1 Va Korindo 5:1-13

  • Ocitangi cimue cevĩho liukahonga (1-5)

  • Etumbisa litito li tumbisa osema yosi ya tamiwa (6-8)

  • Omunu ondingaĩvi a tundisiwe (9-13)

5  Ocili, ca yevala okuti pokati kene pali evĩho liukahonga,* pole, evĩho* liaco ka lia la muiwa pokati ka vakualofeka, okuti ulume umue o lala lukãi wa isiaye.  Oco hẽ ene vu ci lipandela? Siti nda wa nyumaleli loku tundisa pokati kene omunu wa linga ovina viaco?  Ndaño si kasiko letimba, haimo lovisimĩlo oko ñasi kuenda ame nda sombisa ale omunu wa ci linga, ndu okuti ñasi lene.  Eci vu liongololi kumosi vonduko ya Ñala yetu Yesu, loku limbuka okuti ñasi lene lutima kuenda lunene wa Ñala yetu Yesu,  omunu waco vu sukila oku weca ku Satana okuti etimba liaye li nyõleha, oco espiritu li popeliwe vokuenda kueteke lia Ñala.  Oku lipandiya kuene ka kuwako. Ka wa kũlĩhĩli okuti etumbisa litito li tumbisa osema yosi ya tamiwa?  Tundisi pokati kene etumbisa liosi liosimbu, oco vu lingi osema ya tamiwa yokaliye, ene muẽle wa pui ale etumbisa. Ocili, Kristu o Paskoa yetu wa lumbiwa ale.  Omo liaco, ka tu ka lingi ocipito caco letumbisa liosimbu, ndaño letumbisa lievĩho ale liekandu, te lombolo ka yi kuete etumbisa okuti yesunguluko kuenda yocili.  Vukanda ndo soneheli nda popia siti, liwekipo oku kuata ukamba* la vakuevĩho liukahonga,* 10  ka ci lomboloka okuti vakuevĩho liukahonga,* ale vakuacipululu, olondiandia, pamue vakuakufendela oviteka vo voluali lulo. Momo nda hacoko, nda wa tundi voluali. 11  Puãi cilo ñasi oku u soneheli oco vu liwekipo oku kuata ukamba* lomunu wosi o tukuiwa manji okuti ukuevĩho liukahonga,* ukuacipululu, ukuakufendela oviteka, ukuakuimbula,* ale oholua, pamue ondiandia, ndaño oku lia laye, ko ka li laye. 12  Momo lie ñuetele ocikele coku sombisa ava ka va kasi vekongelo? Ene ka vu sombisa hẽ vana va kasi vekongelo, 13  osimbu Suku a sombisa vana ka va kasi vekongelo? “Tundisi omunu waco ondingaĩvi pokati kene.”

Footnotes

Kelimi lio Helasi porneia. Tala Elomboluilo.
Kelimi lio Helasi porneia. Tala Elomboluilo.
Ale, “oku liwekapo oku linala.”
Tala Elomboluilo, “Evĩho liukahonga.”
Tala Elomboluilo, “Evĩho liukahonga.”
Ale, “oku liwekapo oku linala.”
Tala Elomboluilo, “Evĩho liukahonga.”
Ale, “omunu ukuakutuka.”