2 Va Korindo 2:1-17

  • Onjongole ya Paulu yoku nena esanju (1-4)

  • Ukuekandu ecelua kuenda o tambuiwa (5-11)

  • Paulu ko Torasi kuenda ko Makedonia (12, 13)

  • Oku kunda, oku sambiliya eyulo (14-17)

    • Ka tulondandisiko viondaka ya Suku (17)

2  Nda sokiya vutima wange okuti siya vali kokuene lesumuo.  Momo nda ndo sumuisi, helie vali o ndi sanjuisa nda ha yunako nda sumuisa?  Kuenje nda soneha eci nda linga, okuti eci njiya si sumuisiwa la vana nda sanjuisa, momo nda kolela okuti eci ci ndi sanjuisa cu ku sanjuisivo vosi yene.  Ndo soneheli lohali yalua, levalo vutima kuenda asuelẽla, sia ci lingilile oku wu sumuisi, pole, nda ci lingila oco wu limbuki ocisola calua ndu kueteli.  Nda umue wa koka esumuo, ka sumuisile ame, te vosi yene—pole, si yongola oku vangula calua catiamẽla kondaka eyi.  Eyambulo eli lia eciwa lomanu valua, li tẽla komunu waco;  puãi cilo, te wo weceli locisola loku u lembeleka, oco eye ka ka fe lesumuo lialua.  Kuenje ndu pingi okuti u kuatisi oku limbuka ocisola ene wu kueteli.  Eli olio esunga lieci ndo soneheli: ci kale nda vu pokola kovina viosi, ale sio. 10  Nda wa eceli omunu umue omo liocina cimue cĩvi, lamevo ndu wecela. Pole, eci nda ecela (nda nda ecela ocina cimue cĩvi) ndo ceceli mekonda liene kovaso a Kristu, 11  okuti ka tu yapuisiwa la Satana, momo ka tu kasi lonumbi yatutu aye. 12  Eci nda pitĩla ko Torasi oku kunda olondaka viwa viatiamẽla ku Kristu, kua njulukila epuluvi kupange wa Ñala, 13  puãi utima wange ka wa tulile omo sia sangele manjange Tito. Kuenje nda liusika lavo, noke nda enda ko Makedonia. 14  Tu eca olopandu ku Suku una o tu songuila oku yula kumue la Kristu, ndomanu va sambiliya eyulo. Ukũlĩhĩso wa Suku u kuete elemba liwa kuenda omo liupange wetu eye ecelela okuti elemba liaco li lisanduila komanu vo kolonepa viosi! 15  Ku Suku, etu tulemba liwa osimbu tu sapula ovina viatiamẽla ku Kristu pokati ka vana va popeliwa kuenda kuava va kasi oku nyoleha; 16  kuava va nyoleha elemba lioku fa li tuala koku fa, kuava va popeliwa elemba liomuenyo li tuala komuenyo. Helie wa loñoloha kovina viaco? 17  Etu tua loñoloha, momo ka tulondandisiko viondaka ya Suku ndeci omanu valua va linga, pole, tu popia ocili ndolonumiwa via Suku kovaso Aye kumue la Kristu.

Footnotes