciwa.  Omo liaco, nda sanjuka calua eci vamanji veya kuenda va imba uvangi wokuti wa kakatela kocili, ndeci o kasi oku endela vocili.  Eci ndi yeva okuti: omãla vange va kasi oku endela vocili, ci ndi sanjuisa* calua.  A manji wa soliwa, kovina viosi o lingila vamanji kuenda akombe, o kasi oku linga upange uwa,  momo ovo va imba uvangi wocisola o kuetele ekongelo. Va kuatisa* kungende wavo lonjila yimue yi sanjuisa Suku.  Ovo va enda mekonda lionduko ya Suku, okuti ka va tambuile cimue ku vakualofeka.  Tu sesamẽla oku yekisa omanu vaco locisola, okuti tu talavayela kumosi vocili.  Ndi sonehela cimue ekongelo, puãi Deotrefe una o sole oku likapa pomangu yatete pokati kavo, cosi tu popia ka ci sumbilile. 10  Omo liaco, eci njiya, ndi situlula ovilinga viaye vioku tu lundila* lolondaka vĩvi. Handi vali, eye ka sanjukile lovina evi, ndaño oku yekisa vamanji lesumbilo; kuenda vana va yongola oku va yekisa, eye wa enda* oku va tateka loku va tundisa vekongelo. 11  A manji wa soliwa, ku ka setukule eci cĩvi, puãi setukula eci ciwa. Una o linga eci ciwa wa tunda ku Suku. Pole, una o linga eci cĩvi ka la kũlĩha Suku. 12  Vamanji vosi va imbila uvangi uwa Demetrio kuenda eye wa ambata omuenyo u li tava locili. Letuvo tu ci imbila uvangi kuenda ove wa kũlĩha okuti uvangi tu eca, wocili. 13  Ñuete ovina vialua vioku ku sonehela, pole, si yongola oku ku vi sonehela lotinda kuenda opena. 14  Puãi ndi lavoka oku ku mola, oco tu sapele polo la polo. Ombembua yi kale love. Akamba va ku tumisa ovilamo. Lamisapo akamba onduko konduko.

Footnotes

Ale, “Ukulu wekongelo.”
Ale, “ndu solele vocili.”
Ale, “oku suñamisa onjila.”
Ale pamue, “esunga lioku pandula.”
Ale, “o linga ciwa.”
Lit., “oku popia olondaka vĩvi viatiamẽla kokuetu.”
Ale, “oku amamako; ca kala ocituwa caye.”