2 Va Korindo 6:1-18

  • Ohenda ya piãla ya Suku helivovako (1, 2)

  • Upange woku kunda wa Paulu u lomboluiwa (3-13)

  • Ko ka likutili kokanga ka ya lisokele (14-18)

6  Poku talavaya kumosi laye, tu u lunguli okuti ko ka tavi ohenda ya piãla ya Suku elivova.  Momo eye wa popia hati: “Kotembo ya sunguluka nda ku yeva kuenda keteke lieyovo nda ku kuatisa.” Tala! Yilo oyo otembo ya sunguluka. Tala! Lilo olio eteke lieyovo.  Ka tu lingi cimue ci koka ocilondokua, sanga upange wetu u sepuiwa;  pole, kovina viosi tu imba uvangi wokuti tulondingupange via Suku, kepandi tua piãla, kohali, kotembo yesukila, kovitangi,  koku tipuiwa, volokayike, konjuela, kupange walua, loku pumba otulo kovoteke, koku kala onjala;  koku pua atondelo, lukũlĩhĩso, koku pandikisa, koku unjuka, lespiritu sandu, locisola hacombambeko,  koku vangula ocili, lunene wa Suku; lovimalẽho viesunga peka liondio kuenda liepĩli,  loku kemainyiwa kuenda oku lavisiwa, lulandu ũvi kuenda ulandu uwa. Etu ndaño tu tendiwa ndolohembi, haimo tuakuacili,  ndaño okuti ka tua kũlĩhĩwile, haimo tua kũlĩhĩwa, ndaño tu tendiwa ndava va fa, haimo tu kasi lomuenyo, ndaño tu kangisiwa, haimo ka tu pondiwa, 10  ndaño lesumuo, pole, tua sanjuka, ndaño tulohukũi, tua kuatisa valua oku linga olohuasi, ndaño ka tu kuete cimue, haimo tu kuete ovina viosi. 11  Tuo wasameli omẽla wetu a va Korindo, kuenda tuo yikuili ovitima vietu. 12  Etu ka tuo likaleli ocisola cetu, pole, ene wa tu likali ocisola cene. 13  Nambulula—poku popia lene ndomãla vange okuti—yikuli ovitima viene. 14  Ko ka likutili kokanga ka ya lisokele lava havakuetavoko. Esunga li kuete ukamba we leci hacesungako? Ale, ocinyi ci kuete ukamba we lowelema? 15  Kristu o kuete ukamba we la Beliale? Ale, ukuetavo o livala ukamba we lu hukuetavoko? 16  Onembele ya Suku, yi tava ndati koviteka? Momo etu tunembele ya Suku o kasi lomuenyo; ndeci Suku a popia hati: “Ndi tunga pokati kavo kuenda ngendaila pokati kavo, ndinga Suku yavo kuenje ovo va linga omanu vange.” 17  “‘Omo liaco, tundi pokati kavo, litepi lavo,’ oco Yehova a popia ‘kuenda liweki oku lamba kovina via vĩha’”; “‘kuenje ndu tambuli.’” 18  “‘Ndinga isiene kuenje vu linga omãla vange valume, lomãla vange vakãi,’ oco ca popia Yehova Ukuonene Wosi.”

Footnotes