2 Va Korindo 12:1-21

  • Ovinjonde via Paulu  (1-7a)

  • “Osongo ketimba” lia Paulu (7b-10)

  • Ovapostolo va kemala ka va mbelelepo (11-13)

  • Esakalalo lia Paulu ku va Korindo (14-21)

12  Ndi lipanda. Ocili okuti oku lipanda ka ku kuatisa, pole, ndi vetiyiwa oku lombolola ovinjonde kuenda asapulo a tunda ku Ñala.  Nda kũlĩha ulume umue vu Kristu, okuti 14 kanyamo a pita—wambatiwa toke kilu liatatu—nda letimba nda haletimbako si cĩ, Suku eye wa ci kũlĩha.  Nda kũlĩha ulume waco—nda letimba nda haletimbako si cĩ; Suku eye wa ci kũlĩha—  okuti wambatiwa kocumbo celau kuenje eye wa yeva olondaka ka vi popaiwa kuenda ka ca sungulukile omunu oku vi popia.  Ndi lipandela omunu waco, puãi ame muẽle si lipandi, te oku lipandela oku hongua kuange.  Momo ndaño ndi yongola oku lipanda, si lingi uveke, omo nda popia ocili. Pole, ndi yuvula oku ci linga, sanga umue o kolela vali kokuange okuti eci eye a muila, ale ceci a njevela ci sule,  omo liasituluilo alua nda tambula. Oco si ka lipande, kua nyĩhiwa osongo ketimba, okuti ungelo wa Satana o mbeta mbeta okuti si lipandi enene.  Kuenje nda livondela ku Ñala olonjanja vitatu, okuti osongo yaco yi nunda.  Puãi eye wa ndi sapuila hati: “Ohenda yange ya piãla yi tẽla kokuove, momo unene wange u suapo poku hongua.” Kuenje ndi sanjukila calua oku lipandela oku hongua kuange, okuti unene wa Kristu u mbuila ndombalaka. 10  Omo liaco, nda sanjukila oku hongua, oku fukĩlisua, usuke, oku lambalaliwa, ovitangi kuenda oku talisiwa ohali omo lia Kristu. Momo eci ndi hongua, oco ñuata vali ongusu. 11  Nda linga eveke. Wa ñisiki oku linga eveke, omo ka wa tukuili ovina viwa nda linga. Momo ndaño si silivila kovaso ene, ovapostolo vene va kemãla ka va mbelelepo. 12  Ocili okuti nda eca uvangi wokuti ndupostolo lepandi lialua, poku linga olondimbukiso, ovikomo kuenda ovina vi komõhisa. 13  Anga wa kuatisiwi citito okuti akongelo akuavo a velapo kuenda ame muẽle nda linga ocilemo kokuene? Ngeceli ekandu liange. 14  Yilo oyo onjanja yatatu ñasi oku iya kokuene kuenje siu lingili vali ocilemo. Momo si sandi ovina viene, puãi ndu sandi ene; momo omãla havoko va siliyila olonjali viavo, pole, olonjali ovio vi siliyila omãla vavo. 15  Momo ame ndi sanjukila oku pesila cosi cange kokuene. Nda ame ndu soli calua, ame muẽle hẽ ndi soliwa citito? 16  Ndaño oco, sia kaile ocilemo kokuene. Haimo lumue ene wa popi hati, nda kala “ukuelimbi” kuenda ndo pundi “latutu.” 17  Anga ndo pundi cimue pokati kava nda tumile kokuene? 18  Nda tuma Tito la manji umue. Anga Tito wo pundi cimue? Ka tua endaile hẽ lutima umuamue? Ovituwa vietu hẽ havimuamueko? 19  Ene hẽ vu sima okuti tu kasi oku liyovuisa kokuene? Etu tuloñame via Kristu kuenda tu kasi oku vangula ocili kovaso a Suku. A vamanji wa soliwi, cosi tu linga, tu ci lingila oku wu kolisi. 20  Momo ñasi lohele yokuti eci njiya siu sangi ndeci nda panga kuenda ame si kala ndeci ene vu yongola, pole, ñuetevo ohele yoku sanga ovama, onya, ovikumbiti, olonepele, olombonde, oku sokola, olonyeño, epela kuenda onjuela. 21  Pamue eci njiya vali, Suku yange o ndi sepula kovaso ene, kuenje ndi lilila valua va linga ekandu okuti ka va likekembelele keliño liavo, kevĩho liukahonga kuenda umbondo va lingainga.

Footnotes