1 Va Korindo 7:1-40

  • Elungulu kuava ka va kuelele kuenda kolohueli (1-16)

  • Amamako lekalo wa kovongiwa lalio (17-24)

  • Vana ka va kuelele kuenda ovimbumba (25-40)

    • Esilivilo lioku kala omunu ka kuelele (32-35)

    • Oku kuelela “lika vu Ñala” (39)

7  Catiamẽla kovina wa sonehi, ciwa nda ulume ka lambi* ukãi,  puãi, omo lievĩho liukahonga* wa siata, ulume lulume a kuate ukãi waye muẽle kuenda ukãi lukãi a kuate ulume waye muẽle.  Ulume a ece kukãi waye eci co sesamẽla kuenda ukãi a lingevo cimuamue la veyaye.  Ukãi ka kuete unene letimba liaye muẽle, te ulume waye; cimuamue haico, ulume ka kuete unene letimba liaye muẽle, te ukãi waye.  Ko ka litateki omunu lukuavo, te nda wa litavi pokati vokatembo kamue, okuti wamamiko lohutililo kuenda vu litokeka vali, sanga Satana u yonji omo liekambo liene lioku likandangiya.  Eci ndi ci popela oku u kuatisi, pole, hacihandelekoko okuti te vu ci pokola.  Nda yonguile okuti omanu vosi va kala ndame. Pole, omunu lomunu o kuete ongavelo yaye ya tunda ku Suku, u ndeci, u ndeci.  Ndi sapuila vana ka va kuelele kuenda ovimbumba okuti, hĩse nda va kala ndame.  Pole, nda ka va tẽla oku likandangiya, va kuele, hĩse oku kuela, oku kala ño loloñeyi hacoko. 10  Komanu vana va kuele ndi va ĩha onumbi eyi, pole, hameko te Ñala okuti, ukãi ka ka litepe lulume waye. 11  Pole, nda wa litepa, ka ka kuele, hĩse a lisunguluise la veyaye; kuenda ulume ka ka litepe lukãi waye. 12  Vakuavo mopia lavo ame, Ñala hayeko okuti: Nda manji umue ulume o kuete ukãi okuti hukuetavoko kuenje ukãi waco o tava oku kala laye, manji ka ka litepe laye; 13  puãi, nda manji umue ukãi o kuete veyaye okuti hukuetavoko kuenje veyaco o tava oku kala laye, manji ukãi ka ka litepe laye. 14  Momo ulume una okuti hukuetavoko o tendiwa okuti o kola omo liukãi waye kuenda ukãi okuti hukuetavoko o tendiwa okuti o kola omo lia veyaye; nda hacoko omãla vene va vĩha, puãi cilo va kola. 15  Pole, una okuti hukuetavoko nda wa nõlapo oku litepa,* a ende; manji ulume ale ukãi ka kisikiwa oku kala laye, momo Suku wo wĩhi ombembua. 16  Ove ukãi wa kũlĩha ndati nda o popela veyove? Ove ulume wa kũlĩha ndati nda o popela ukãi wove? 17  Omunu lomunu a ende ndeci Yehova o wĩha ongavelo kuenda ndeci Suku o kovonga. Kuenje eyi oyo onumbi nda eca kakongelo osi. 18  Anga kuli umue okuti wa kovongiwa tupu wa seviwa ale evamba? Amameko levamba liaye. Anga kuli umue okuti wa kovongiwa tupu ka seviwile evamba? Nda kuli, ka ka lisevise. 19  Evamba hacimueko, uyamba hacimueko; te oku pokola kolonumbi via Suku. 20  Omunu lomunu a kale lekalo a kovongiwa lalio. 21  Anga wa kovongiwa eci wa kala upika? Ka ci ka ku sakalaise; pole, nda citava oku yovoka, ci linga. 22  Momo lomue wa kovongiwa vu Ñala eci a kala upika okuti o yovoka vu Ñala; haico omunu una okuti ka kaile upika eci a kovongiwa, o linga upika wa Kristu. 23  Ene wa landiwi londando yimue; liwekipo oku kala apika vomanu. 24  A vamanji, omunu lomunu a kale lekalo a kovongiwa lalio kovaso a Suku. 25  Catiamẽla kafeko lakuenje vosombo,* si kuete onumbi yi tunda ku Ñala, pole, ngeca ocisimĩlo cange ndomunu Ñala a lekisa ohenda oco a linge ukuekolelo. 26  Kuenje ndi sima okuti hĩse nda ulume o kala ndeci a kasi cilo. 27  Anga o kuete ukãi? Ku ka sande oku litepa laye. Anga ku kuete ukãi? Liwekapo oku sandiliya ukãi. 28  Ndaño wa kuela, ku lingi ekandu. Nda omunu ka la kuela* kuenje o kuela, ka lingi ekandu. Vana va kuela va laika oku tala ohali yoketimba. Pole, ñasi oku u yovoli kohali. 29  A vamanji ndu sapuili siti, otembo ya kambako yitito. Oku upisa cilo, vana va kuete akãi va kale ndava ka va kuete, 30  vana va lila va kale ndu ka va lili, vana va sanjuka va kale ndu ka va sanjukile, vana va landa va kale ndu ka va kuete cimue, 31  kuenda vana va sakalala lovina violuali va kale ndu ka va sakalalele laluo; momo ekalo lioluali lulo li kasi oku pongoloka. 32  Ndi yongola okuti vu yuvula esakalalo. Ulume ka kuelele wa sakalala lovina via Ñala, ndomo a sanjuisa Ñala. 33  Pole, ulume wa kuela wa sakalala lovina violuali, ndomo a sanjuisa ukãi waye, 34  kuenda utima waye wa tepiwa. Ukãi ka kuelele kuenda ufeko wosombo, wa sakalala lovina via Ñala, loku sokolola ndomo a tẽla oku kola ketimba lo kespiritu. Pole, ukãi wa kuela o sakalala lovina violuali, ndomo a sanjuisa ulume waye. 35  Puãi eci ndi ci popela oku vu kuatisi, okuti oku vu tateki* hacoko, te oku u vetiyi oku vumba Ñala lutima wosi, owu wa tepiwa hawoko. 36  Nda umue o sima okuti ka kasi oku tata ciwa ekalo liaye lioku kala ndoto okuti ka kuela,* haeye wa pitahãla vumalẽhe, ci lingiwe ndoco: A linge ndeci a panga; ka lingi ekandu. Va kuele. 37  Puãi, nda umue wa sokiya vutima waye okuti ka kuete onjongole yaco kuenje o tẽla oku likandangiya kuenda wa panga vutima waye okuti ka kuela,* o linga ciwa. 38  Kuenje wosi o kuela* o linga ciwa, puãi, wosi ka kuela o linga eci ca velapo. 39  Ukãi ohueli wa kutiwa kulume waye osimbu eye a kasi lomuenyo. Puãi nda ulume waye wa fa, wa kutuluiwa oco a kuele vali, pole, te lika vu Ñala. 40  Vocisimĩlo cange, eye o sanjuka nda o kala ño ndoco; kuenda ndi sima okuti ñuetevo espiritu lia Suku.

Footnotes

Okuti, oku lipekela.
Kelimi lio Helasi porneia. Tala Elomboluilo.
Ale, “oku nyuha.”
Ale, “vana ka va la kuela.”
Ale, “Vana okuti afeko lakuenje vosombo.”
Lit., “oku kapa ukolo.”
Ale, “ufeko pamue ukuenje wosombo.”
Ale, “oku amamako lekalo liaye liufeko pamue liukuenje wosombo.”
Ale, “oku kuela okuti ukuenje pamue ufeko wosombo.”