2 Va Korindo 10:1-18

  • Paulu o teyuila upange waye woku kunda (1-18)

    • Ovimalẽho viuyaki wetu havietimbako (4, 5)

10  Cilo, ame ndi Paulu ndu pingi lumbombe, locisola vu Kristu kuenda haime una u ndi tendi okuti kovaso ene nda liketisa, ndaño ceci si kasipo ñuata utõi lene.  Ndi lavoka okuti eci njiya, si vangula lukãlu la vana va tu tenda okuti tu kuama ovisimĩlo violuali.  Ndaño tu kuama ovisimĩlo violuali, pole, ka tu yaka yaka ndava va kuete ovisimĩlo violuali.  Momo ovimalẽho viuyaki wetu havietimbako, pole, vi kuete unene wa Suku woku nyõla ovina via pama ndombonge.  Tu nyõla ovisimĩlo lovina viosi vĩvi vi tamalãla lukũlĩhĩso wa Suku, kuenda tu yula ovisimĩlo viosi oco vi pokole Kristu;  kuenje tua lipongiya oku yambula esino liosi, osimbu epokolo liene li suapo.  Ene vu tenda ovina ndomo vi molẽha lovaso. Nda umue wa kolela okuti wa tiamẽla ku Kristu, a sokolole ondaka eyi yokuti: Ndeci eye a tiamẽla ku Kristu, haicovo etu.  Ndaño ndi lipanda naito omo liomoko Ñala a tu ĩha yoku vu pamisi, pole, hayoku vu nyõlako, okuti ñutisua osõi.  Momo si yongola oku vu yokokisi lovikanda viange. 10  Momo ovo va popia vati: “Ovikanda viaye vi kuete unene havio vi vetiya, pole, oku u mola, omunu waco wa hongua kuenda olondaka viaye ka vi kuete esilivilo.” 11  Omunu waco a limbuke okuti ovina tu popia vovikanda vietu eci ka tu kasipo, havio tu linga eci tu kalapo. 12  Ka ci kasi okuti tu lisetãhaisa, ale oku lisokisa lomanu vamue va lipandiya ovo muẽle. Pole, eci va liseteka ovo muẽle loku lisokisa ovo muẽle, va limbuka okuti ka va kuete olondunge. 13  Kuenje etu ka tu lipandi lovina ka viatiamẽlele kupange tua tambula, pole, tu lipandela ocikanjo Suku a tu ĩha, okuti oku pitĩla kokuene ndaño vu kasi kupãla. 14  Ka tu kasi oku likolisilako ndu okuti ka tu pitĩla kokuene, momo ndaño wa kali ocipãla, etu tua pitĩla tete kokuene lolondaka viwa viatiamẽla ku Kristu. 15  Kocikele tua tambula ka tu kasi oku lipanda lovopange omunu ukuavo, puãi tu lavoka okuti ndeci ekolelo liene li kasi oku amamako, eci tua linga, vovisimĩlo viene ci kasi oku livokiya vocikanjo cetu. Kuenje upange wetu u livokiya calua, 16  okuti tu kunda olondaka viwa kolofeka vi lisungue lene kuenje ka tu lipandela ocikanjo comunu ukuavo muna ovina viosi via lingiwa ale. 17  “Pole, u o lipanda, a lipandele Yehova.” 18  Momo una o limbila uvangi eye muẽle, ka taviwa, te una Yehova a imbila uvangi.

Footnotes