2 Va Korindo 8:1-24

  • Oku konguila olombanjaile Akristão va Yudea (1-15)

  • Tito o tumiwa ko Korindo (16-24)

8  A vamanji, cilo tu yongola okuti wu kũlĩhi eci catiamẽla kohenda ya piãla ya Suku ya eciwa kakongelo o ko Makedonia.  Eci va nyikiwa lohali ya piãla, va lekisa esanju lialua kuenda ndaño luhukũi walua va eca olombanjaile vi supoka.  Ndi va imbila uvangi wokuti olombanjaile va eca vi pitahãla leci va tẽla,  osimbu okuti va tu pinga lolupili oco va kuatevo esumũlũho lioku eca olombanjaile kuenda oku kuatisa olosandu.  Ka tua ci lavokaile, pole, ovo tete va lieca olumue ku Ñala kuenda kokuetu locipango ca Suku.  Kuenje eci ca tu ecelela oku vetiya Tito oco a malusule oku tambula olombanjaile viene, momo eye wa fetikavo lupange waco pokati kene.  Ndeci vu supoka kovina viosi, kekolelo, kondaka, kukũlĩhĩso, kombili yalua kuenda kocisola tu vu kueteli, ci supokevo koku eca olombanjaile evi viocisola.  Si kasi oku ci popia ndonumbi, pole, ndi ci popela oku sokisa ombili yene leyi ya vakuavo kuenda oku seteka nda ocisola cene cocili ale sio.  Momo nda kũlĩha ohenda ya piãla ya Ñala yetu Yesu Kristu, okuti ndaño wa kala ohuasi wa linga ohukũi omo liene, okuti vu linga olohuasi ndaño vulohukũi. 10  Kondaka eyi ngeca ocisimĩlo cange: Oco vu kuatisiwi omo okuti kunyamo wa pita ka wa kuateli lika ocisimĩlo, pole, wa lekisivo onjongole yoku ci linga. 11  Cilo, tẽlisivo eci wa fetiki oku linga, okuti onjongole yene yoku ci linga yi tẽlisiwa lovina vu kuete. 12  Nda tete kuli onjongole, ca sunguluka okuti omunu eca eci a kuete, haceciko omunu ka kuete. 13  Momo si yongola okuti ku vakuene ci leluka, pole, kokuene ci tĩla; 14  puãi kovisupe vu kuete cilo vu kuatisa vana ka va kuete kuenda ovo kovisupe viavo vo kuatisivo kekambo liene, ci lomboloka oku likuatisa pokati. 15  Ndeci ca sonehiwa citi: “Omunu ongolola calua, ka kuete eci ca supa kuenda u ongolola citito ka kuete eci ca kamba.” 16  Pandu pandu ku Suku, omo a kapa vutima wa Tito esakalalo limuamue tu ku kueteli, 17  momo eye omo lievetiyo a tambula kuenda omo liombili yaye, wa lieca olumue oku iya kokuene. 18  Pole, tu kasi oku u tuma la manji umue okuti oluhimo luaye kuenda olondaka viwa vi kasi oku lisanduila kakongelo osi. 19  Eye wa nõliwavo lakongelo oco a ende kumue letu kovongende oku eca ombanjaile oku muisa ulamba Ñala kuenda oku lekisa onjongole yetu yoku kuatisa. 20  Tu kasi oku yuvula okuti umue o tu pisa omo liombanjaile eyi yocisola tu kasi oku eca. 21  Momo tu kasi oku ‘tata ovina viosi lesunga, ha kovasoko lika a Yehova, pole, tu ci lingilavo kovaso omanu.’ 22  Omo liaco, tu kasi oku tuma kumue lavo manji umue tua limbuka okuti ukuambili kovina vialua, pole, cilo ombili yaye ya livokiya omo liekolelo o kueteli. 23  Nda vu yongola oku kũlĩha cimue catiamẽla ku Tito, eye ekamba liange kuenda oñuatisi yange koku u vumbi; ale nda vu yongola oku kũlĩha cimue catiamẽla ku vamanjetu, ovo ovapostolo vakongelo haivo ulamba wa Kristu. 24  Kuenje lekisi ocisola cene kokuavo kuenda esunga lieci tuo lipandeleli kakongelo.

Footnotes