2 Va Korindo 11:1-33

  • Paulu kuenda ovapostolo va kemala (1-15)

  • Ohali ya Paulu omo lioku kala upostolo (16-33)

11  Ndi yongola okuti vu pandikisa kokoveke kange. Pole, ene vu kasi oku pandikisa lame!  Ame ndo tati ciwa ndeci Suku a linga, momo ndo likuminyi oku weci kolohuela kulume umosi ndufeko wosombo eciwa ku Kristu.  Puãi ñuete ohele yokuti ndeci onyõha ya yonja Eva latutu ayo, ovitima viene vi yapuisiwa kesunguluko kuenda koku liyelisa kovituwa Kristu a sesamẽla.  Momo nda kuiya umue o kunda Yesu wiñi okuti una tua kunda hayeko, ale vu tambula espiritu likuavo okuti lina wa tambuli halioko, pamue olondaka viwa viñi okuti vina wa tavi havioko, ene vu tava ño lonjanga.  Ndi sima okuti ame si sule, okuti ovapostolo vene va kemãla va mbelapo.  Ndaño sia loñolohele koku vangula, pole, kukũlĩhĩso si sule; momo kolonepa viosi tuo situluili ovina viosi.  Anga nda linga ekandu poku liketisa okuti ene vu kemalisua omo ndo kundili olondaka viwa via Suku ocali?  Kakongelo akuavo nda punda poku tava oku tambula olombanjaile oco ndu kuatisi.  Eci nda kala lene ndaño nda sukile, pole, sia sakalasaile umue okuti o nekula, momo vamanji va tunda ko Makedonia va ñuatisa calua leci nda sukilile. Nda yuvula oku wu sakalaisi kuenje ndamamako oku ci linga. 10  Ndeci ocili ca Kristu ci kasi vokuange, si liwekapo oku lipanda volofeka vio Akaya. 11  Momo lie sio sakalasaili? Anga momo siu soli? Suku wa kũlĩha okuti ndu soli. 12  Puãi cilo ndamamako leci ñasi oku linga, okuti ndi tateka vana va sanda esunga lioku lisokisa letu kovina va kasi oku lipandela. 13  Momo omanu vaco ovapostolo vesanda, olonalavayi vieyuka elimbi, va liluvikiya ovo muẽle okuti ovapostolo va Kristu. 14  Kuenje ka ci komõhisa, momo Satana o liluvikiya ndungelo wocinyi. 15  Ka ci komõhisa nda oloñuatisi viaye vi liluvikiyavo ndoloñuatisi viesunga. Puãi esulilo liavo li lisoka lovilinga viavo. 16  Mopia vali siti: Lomue ka ka sime okuti ndiveke. Ndaño oco vu sima, nambuli ño ndeveke, okuti lamevo ndi lipanda naito. 17  Eci mopia ceci, si kasi oku kuama ongangu ya Ñala, puãi ndi popia ndeveke loku kolela koku lipanda kuange. 18  Omo okuti omanu valua va lipandela ovina violuali, lamevo ndi lipanda. 19  Omo okuti “wakualondunge,” vu sanjuka oku pandikisa laveke. 20  Pole, ene vu pandikisa lava vo lingisi apika, lava va nyõla ovikuata viene, lava va punda ovina vu kuete, ava va likemainya kovaso ene kuenda vana vo veti ovikusi kocipala. 21  Tu kuete osõi yoku ci popia, momo tua hongua enene. Pole, nda vakuavo va kuete utõi—mopia ndeveke—lamevo ñuete utõi. 22  Ovo hẽ va Heveru? Lamevo ndu Heveru. Ovo hẽ va Isareli? Lamevo. Ovo hẽ ocitumbulukila ca Avirahama? Lamevo. 23  Ovo hẽ olondingupange via Kristu? Mopia ndeyui, ame nda velapo vali: koku linga upange nda piãla, koku kapiwa vokayike nda piãla, koku tipuiwa ka ci tendiwa, koku puluka kolofa olonjanja vialua. 24  Olonjanja vitãlo nda tipuiwa la va Yudea 39 kolosikote, 25  olonjanja vitatu nda tipuiwa lolombueti, onjanja yimosi nda sosuiwa lovawe, olonjanja vitatu nda kala vonaviyu ya vomba, nda pita uteke umosi lutanya kilu liovava; 26  nda linga ovongende alua, nda kala lohele yoku yoka olondui, ohele yovingumba, ohele la vakuepata liange, ohele la vakualofeka, ohele volupale, ohele vekalasoko, ohele vokalunga kuenda ohele pokati ka vamanji vesanda, 27  nda talavaya calua lekavo, olonjanja vialua kovoteke sia pekalaile, nda kala onjala lenyona, olonjanja vialua lekambo liokulia, ombambi lekambo liuwalo. 28  Kilu liovina evi, kuli eci ci ndi sakalaisa eteke leteke okuti: oku kuatisa akongelo osi. 29  Helie wa hongua, okuti ame sia honguele? Helie wa kupuiwa okuti ame sia ci temẽlele? 30  Nda ndi lipanda ndi lipandela ovina vi situlula oku hongua kuange. 31  Suku Isia ya Ñala Yesu, Una o sesamẽla oku sivayiwa otembo ka yi pui, wa kũlĩha okuti si kasi oku kemba. 32  Ko Damasko nguluvulu o kasi vemehi lia Soma Aretasi wa kapa olondavululi oku lava olupale lua va Damasko oco va ñuate, 33  pole, nda lowisiwa lekualu ponjanela yocimbaka colupale kuenje nda puluka povaka aye.

Footnotes